અમદાવાદઃ ફિલ્મ અભિનેતા સુશાંતસિંહ રાજપૂતના મૃત્યુ મામલે રાજકારણ ગરમાઈ રહ્યું છે. કંગના રનૌતે મુંબઈની સરખામણી POK સાથે કરતું નિવેદન આપ્યું હતું. આ મામલે સંજય રાઉતે કંગના રનૌતને ધમકી આપી હતી કે, મુંબઈમાં પગ મૂકીને તો બતાવે. આ મુદ્દે મીડિયાએ સંજય રાઉતને સવાલ પૂછ્યો ત્યારે સંજય રાઉતે મીડિયાના કેમેરા સામે જણાવ્યું કે, કંગનામાંં હિંમત હોય તો અમદાવાદને મીનિ પાકિસ્તાન કહી બતાવે?
આ બાબતે ભાજપ પ્રવક્તા ભરત પંડ્યાએ જણાવ્યું હતું કે, કંગના રાનૌત સાથેનાં ઝગડામાં ગુજરાતને અને અમદાવાદને ટાર્ગેટ કરીને બદનામ કરવાનાં બદઈરાદાથી સંજય રાઉતે ગુજરાતના અમદાવાદને મીનિ પાકિસ્તાન કહીને ગુજરાતનું ઘોર અપમાન કર્યું છે. તેમેણે ગુજરાતીઓ અને અમદાવાદીઓની માફી માંગવી જોઈએ.
ભરત પંડ્યાએ જણાવ્યું હતું કે, આ ગાંધીજી અને સરદાર પટેલનું ગુજરાત છે. સરદાર પટેલે 562 રજવાડાં એક કરીને ભારતની એકતા-અખંડીતતાને મજબૂત કરી છે. જૂનાગઢ અને હૈદરાબાદને પાકિસ્તાનમાં જતું અટકાવી કુનેહ અને શક્તિથી ભારતમાં જ રાખવામાં સફળ થયાં. કાશ્મીરમાં 370 હટાવીને ખરાં અર્થમાં ભારતનું અવિભાજય અંગ બને, તે સ્વપ્નને ગુજરાતથી દિલ્હી જનારા નરેન્દ્ર મોદી અને અમિત શાહે પૂર્ણ કર્યું છે.
ભરત પંડ્યાએ વધુમાં જણાવ્યું હતું કે, શિવસેનાએ ભારતની એકતા-અખંડીતતાનાં ઇતિહાસ અને વર્તમાનમાં ગુજરાતનાં યોગદાનને યાદ રાખવું જોઈએ. શિવસેના કોઈપણ ઘટનાક્રમમાં ઈર્ષા, દ્વેષ અને બદઈરાદાથી ગુજરાત, ગુજરાતી અને ગુજરાતનાં નેતાઓને ટાર્ગેટ કરીને બદનામ કરવાનું બંધ કરે.
