- રાજસ્થાન સરકારને ગુજરાતમાંથી 1 લાખ કરોડથી વધુના રોકાણની ખાતરી
- 41,590 કરોડના MOU અને 64,110 કરોડના LOU
- રાજસ્થાનમાં ગ્રીન એનર્જી સેકટરમાં રોકાણ કરવા રોકાણકારો આતૂર
અમદાવાદ: રાજ્યના વિકાસ માટે મૂડી રોકાણ લાવવું અત્યંત જરૂરી છે. આધુનિક સમયમાં દરેક રાજ્યો આ વાત જાણી ચૂક્યા છે. ગુજરાત, ઉત્તર પ્રદેશ, મહારાષ્ટ્ર, રાજસ્થાન સહિતના રાજ્યો ગ્લોબલ ઈન્વેસ્ટમેન્ટ સમિટ યોજીને પોતાના રાજ્યમાં મૂડી રોકાણ લાવવા પ્રયત્નશીલ છે. એ જ ક્રમમાં રાજસ્થાન સરકાર દ્વારા કોન્ફડરેશન ઓફ ઈન્ડિયન ઈન્ડસ્ટ્રીઝના સહયોગથી ગુજરાતમાં 'ઈન્વેસ્ટ રાજસ્થાન' (Invest Rajasthan) પ્રોગ્રામનું આયોજન કરવામાં આવ્યું હતું. જે અંતર્ગત ગુજરાતમાંથી 1.05 લાખ કરોડના મેમોરેન્ડમ ઓફ અન્ડરસ્ટેન્ડિંગ(MOU) અને લેટર ઓફ ઇન્ટેન્ટસ(LOU) સાઈન કરાયા છે.
રાજસ્થાનના ઉર્જા ક્ષેત્રમાં રસ
આ 1.05 લાખ કરોડના ઇન્વેસ્ટમેન્ટ કમિટમેન્ટ્સ (Rajasthan Investment Commitments)માં 41,590 કરોડના MOU તથા 64,110 કરોડના LOI સાઈન થયા છે. જેમાં રિન્યુએબલ એનર્જી, સિટી ગેસ સપ્લાય, સિમેન્ટ ઉત્પાદન, લોજિસ્ટિક, ટુરિઝમ અને હોસ્પિટાલિટી વગેરે જેવા ક્ષેત્રોમાં મૂડીરોકાણની દરખાસ્તો થઈ છે. રાજસ્થાન સરકારે આ મૂડીરોકાણ દ્વારા રાજસ્થાનમાં એક લાખ નવા રોજગાર સર્જનનો અંદાજ મુક્યો છે.
પરવાનગીઓમાં અમલદારશાહી ઘટાડવાનો દાવો કરતી રાજસ્થાન સરકાર
રાજસ્થાનના આરોગ્ય અને એક્સાઈઝ પ્રધાન પ્રસાદીલાલ મીણાએ જણાવ્યું હતું કે, વિસ્તારની દ્રષ્ટિએ રાજસ્થાન ભારતનું સૌથી વિશાળ રાજ્ય છે. અહીં ખનિજ તથા અન્ય કુદરતી સંસાધનો ભરપૂર છે. રાજસ્થાન સરકાર દ્વારા રોકાણકારો સરળતાથી પોતાના પ્રોજેક્ટ લાવી શકે તે માટે અમલદારશાહી ઘટાડીને સરળ ઓનલાઈન પ્રક્રિયા ઉપર વધુ ભાર મૂકવામાં આવ્યો છે.
જેસલમેરમાં 24 હજાર કરોડના ખર્ચે સોલાર પાર્ક બનશે
ગુજરાતમાંથી રાજસ્થાનમાં થવા જઇ રહેલા ઈન્વેસ્ટમેન્ટ (Rajasthan Investment Summit)માં જેસલમેરના ફતેહગઢમાં 24,000 કરોડનો સોલાર પાર્ક, જોધપુરના ફ્લોદી ખાતે 1,200 કરોડનો સોલાર પાવર ઉત્પાદન પ્રોજેકટ, જોધપુર, જેસલમેર અને બાડમેર ખાતે 8,200 કરોડના સોલાર પાવર પ્રોજેક્ટ અને અલવરમાં 5,000 કરોડના ખર્ચે સિટી ગેસ સપ્લાય પ્રોજેક્ટ સ્થાપનાની દરખાસ્ત આવી છે.
2022માં રાજસ્થાન ઇન્વેસ્ટમેન્ટ સમિટ
રાજસ્થાન ઇન્વેસ્ટમેન્ટ સમિટ જાન્યુઆરી 2020માં થનાર છે, ત્યારે તે પૂર્વે વિવિધ જિલ્લાઓ અને રાજ્યોમાં રાજસ્થાન સરકાર દ્વારા 28થી વધુ રોડ શો કરવામાં આવ્યા છે. દુબઈમાં પણ રોડ શો કરાયો છે. ફક્ત MOU અને LOI જ નહીં પરંતુ રોકાણકારોના પ્રોજેક્ટના વાસ્તવિક ભૂમિપૂજન તથા ઉદઘાટન કાર્યો પર ભાર મુકાઈ રહ્યો છે.
રાજસ્થાનમાં માળખાગત સુવિધાઓ
રાજસ્થાન સરકારે જણાવ્યું હતું કે, રાજસ્થાન સ્ટેટ ઇન્ડસ્ટ્રીયલ ડેવલપમેન્ટ એન્ડ ઈન્વેસ્ટમેન્ટ કોર્પોરેશન દ્વારા 360 કરતાં વધુ ઔદ્યોગિક વિસ્તારોનો વિકાસ કરાયો છે. જેમાં 40 હજાર કરતાં વધુ એકમો કાર્યરત થઇ ગયા છે અને વધુ 150 એકમો વિકાસની પ્રક્રિયામાં છે. રાજસ્થાનમાં રોકાણના વિસ્તારો 58% દિલ્હી મુંબઈ ઇન્ડસ્ટ્રીયલ કોરિડોર વિસ્તાર હેઠળ આવે છે. વધુમાં નવો ગેસ ગ્રીડ પ્રોજેક્ટ રાજ્યના 1730 કિલોમીટરના અંતરને આવરી લે છે. આ ઉપરાંત રાજ્યમાં 07 એરપોર્ટ અને 01 કાર્ગો કોમ્પ્લેક્ષ છે. ભવિષ્યમાં ચાર મલ્ટી મોડલ લોજિસ્ટિક હબ પણ બનવાના છે.
આ પણ વાંચો: રાજસ્થાન ભાજપના 12 ધારાસભ્યો ગુજરાત પહોંચ્યા
લાંબા ગાળાના રોકાણ અને બદલાતી સરકાર
રાજસ્થાન સરકાર દ્વારા જે MOU અને LOU સાઈન કરવામાં આવ્યા છે, તેને કાર્યરત થતા વર્ષો લાગે તેમ છે. રાજસ્થાનમાં દર પાંચ વર્ષે સરકાર બદલવાનો ટ્રેન્ડ છે. ત્યારે રાજ્યના આરોગ્ય અને એકસાઇઝ પ્રધાન પ્રસાદીલાલ મીણાએ જણાવ્યું હતું કે, 2023માં પણ રાજસ્થાનમાં કોંગ્રેસની સરકાર હશે.
આ પણ વાંચો: રાજસ્થાનમાં ગુજરાત પોલીસના ચાર અધિકારીઓને બદમાશ સમજી ગ્રામજનોએ માર્યો ઢોર માર
