દિલ્હી: રેસલિંગ એસોસિએશન ઓફ ઈન્ડિયાના પૂર્વ પ્રમુખ બ્રિજભૂષણ શરણ સિંહ સામે મોરચો ખોલનારા કુસ્તીબાજો સાક્ષી મલિક, વિનેશ ફોગાટ અને બજરંગ પુનિયા આજે દિલ્હીના રાજઘાટ પર બપોરે 12:30 વાગ્યે ફરી એક પ્રેસ કોન્ફરન્સ કરવા જઈ રહ્યા છે. ત્રણેય રેસલર્સે ટ્વીટ કરીને આ જાણકારી આપી છે. જો કે આ પ્રેસ કોન્ફરન્સ કયા મુદ્દા પર કરવામાં આવશે તે ટ્વિટમાં જણાવવામાં આવ્યું નથી.
ટ્વિટર પર પોસ્ટ કરી: આ પ્રેસ કોન્ફરન્સ એવા સમયે થવા જઈ રહી છે જ્યારે કુસ્તી મહાસંઘની ચૂંટણી યોજાવાની છે. ભારતીય જનતા પાર્ટી (BJP)ના સાંસદ બ્રિજભૂષણ શરણ સિંહ વિરુદ્ધ દાખલ કરવામાં આવેલી ચાર્જશીટ પર સુનાવણી ચાલી રહી છે અને એશિયન ગેમ્સ માટે કેટલાક કુસ્તીબાજોને આપવામાં આવેલી છૂટનો મુદ્દો ગરમ છે. વિનેશ ફોગાટે ટ્વિટર પર પોસ્ટ કરીને લખ્યું- 'અમે કાલે બપોરે 12.30 વાગ્યે દિલ્હીના રાજઘાટ પર પ્રેસ કોન્ફરન્સ કરવાના છીએ.' તેની સાથે બજરંગ પુનિયા અને સાક્ષી મલિકે પણ ટ્વીટ કરીને આ વાતની જાહેરાત કરી છે.
મોટો ધડાકો થવાની શક્યતા: ગયા મહિને, વિનેશ ફોગાટ અને બજરંગ પુનિયાને એશિયન ગેમ્સમાં પ્રવેશ માટે એડહોક સમિતિ દ્વારા મુક્તિ આપવામાં આવી હતી, જેનો ઘણા કુસ્તીબાજોએ વિરોધ કર્યો હતો. સાંસદ બ્રિજભૂષણ શરણ સિંહ પર જાતીય સતામણીનો આરોપ લગાવીને કુસ્તીબાજોએ જંતર-મંતર પર એક મહિનાથી વધુ સમય સુધી ધરણા કર્યા હતા, ત્યાર બાદ આ મામલે તપાસ તેજ કરવામાં આવી હતી. હાલમાં આ મામલે ચાર્જશીટ દાખલ કરવામાં આવી છે અને સુનાવણી ચાલી રહી છે. હવે જોવાનું એ રહેશે કે રેસલર પ્રેસ કોન્ફરન્સમાં બ્રિજભૂષણ સિંહ સામે નવો મોરચો ખોલવા જઈ રહ્યો છે કે પછી કોઈ અન્ય મુદ્દે પોતાની વાત રાખશે.
