ગુજરાતમાં વરસાદી પેટર્ન બદલાઈ, તેનું શું કારણ? ડ્રાય વિસ્તાર કચ્છ અને સૌરાષ્ટ્રમાં રેકોર્ડબ્રેક વરસાદ

ગુજરાતમાં હવામાન પલટાયું છે એટલે કે ઋતુચક્રમાં ઉનાળામાં ગરમીનું પ્રમાણ વધતું જાય છે, શિયાળામાં ઠંડી વધતી જઈ રહી છે. આ વર્ષે ચોમાસામાં વરસાદ પણ વધુ થયો છે. કલાઈમેન્ટ ચેન્જને કારણે વરસાદની પેર્ટન બદલાઈ છે. કોરોના કાળની નુકસાની સારું ચોમાસુ ભરપાઈ કરી આપશે. પ્રોત્સાહક ચોમાસાને કારણે ગુજરાતમાં વાવેતર વિસ્તાર વધ્યો છે. એટલે કે આ વર્ષે ચોમાસું પાક સારા થશે અને ઉતારો પણ વધુ આવશે. જુઓ ગુજરાતના સારા વરસાદ પર ETV Bharatનો વિશેષ રિપોર્ટ.

અમદાવાદ: ગુજરાતમાં ચાલુ મોસમનો સરેરાશ 107.97 ટકા વરસાદ નોંધાયો છે, જેમાં સૌથી વધુ કચ્છ ઝોનમાં 221.80 ટકા, સૌરાષ્ટ્ર ઝોનમાં 142.02 ટકા, ઉત્તર ગુજરાતમાં 95.60 ટકા, દક્ષિણ ગુજરાત ઝોનમાં 92.77 ટકા અને પૂર્વ મધ્ય ઝોનમાં 80.79 ટકા સરેરાશ વરસાદ નોંધાયો છે. અમદાવાદ જિલ્લામાં સીઝનનો સરેરાશ વરસાદ 84 ટકા થઈ ગયો છે, અને તેમાં ધોળકા તાલુકામાં 104 ટકા વરસાદ વરસી ગયો છે.

ગુજરાતમાં વરસાદી પેટર્ન બદલાઈ

ગુજરાતમાં થયેલા વરસાદને કારણે સરદાર સરોવર સહિત 206 જળાશયો ભરાયાં છે. સરદાર સરોવર ડેમમા હાલ 2,47,378 એમસીએફટી પાણીના સંગ્રહ સાથે કુલ જળસંગ્રહ શક્તિના 74.05 ટકા જેટલો જળસંગ્રહ થયો છે. રાજ્યના 93 જળાશયો 100 ટકાથી વધુ ભરાયાં છે, તે ઉપરાંત સરદાર સરોવર સહિત 72 જળાશયો એવા છે કે જે 70થી 100 ટકા વચ્ચે ભરાયાં છે. 16 જળાશયો એવા છે કે જેમાં 50થી 70 ટકા જેટલો જળસંગ્રહ થયો છે. 25થી 50 ટકા વચ્ચે 14 જળાશયો જયારે 25 ટકાથી ઓછો જળસંગ્રહ હોય એવા 10 જળાશયો ભરાયાં હોવાની માહિતી જળસંપત્તિ વિભાગ તરફથી મળી છે.

ગુજરાતમાં વરસાદી પેટર્ન બદલાઈ

ઉપરોક્ત આંકડા જોતાં સ્પષ્ટ થાય છે કે સૌરાષ્ટ્ર અને કચ્છ ઝોનમાં વરસાદ વધુ થયો છે. તેનાથી ઉલટુ અત્યાર સુધીના વર્ષોમાં દક્ષિણ ગુજરાતમાં બારે મેઘ ખાંગા થતાં હતા, તેને બદલે ત્યાં 92 ટકા વરસાદ થયો છે, એટલે કે 100 ટકા વરસાદમાં પણ 8 ટકા વરસાદ ખૂટે છે. કચ્છમાં જે 221 ટકા વરસાદ થયો છે, તેમાં 25 ઓગસ્ટે છેલ્લા 24 કલાકમાં સરેરાશ વરસાદના 25 ટકા વરસાદ વરસ્યો છે. 26 વર્ષમાં પહેલી વાર એવું બન્યું છે કે કચ્છ પાણીપાણી થયું છે. તેવી જ રીતે સૌરાષ્ટ્ર પણ પાણીથી વંચિત રહેતું હતું, પણ કુદરતે કૃપા કરી છે કે સૌરાષ્ટ્રમાં 142 ટકા વરસાદ થયો છે. કચ્છ અને સૌરાષ્ટ્રમાં સામાન્ય રીતે ધીમી ધારે વરસાદ આવતો હતો, પણ આ વર્ષે વરસાદની પેર્ટન બદલાતા ધોધમાર વરસાદ આવ્યો છે.

ગુજરાતમાં વરસાદી પેટર્ન બદલાઈ

અરબી સમુદ્રમા સર્જાયેલી અપર એર સાયકલોનિકલ સર્કયુલેશન સીસ્ટમ ગુજરાત પર વધુ મહેરબાન રહી છે. પવન, વીજળીના કડાકાભડાકા સાથેનો વરસાદ જોઈને ખેડૂતો વધુ ખુશખુશાલ થયાં હતા. ભારે વરસાદને કારણે ચોમાસું કેટલાક પાકને નુકસાન થયું છે, પણ ડાંગર અને તે પછીના શિયાળુ પાક અને ઉનાળુ પાક ખૂબ જ સારા ઉતરશે.