છેતરપિંડી કેસમાં ભાર્ગવી શાહ સામેની ત્રણેય FIRમાં હાઈકોર્ટે જામીન મંજુર કર્યા છે. હાઈકોર્ટમાં જસ્ટીસ એ. વાય. કોગ્જ સમક્ષ ભાર્ગવી શાહના વકીલ અનિક તિમ્બલિયાએ દલીલ કરી હતી કે, ભાર્ગવી શાહ માત્ર કાગળ પર કંપનીના ડિરેક્ટર છે. પરતું સમગ્ર વ્યવહાર અને સંચાલન મુખ્ય આરોપી વિનય શાહ દ્વારા કરવામાં આવતું હતું. વિનય શાહની પત્ની હોવાથી તેને સમગ્ર કેસમાં સંડોવવામાં આવી છે. ભાર્ગવી શાહે એક પણ રૂપિયો લીધો નથી. વિનય શાહની પત્ની હોવાથી તેને લાંબા સમયથી પોલીસ કસ્ટડીમાં રાખવામાં આવી છે. આ કેસમાં પોલીસ તપાસ પૂર્ણ થઈ ચુકી છે, અને ચાર્જશીટ પણ દાખલ થઈ ગઈ હોવાથી તેને જામીન આપવામાં આવે. હાઈકોર્ટે અરજદાર ભાર્ગવી શાહના વકીલ અનિક તિમ્બલિયાની દલીલને માન્ય રાખીને ત્રણેય ગુનામાં જામીન મંજૂર કર્યા હતા.
શહેરના વસ્ત્રાપુર અને નિકોલ પોલીસ સ્ટેશનમાં નોંધાયેલી ત્રણ FIR સામે દાખલ કરાયેલી ભાર્ગવી શાહની જામીન અરજી હાઈકોર્ટે મંજૂર કરી દીધી છે. અગાઉ વસ્ત્રાપુર પોલીસ સ્ટેશન ખાતે નોંધાયેલી પોલીસ ફરિયાદમાં હાઈકોર્ટે ભાર્ગવીના જામીન મંજુર કર્યા હતા. હવે ભાર્ગવી શાહ સામે દાખલ થયેલી તમામ પોલીસ ફરિયાદમાં તેને જામીન મળ્યા છે. હાઈકોર્ટે ભાર્ગવી શાહના તમામ ગુનામાં જામીન મંજૂર કરતા, હવે તે પોલીસ કસ્ટડીમાંથી મુક્ત થશે. ભાર્ગવી શાહ વિરૂધ વસ્ત્રાપુર પોલીસ સ્ટેશનમાં ત્રણ અને નિકોલમાં એક આમ કુલ 4 પોલીસ ફરિયાદ દાખલ કરવામાં આવી હતી.
અગાઉ અમદાવાદ મિર્ઝાપુર ગ્રામ્ય કોર્ટે ભાર્ગવી શાહ વિરૂધ બે જુદા જુદા પોલીસ સ્ટેશનમાં દાખલ કુલ 4 પોલીસ ફરિયાદમાં જામીન અરજી ફગાવી દેતા હાઈકોર્ટમાં જામીન મેળવવા માટે રિટ દાખલ કરી હતી. અગાઉ ગુજરાત હાઈકોર્ટના જસ્ટીસ એ. વાય. કોગ્જે ગુજરાત ન છોડવાની શરતે વસ્ત્રાપુર પોલીસ સ્ટેશન ખાતે નોંધાયેલી એક FIRમાં ભાર્ગવીના જામીન મંજુર કર્યા હતા.
ઉલ્લેખનીય છે કે, ઓન-લાઈન માર્કેટિંગ થકી લોકોને પૈસાની લાંલચ આપી વિનય શાહ અને તેની પત્ની ભાર્ગવી શાહ પર લોકો સાથે કરોડો રૂપિયાની છેતરપિંડીની પોલીસ ફરિયાદ દાખલ કરવામાં આવી હતી. વસ્ત્રાપુર પોલીસ સ્ટેશનમાં નોંધાયેલા ગુના પ્રમાણે ઓફિસમાં વિનય શાહ અને ભાર્ગવી શાહની હાજરીમાં ફરિયાદીએ 1 લાખ રૂપિયા જેટલું રોકાણ કર્યું હતું જો કે, તેના પછી કોઈ લાભ ન મળતા પોલીસ ફરિયાદ દાખલ કરવામાં આવી હતી.
