- કલેક્ટર સહિતના અધિકારીઓએ લીધી કોરોના વેક્સિન
- કોવિડ વેક્સિનેશનના બીજા તબક્કાનો જિલ્લા વ્યાપી પ્રારંભ
- સ્વામી વિવેકાનંદ હોમિયોપેથીક કોલેજ ખાતે વેક્સિનેશનભાવનગર
ભાવનગર: જિલ્લામાં કોવિડ વેક્સિનેશનના બીજા તબક્કાનો જિલ્લા વ્યાપી પ્રારંભ થયેલો છે. જેમાં ભાવનગર શહેરી વિસ્તારમાં 1,000 પોલીસ કર્મચારીઓ તેમજ નગરપાલિકા તથા ગ્રામીણ વિસ્તારોમાં 3700થી વધુ કોવિડ ફ્રન્ટલાઈન વર્કર્સ કોવિડ વેક્સિન લેવાં જોડાયાં હતા. જેમાં જિલ્લાના ભાવનગર તાલુકામાં 935, ઘોઘા ખાતે 81, તળાજા ખાતે 530, મહુવા ખાતે 465, જેસર ખાતે 18, પાલીતાણા ખાતે 603, ગારીયાધાર ખાતે 359, વલ્લભીપુર ખાતે 255, ઉમરાળા ખાતે 141 તેમજ સિહોર ખાતે 354 સહિત કુલ 3741 મહેસુલ વિભાગ, પોલીસ, પંચાયત વિભાગ સહિતના વિભાગોના ફ્રન્ટ લાઈન વર્કર્સે કોવિડ વેક્સિન માટે રજિસ્ટ્રેશન કરાવ્યું હતું. ભાવનગરની સ્વામી વિવેકાનંદ હોમિયોપેથીક કોલેજ ખાતે આજ સોમવારે જિલ્લા કલેકટર ગૌરાંગ મકવાણા, રેન્જ આઈ. જી. અશોકકુમાર યાદવ, જિલ્લા વિકાસ અધિકારી વરૂણકુમાર બરનવાલ, જિલ્લા પોલીસ અધિક્ષક જયપાલસિંહ રાઠોર, જિલ્લા જેલ અધિક્ષક મકવાણા, હોમગાર્ડ કમાન્ડન્ટ શંભુસિંહ સહિતના અધિકારીઓએ વેક્સિન લીધી હતી. જ્યારે જિલ્લાના તમામ નાયબ પોલીસ અધિક્ષક, પ્રાંત અધિકારી તથા મામલતદાર સહિતના ઉચ્ચ અધિકારીઓ પણ લગત વિસ્તારોમાં કોવિડ વેક્સિન લઈ રસીકરણ અભિયાનમાં જોડાયાં હતા.
કોવિડ વેક્સિન લેવા જિલ્લા કલેક્ટરે અનુરોધ કર્યો
કોવિડ વેક્સિન લીધાં બાદ જિલ્લા કલેક્ટર ગૌરાંગ મકવાણાએ જણાવ્યું હતું કે, વેક્સિનના બીજા તબકકામાં સોમવારે મારા સહિત જિલ્લાના તમામ ઉચ્ચ અધિકારીઓએ આ વેક્સિન લીધી છે. આ કોવિડ વેક્સિન કોઈપણ પ્રકારની આડઅસર વિનાની એકદમ સુરક્ષિત છે. આજ સોમવારે 4700 જેટલા ફ્રન્ટલાઈન વર્કર્સને આ વેક્સિન આપવા માટેનું જિલ્લાવ્યાપી આયોજન હાથ ધરાયુ છે. જેમાં તબક્કાવાર મહેસુલ તથા પંચાયતના કર્મીઓને પણ આવરી લેવામાં આવશે. તેમ જણાવી જિલ્લાના તમામ નાગરિકોને પણ જ્યારે તેમનો ક્રમ આવે ત્યારે અચૂક આ કોવિડ વેક્સિન લેવા જિલ્લા કલેક્ટરે અનુરોધ કર્યો હતો.
