GMC અને વસાહત મહાસંઘ ભીના-સૂકા કચરા અને ડસ્ટબિન મામલે સામસામે આવી ગયાં

ગાંધીનગર મ્યુનિસિપલ કોર્પોરેશન દ્વારા ભીનો અને સૂકો કચરો અલગ કર્યા બાદ કોર્પોરેશનની ગાડીમાં લાવવા સૂચના આપવામાં આવી છે. જે માટે કોર્પોરેશને પત્ર લખી, પેમ્પલેટ ઘરે-ઘરે લગાવી લોકોને સૂચના આપી હતી. જે બાદ કોર્પોરેશને ભીનો અને સૂકો કચરો અલગ ન હોય તો તેે લેવાની જ ના પાડી દીધી છે. આ મુ્દ્દે કોર્પોરેશન તંત્રને ગાંધીનગર વસાહત મંડળ આમને સામને આવી ગયા છે.

• ભીનો અને સૂકો કચરો અલગ હોય તો જ કોર્પોરેશન દ્વારા ઉઠાવવામાં આવી રહ્યો છે
• રોજના 100 ટન કચરાની જગ્યાએ 30 ટન જેટલા કચરાનો જ નિકાલ
• શહેર વસાહત મહાસંઘે કર્યો વિરોધ
• શહેર વસાહત મહાસંઘની મીટીંગમાં કમિશનર શહેરના વસાહતી બની હાજર રહ્યાં

ગાંધીનગરઃ કોર્પોરેશનની સૂચના સામે વસાહત મહાસંઘનું કહેવું છે કે, ભીનો અને સૂકો કચરો અલગ કરવા માટે તમે અમને બ્લૂ અને ગ્રીન કલરની બે ડસ્ટબીન આપો. જો ન આપી શકો તો અમને મિલકતવેરાના ટેક્સમાંથી રિબેટ આપો. પરંતુ કોર્પોરેશને આ માગનો અસ્વીકાર કર્યો છે. જેથી રોજનો 100 ટનથી વધુ કચરો ગાંધીનગરમાં ભેગો થાય છે. પરંતુ ભીનો અને સૂકો કચરો અલગ ન હોવાથી 30 ટન જેટલા કચરાનો જ નિકાલ રોજ થઈ શકે છે. આ કચરો સેક્ટર 30 ખાતે ઠાલવવામાં આવી રહ્યો છે.


ગાંધીનગરના નવનિયુક્ત મ્યુનિસિપલ કમિશનર ધવલ પટેલના આવ્યા બાદ તેમણે ભીનો અને સૂકો કચરો અલગ કરી ઠાલવવાની ઝૂંબેશ ચલાવી છે. પરંતુ આ કારણે પાટનગરમાં કચરાના મુદ્દે શહેરીજનો અને તંત્ર આમનેસામને આવી ગયા હોય તેવું લાગી રહ્યું છે. તેમણેે કહ્યું હતું કે ભીના કચરાનો ઉપયોગ કરી તેમાંથી ખાતર બનાવી શકાય અને સૂકા કચરાને અલગ કરી તેમાંથી તેનો ઉપયોગ રિસાયક્લિંગ માટે કરી શકાય. કચરાનો ઢગલો થઈ રહ્યો છે તેને ઓછો કરી શકાય છે. તે હેતુથી આ ડ્રાઈવ ચલાવવામાં આવી રહી છે. આ માટે અમે લોકોને સૂચિત કરવા માટે પેમ્પ્લેટ છપાવ્યાં અને નોટિફિકેશન જારી કરી લોકોને આ બાબતે જાણ કરી હતી. જે માટે 15 દિવસનો સમય આપવામાં આવ્યો હતો. જે બાદ લોકોએ વધુ એક અઠવાડિયાથી જેટલો સમય માગ્યો હતો." ત્યારબાદ કોર્પોરેશને ભીનો અને સૂકો કચરો અલગ ન હોય તો ઉઠાવવાની ના પાડી દીધી હતી. જે હેતુથી ઘણી સોસાયટીઓ અને વિસ્તારોમાં કચરો અત્યારે અલગ ન હોય તો ઉઠાવવામાં આવી રહ્યો નથી.

ગાંધીનગર શહેર વસાહત મહાસંઘે ડસ્ટબિન આપવા માગણી કરી હતી

મ્યુનિસિપલ કમિશનરનું કહેવું છે કે "ભીનો અને સૂકો કચરો જ્યાં સુધી અલગ ન હોય ત્યાં સુધી ઉઠાવવામાં આવશે નહીં." જેનો શહેર વસાહત મંડળે વિરોધ કર્યો હતો અને આ માટે શહેરીજનોને અલગ-અલગ ડસ્ટબિન આપવાની માગણી કરી હતી.



સ્માર્ટફોન પાછળ લોકો ખર્ચ કરી શકે છે તો ડસ્ટબિન માટે કેમ નહીં? : કમિશનર

ગાંધીનગર શહેર વસાહત મહાસંઘ દ્વારા મ્યુનિસિપલ કમિશનરને ડસ્ટબિન અલગ-અલગ ગ્રીન અને બ્લુ આપવા અંગે રજૂઆત કરવામાં આવી હતી. પરંતુ કમિશનરે કહ્યું હતું કે, સ્માર્ટફોન અને વ્યસન પાછળ લોકો પૈસા ખર્ચી શકતા હોય છે તો ડસ્ટબિન કેમ નથી ખરીદી શકતાં. પરંતુ વસાહત મહાસંઘ દ્વારા આંદોલનની ચીમકી પણ આ માગને પૂરી કરવા આપવામાં આવી હતી. જેને લઇને શહેર વસાહત મહાસંઘની આજે મીટિંગ યોજાઇ હતી. જેમાં ગાંધીનગરના શહેરીજનોને આમંત્રણ અપાયું હતું. ગાંધીનગર કોર્પોરેશનના મ્યુનિસિપલ કમિશનર ધવલ પટેલ ખુદ એક વસાહતી બની આ મીટીંગમાં ગયાં હતાં. જેમને તેમનો પક્ષ ભીનો અને સૂકો કચરો અલગ કરવાને લઈને મૂક્યો હતો અને લોકોને આ અંગે શહેરના વસાહતી અને એક નાગરિક બની સમજ આપી હતી. પરંતુ શહેર વસાહતસંઘે કહ્યું હતું કે જો તમે ડસ્ટબિન અલગ અલગ નથી આપી શકતાં તો અમને મિલકતવેરાના ટેક્સમાં રિબેટ આપો.

કામદારો સાથે લોકોનું થઈ રહ્યું છે ઘર્ષણ ભીનો અને સૂકો કચરો એક સાથે એક જ ડસ્ટબિનમાં હોવાથી કોર્પોરેશન દ્વારા ઉઠાવવામાં આવી રહ્યો નથી. જે હેતુથી કચરો ઉઠાવવા માટે ગાડી લઈને જતા કામદારો સાથે શહેરીજનો ઘર્ષણમાં પણ ઉતર્યા હતાં. સૂત્રોના જણાવ્યા અનુસાર ધોળાકૂવા ગામમાં ગ્રામજનો દ્વારા જો મિક્સ કચરો ન લેવો હોય તો ગામમાં ગાડી લઈને આવવા માટે મનાઈ ફરમાવી દીધી છે. જેથી આવતીકાલથી ગામમાં ગાડી લઈને આવતા નહીં તેવી ચીમકી પણ કામદારોને આપી હતી. આ ઉપરાંત સેક્ટર 19માં રહેતા એક પોલીસ જવાને કામદારની ગાડીની ચાવી કાઢી લીધી હતી અને ગાડીના કાગળ માંગ્યા હતાં. કચરો ન ઉઠાવતા પોલીસે આ ગરમી બતાવી હતી અને આવતીકાલથી કચરો નહીં ઉઠાવ્યો તો ગાડી જપ્ત કરી લઈશ તેવી ચીમકી પણ તેમણે આપી હતી. આ પ્રકારે ઘર્ષણ અલગ અલગ વિસ્તારોમાં કચરો ન ઉઠાવવાની બાબતે જોવા મળી રહ્યાં છે. ડસ્ટબિન આપવાથી સોલ્યુશન નહીં આવેઃ કમિશનર મ્યુનિસિપલ કમિશનર ધવલ પટેલે કહ્યું હતું કે "2017માં લોકોને ડસ્ટબિન આપવામાં આવ્યા હતાં. પરંતુ જો ડસ્ટબિન અલગ-અલગ આપવામાં આવે તો તેનાથી સોલ્યુશન નથી આવતું. તમે તમારા ઘરનો કચરો બોક્સ કે અન્ય કોઈ વાસણમાંથી પણ અલગ કરી આપી શકો છો. ડસ્ટબિનનો કોઈ ખર્ચ કરવાની જરૂર નથી. જે દિવસથી તમે કચરો અલગ કરશો એ દિવસથી કોર્પોરેશનની ગાડીઓ દ્વારા આ કચરો ઉઠાવવામાં આવશે અત્યારે 30થી 40 ટન કચરો ઉઠાવવામાં આવી રહ્યો છે. રેગ્યુલર દિવસોમાં 100 ટનથી વધુ કચરો ઉઠાવવામાં આવતો હતો. આ એક જનજાગૃતિની પહેલ છે, જેમાં મિનિમમ પોલ્યુશન અને મેક્સિમમ રિસાયક્લિંગ થશે. આ રુલ્સ હું આવ્યો એ પહેલાં પણ હતાં પરંતુ લોકો અવેર થાય અને જાતે જ ભીનો કચરો સૂકો કચરો અલગ કરી આપે તે જરુરી છે." અમારા પ્રજાના ઉઘરાવેલા પૈસાથી ખર્ચ કરી ડસ્ટબિન આપી શકો છો : વસાહત મહાસંઘ આ બાબતે આજે શહેર વસાહત મહાસંઘની બેઠક યોજાઇ હતી. જેમાં પ્રમુખ કેસરીસિંહ બિહોલાએ કહ્યું કે, કોર્પોરેશન પાસે ખર્ચ પાડી નવા ડસ્ટબિન આપવાની સત્તા છે. અમારા પ્રજાના ઉઘરાવેલા પૈસાથી ખર્ચ કરી જ શકો છો. જો તમે અમને ડસ્ટબિન નથી આપી શકતા તો અમને મિલકતના ટેક્સમાંથી રિબેટ આપો. આ ઉપરાંત અન્ય કેટલીક માગણીઓ પણ કરી હતી.આ પણ વાંચોઃ કોર્પોરેશને 7 મહિનામાં વેક્સિનેશનના પ્રથમ ડોઝનો ટાર્ગેટ પૂર્ણ કર્યો, 1.75 લાખ લોકો સેકન્ડ ડોઝથી વંચિત

આ પણ વાંચોઃ ગાંધીનગર કોર્પોરેશન ઇલેક્શન હવે ચોમાસા બાદ યોજાશે, ચૂંટણી આયોગે કરી જાહેરાત