વાપીમાં દમણ તરફથી નેશનલ હાઇવે તરફ જઈ રહેલા ટ્રકચાલકે ટ્રકના સ્ટીયરીંગ પરથી કાબુ ગુમાવતા ઇમરાનનગર વિસ્તારમાં બે કાર અને એક રિક્ષા સહિત ત્રણ વાહનોને અડફેટે લીધા હતા. જેમાં ટ્રક ચાલકે ટ્રક અને ડ્રઈવર સમેત કારને રસ્તા પરથી સાઈડમાં આવેલ વીજપોલ સુધી ઢસડી હતી. કારચાલક કારમાં જ ફસાઈ ગયો હતો.
આ ગંભીર અકસ્માતમાં વિજળીનો થાંભલો પણ વળી જતા વીજતાર તૂટી ગયા હતા. તેમજ વીજ પુરવઠો ખોરવાયો હતો. અચાનક બનેલી આ અકસ્માતની ઘટનાથી આસપાસના લોકોમાં પણ ગભરાટ ફેલાયો હતો. લોકોએ તાબડતોબ ધસી આવી કારચાલકને કારમાંથી બહાર કાઢ્યો હતો. અકસ્માતની આ ઘટનામાં કારચાલકનો ચમત્કારિક બચાવ થયો હતો. જ્યારે ટ્રક ડ્રાઇવર તકનો લાભ લઇ નાસી છૂટયો હતો.
અકસ્માતની ઘટના દરમિયાન માતેલા સાંઢની જેમ આવેલા ટ્રકે એક નેનો કાર અને રીક્ષાને પણ અડફેટે લીધી હતી. સદનસીબે રિક્ષામાં કોઈ સવાર નહોતું અને નેનો કાર સાઈડમાં પાર્ક કરેલી હોય જાનહાનિ ટળી હતી. ઘટના બાદ ક્રેઇન મંગાવી કારને વીજ પોલ અને ટ્રકની વચ્ચેથી અલગ કરાઇ હતી. સેલ્વાસ પાર્સિંગની આ કારને મોટાપાયે નુકસાન થયું હતું. સમગ્ર ઘટના અંગે આસપાસના લોકોમાં પણ ટ્રક ચાલક સામે રોષની લાગણી ભભૂકી ઉઠી હતી.
