અલ્પેશનું રાજીનામું હજુ સુધી મળ્યું નથીઃ અમિત ચાવડા

અમદાવાદઃ અલ્પેશ ઠાકોરે મોટા ઉપાડે પ્રેસ કોન્ફરન્સ યોજીને કોંગ્રેસના તમામ હોદ્દાઓ ઉપરથી રાજીનામું આપી દીધું હતું, પરંતુ કોંગ્રેસને હજી પણ અલ્પેશ ઠાકોરનો મોહ છૂટયો નથી અને અલ્પેશને મનાવવા માટેના પ્રયાસો ચાલી રહ્યા છે. કોંગ્રેસ પ્રભારી રાજીવ સાતવને પણ કોંગ્રેસ હાઇકમાન્ડે દિલ્હી બોલાવ્યાં છે. જ્યારે ગુજરાતમાં પણ કોંગ્રેસમાં એક જૂથ એવું છે, જે ઈચ્છી રહ્યું છે કે, અલ્પેશ કોંગ્રેસમાં રહે જ્યારે બીજું જૂથ અલ્પેશને રોકવા નથી માંગતું. અમિત ચાવડાએ કહ્યું કે, અલ્પેશનું રાજીનામું હજુ સુધી મળ્યું નથી.

અલ્પેશ ઠાકોર પોતાનો અહમ સંતોષવા માટે કોંગ્રેસને વારંવાર બ્લેકમેલ કરી રહ્યા છે અને કોંગ્રેસ છોડી દેવાની વારંવાર ચીમકી બાદ આખરે પોતાની માંગણીઓ ના સંતોષાતા તેમણે પ્રેસ કોન્ફરન્સ યોજીને રાજીનામું આપી દીધું હતું.

જોકે ગુજરાત કોંગ્રેસના પ્રમુખ અમિત ચાવડાએ અલ્પેશ ઠાકોરનો રાજીનામું પત્ર હજી સુધી મળ્યો નથી. તેવો ખુલાસો કર્યો હતો અને અલ્પેશ ઠાકોરના રાજીનામા અંગે પણ અલ્પેશ ઠાકોર પાસે ખુલાસો પણ માંગવામાં આવ્યો છે. જોકે અલ્પેશ ગઈકાલે જણાવ્યું હતું કે, મેં પત્ર મોકલી આપ્યો છે.