ગાંધીનગર તા.પંચાયતની સભામાં હોદ્દેદારો ભૂલ્યા ભાન, હિસાબો રજુ કરવા મુદ્દે સામસામે

ગાંધીનગરઃ પાટનગરમાં આજે તાલુકા પંચાયતની સામાન્ય સભા મળી હતી. જેમાં અત્યાર સુધીના હિસાબો રજુ કરવાના મુદ્દાને લઈને ભાજપ અને કોંગ્રેસના સભ્યો સામ સામે આવી ગયા હતા, ત્યારે તાલુકા પંચાયત મહિલા પ્રમુખ અને કોંગ્રેસના કારોબારી પ્રમુખ વચ્ચે શાબ્દિક ટપાટપી જોવા મળી હતી.

આ બેઠકમાં તાલુકા પંચાયતના મહિલા પ્રમુખે કહ્યું હતું કે, તે સત્તા મારી છે એટલે જે હું કહું તેમ જ થશે. સભામાં ધમાસાણ થવાથી પોલીસ બંદોબસ્ત પણ ગોઠવી દેવામાં આવ્યો હતો. સભાખંડમાં માત્ર સભ્યો અને કો-ઓપ સભ્યોને જવા દેવામાં આવી રહ્યા હતા. આ સભામાં કુલ 6 મુદ્દા જેવા કે, ગત્ સામાન્ય સભાની કાર્યવાહીને બહાલી રાખવાની બાબાત, સામાન્ય સભાની કાર્યવાહી નોંધ વંચાણે લઈ અમલવારી કરવા બાબત, વહીવટી કામગીરી માટે નવા કોમ્પ્યુટર ખરીદવા બાબત, કલમ 370 હટાવવા બદલ કેન્દ્ર સરકારને અભિનંદન આપતો ઠરાવ વગેરેની ચર્ચા કરવામાં આવી હતી.

અત્યાર સુધીના તાલુકા પંચાયત દ્વારા કરવામાં આવેલા ખર્ચના હિસાબો અવલોકનમાં લઈ મંજુર કરવા બાબતનો મુદ્દો આવતા જ કોંગ્રેસના કારોબારી ચેરમેન રસીક ઠાકોરે વિરોધ ઉઠાવ્યો હતો. તેની સાથે જ કોંગ્રેસના સભ્યોએ પણ વિરોધ ઉઠાવ્યો હતો. આ મુદ્દાને લઇને તાલુકા પંચાયતના મહિલા પ્રમુખ શોભના ઠાકોર અને કારોબારી ચેરમેન ઠાકોર અને કારોબારી ચેરમેન રસિક ઠાકોર વચ્ચે શાબ્દિક બોલાચાલી થઈ હતી.