અમદાવાદઃ કોંગ્રેસ પ્રદેશ પ્રમુખે રાજીવ ગાંધી ભવન ખાતે પત્રકાર પરિષદ યોજી હતી. જેમાં તેમણે કહ્યું કે, ગુજરાતના નાયબ મુખ્યપ્રધાન નીતિન પટેલને રાજ્યના કોરોના દર્દીઓની વધી રહેલી સંખ્યાની ચિંતા નથી, પરંતુ રાજ્યની તિજોરી પર થયેલી અસરની ચિંતા વધારે છે. આ સાથે જ અમિત ચાવડાએ ગુજરાત સરકાર સામે શાબ્દિક પ્રહાર કરતા જણાવ્યું કે, નીતિન પટેલે લૉકડાઉનના કારણે રાજ્યની તિજોરી પર ભારે આર્થિક નુકસાન થયાનો દાવો કરે છે, તો સવાલ એ છે કે શું લૉકડાઉનમાં ગુજરાતના ગરીબ અને મધ્યમવર્ગના પરિવારોને નુકસાન થયું નથી? તેમનું બજેટ ખોરવાયું નથી? તેમનું આર્થિક ભારણ વધ્યું નથી? સરકારે ગરીબ અને મધ્યમ વર્ગને જે આર્થિક નુકસાન થયું છે તેનો અભ્યાસ કર્યો નથી? લૉકડાઉનના કારણે અનેક લોકોની નોકરી છૂટી ગઈ ધંધા-રોજગાર ઠપ્પ થઈ ગયા તો શું સરકારને તેમની કોઈની ચિંતા નથી?
અમિત ચાવડાએ વધુમાં જણાવ્યું કે, સરકારની આવકમાં ઘટાડો થયો, તો એનું ભારણ પ્રજા પર કેમ કરવામાં આવે છે. જો સરકારને પોતાની આવક વધારવી હોય, તો મુખ્યપ્રધાન માટે 200 કરોડનું જે વિમાન ખરીદવામાં આવ્યું છે, તેની ડીલ કેમ રદ કરવામાં આવતી નથી. આ ઉપરાંત 22 વર્ષમાં કરોડોની જમીન ઉદ્યોગપતિઓને મફતમાં આપી, ત્યારે કેમ સરકારી તિજોરી પર કોઈ અસર થઈ નહોતી.
કોંગ્રેસ અને ભાજપના શાસનમાં પેટ્રોલ અને ડીઝલના ભાવની સરખામણી કરતાં અમિત ચાવડાએ કહ્યું કે, યૂપીએ સરકાર વખતે આંતરરાષ્ટ્રીય બજારમાં ક્રુડઑઈલનો ભાવ 107 ડોલર પ્રતિ બેરલ હતો અને આજે 40 ડોલર પ્રતિ બેરલ છે. એટલે કે 66 ડોલરના ઘટાડા છતાં ગ્રાહકોને તેનો લાભ મળતો નથી.
કોંગ્રેસના શાસનમાં પેટ્રોલની કિંમત 71 રૂપિયા હતી, જ્યારે આજે 76 રૂપિયા છે. ડીઝલની કિંમત 55 રૂપિયા હતી, જ્યારે આજે 74.61 રૂપિયા છે. કોંગ્રેસના શાસનમાં પેટ્રોલ પર એક્સાઇઝ ડ્યુટી 9.20 રૂપિયા હતી. જે આજે ભાજપના શાસનમાં 33 રૂપિયા પ્રતિ લિટર છે. આ ઉપરાંત પેટ્રોલ પરની એક્સાઇઝ ડ્યુટીમાં 200 ટકાથી પણ વધારે, જ્યારે ડીઝલ પર 820 ટકા કરતાં વધારો થયો છે.
વધુમાં કોંગ્રેસ પ્રમુખે જણાવ્યું કે, આ સરકાર રાહત આપવામાં સમજતી નથી અને સસ્તા ક્રુડનો ફાયદો લોકોને મળતો નથી. આ સરકારે પ્રજાને લૂંટી સરકારી તિજોરીઓ ભરવાની નીતિ રાખી છે. જેથી સરકાર દ્વારા પેટ્રોલ અને ડીઝલના ભાવમાં થયેલા વધારાને લઇ કોંગ્રેસ બુધવારે રાષ્ટ્રવ્યાપી ધરણાં અને પ્રદર્શન કરશે.
