અમદાવાદઃ રાજ્યમાં ધીમે-ધીમે ચોમાસાનો માહોલ જામી રહ્યો છે. હવામાન વિભાગ દ્વારા પણ ભારે વરસાદની આગાહી કરવામાં આવી છે. રાજ્યમાં શનિવારે સાંજે 6 કલાક સુધી કુલ 59 તાલુકામાં વરસાદ નોંધાયો છે. જેમાં સૌથી વધુ 6 ઈંચ વરસાદ ગીર સોમનાથ જિલ્લાના કોડીનારમાં થયો છે. આ ઉપરાંત તાલાલામાં 2 ઇંચ, અમરેલીના જાફરાબાદ અને બાબરામાં 2 કલાકમાં 2 ઇંચથી વધુ અને સુરતના ઉમરપાડામાં પણ 2 ઇંચ જેટલો વરસાદ નોંધાયો છે.
શનિવારે સૌરાષ્ટ્રના અનેક જિલ્લામાં વરસાદી માહોલ જોવા મળ્યો હતો. જેમાં ગીર સોમનાથ જિલ્લામાં સૌથી વધુ વરસાદ પડ્યો છે. અહીં કોડીનારમાં 6 અને તાલાલામાં 2 ઇંચ વરસાદ થયો છે. આ ઉપરાંત અમરેલીના જાફરાબાદમાં સાંજે 4થી 6 વચ્ચે 3 ઇંચ અને બાબરામાં 2 ઇંચથી વધુ વરસાદ થયો છે. આ સાથે જ અમરેલીના વાડીયામાં પણ 2 ઇંચ જેટલો વરસાદ થયો છે, જ્યારે દેવભૂમિ દ્વારકા જિલ્લાના જામ-ખંભાળિયામાં પણ 1 ઇંચ વરસાદ થયો છે.
રાજ્યમાં અન્ય જગ્યાએ વરસાદની વાત કરવામાં આવે તો, સુરતના ઉમરપાડામાં ગત 2 કલાકમાં 2 ઇંચ વરસાદ થયો છે. આ ઉપરાંત નર્મદા જિલ્લાના દેડિયાપાડામાં પણ 2 ઇંચ કરતા વધુ વરસાદ થયો છે. આ સાથે જ ગાંધીનગરના દહેગામમાં 1.5 ઇંચ જેટલો વરસાદ થયો છે, જ્યારે ભરૂચના વાલિયામાં 2 ઇંચ અને ડાંગના આહવામાં 1 ઇંચથી વધુ વરસાદ નોંધાયો છે.
હવામાન વિભાગની આગાહી મુજબ અમદાવાદમાં આગામી કલાકોમાં ભારેથી અતિભારે વરસાદ આવશે.
