લખનઉ : પૂર્વ કોંગ્રેસ અધ્યક્ષ રાહુલ ગાંધીના નેતૃત્વમાં 14 જાન્યુઆરીથી શરૂ થનારી 'ભારત જોડો ન્યાય યાત્રા' ઉત્તર પ્રદેશમાં 11 દિવસ દરમિયાન 20 જિલ્લામાંથી પસાર થઈ કુલ 1,074 કિલોમીટરનું અંતર કાપશે. આ 20 જિલ્લાઓમાં કોંગ્રેસ પાર્ટીએ એવા તમામ જિલ્લાનો સમાવેશ કર્યો છે જેના પર કોંગ્રેસ પાર્ટી દ્વારા 2024 લોકસભા ચૂંટણીમાં ગઠબંધન કરવાનો દાવો કરવામાં આવે તેવી શક્યતા છે. આ યાત્રા બિહારમાંથી ચંદૌલી અને વારાણસી થઈને ઉત્તર પ્રદેશની સરહદમાં પ્રવેશશે. ત્યારપછી ઉત્તરપ્રદેશ પ્રવાસ દરમિયાન લગભગ 11 દિવસમાં 1074 કિલોમીટર ફરી યાત્રા આગ્રા થઈને રાજસ્થાનમાં પ્રવેશ કરશે. અખિલ ભારતીય કોંગ્રેસ સમિતિએ ગુરુવારના રોજ 'ભારત જોડો ન્યાય યાત્રા' નો સંપૂર્ણ રૂટ મેપ જાહેર કર્યો છે. આ યાત્રા યુપીમાં સૌથી વધુ દિવસ અને સૌથી લાંબી ચાલવાની છે.
યુપી જોડો યાત્રા : એવું માનવામાં આવે છે કે 22 જાન્યુઆરીએ અયોધ્યાના મંદિરમાં ભગવાન રામના પ્રાણ પ્રતિષ્ઠા બાદ ભારતીય જનતા પાર્ટી ચૂંટણીનો માહોલ બનાવવામાં વ્યસ્ત હશે. તો બીજી તરફ કોંગ્રેસ પણ ઉત્તર પ્રદેશમાં ભારત જોડો યાત્રાના માધ્યમથી રાજકીય વાતાવરણ ગરમ રાખવા માંગે છે. 14 જાન્યુઆરીથી કોંગ્રેસના પૂર્વ અધ્યક્ષ રાહુલ ગાંધીના નેતૃત્વમાં મણિપુરથી મુંબઈ સુધીની ભારત જોડો ન્યાય યાત્રાના રૂટને અંતિમ સ્વરૂપ આપવામાં આવતાં કોંગ્રેસીઓમાં નવી ઉર્જાનો સંચાર થયો છે. ઉત્તરપ્રદેશ કોંગ્રેસના નેતાઓનું કહેવું છે કે ભાજપ રામ મંદિરના સહારે પોતાના રાજકીય એજન્ડાને તેજ કરવામાં વ્યસ્ત છે. ત્યારે ભારત જોડો ન્યાય યાત્રાના પ્રથમ તબક્કાની સફળતાને ધ્યાનમાં રાખીને આ યાત્રાનો બીજો તબક્કો ઉત્તર પ્રદેશમાં યોજાશે. જેના કારણે ઉત્તરપ્રદેશમાં કોંગ્રેસની તરફેણમાં વાતાવરણ ઊભું કરવામાં પાર્ટીના નેતાઓને ઘણી મદદ મળશે.
પાર્ટીએ આ યાત્રાની તૈયારીઓ શરૂ કરી દીધી છે. 6 જાન્યુઆરીના રોજ પાર્ટીના નવા પ્રભારી અવિનાશ પાંડે પણ ઉત્તરપ્રદેશમાં તેમના આગમનની ઔપચારિક નોંધણી કરશે. આ દિવસથી કોંગ્રેસ પાર્ટી ઉત્તર પ્રદેશમાં 'ભારત જોડો ન્યાય યાત્રા'ને સફળ બનાવવાની રણનીતિ પર કામ કરવાનું શરૂ કરશે. -- અંશુ અવસ્થી (કોંગ્રેસ પ્રવક્તા)
ન્યાય યાત્રાનો UP પ્રવાસ : કોંગ્રેસની ભારત જોડો ન્યાય યાત્રા બિહારના સાસારામથી ચંદૌલી થઈને ઉત્તર પ્રદેશની સરહદમાં પ્રવેશશે. અહીંથી તે વારાણસી, પ્રયાગરાજ, અમેઠી, રાયબરેલી, લખનઉ થઈને સીતાપુર, શાહજહાંપુર, બરેલી પહોંચશે. આ યાત્રા બદાયૂં, અલીગઢ, હાથરસ, મથુરાથી આગ્રા થઈને રાજસ્થાનના ધોલપુર જિલ્લામાં પ્રવેશ કરશે. ઉત્તર પ્રદેશ કોંગ્રેસના નેતાઓએ કહ્યું કે, કોંગ્રેસે આ યાત્રામાં તેની પરંપરાગત બેઠક રાયબરેલી અને અમેઠી ઉપરાંત પ્રથમ વડાપ્રધાન જવાહરલાલ નહેરુની અલ્હાબાદને (ફુલપુર સંસદીય બેઠક) પણ સામેલ કરી છે, જે હવે પ્રયાગરાજમાં આવે છે. આ સિવાય કોંગ્રેસે વડાપ્રધાન નરેન્દ્ર મોદીની વારાણસી સીટનો યાત્રામાં સમાવેશ કરી મોટો રાજકીય દાવ રમવાનો પ્રયાસ કર્યો છે.
કોંગ્રેસનો રાજકીય દાવ : કોંગ્રેસના નેતાઓનું કહેવું છે કે યાત્રામાં સામેલ 20 જિલ્લાઓમાંથી મોટાભાગના જિલ્લાઓ પર કોંગ્રેસ 2024 લોકસભા ચૂંટણીમાં પોતાની દાવેદારી રજૂ કરી શકે છે. ખાસ કરીને કોંગ્રેસ પાર્ટી મધ્ય યુપીની રાયબરેલી, અમેઠી, પ્રયાગરાજ, લખીમપુર, સહારનપુર, બિજનૌર અને અલીગઢ જેવી સંસદીય બેઠકો પર નજર રાખી રહી છે. આ ઉપરાંત આ યાત્રાનો રૂટ પ્લાન નક્કી કરતી વખતે કોંગ્રેસે તેના INDIA ગઠબંધનના ભાગીદાર સમાજવાદી પાર્ટીના મજબૂત ગઢ એવા પૂર્વાંચલના જિલ્લાઓને સામેલ કર્યા નથી. આ યાત્રા ફક્ત ચંદૌલી અને બનારસના માધ્યમથી સમગ્ર પૂર્વાંચલને એત સંદેશ આપી આગળ વધશે.
પીએમની બેઠક પર પ્રચાર : ઉત્તર પ્રદેશ માટે અખિલ ભારતીય કોંગ્રેસ સમિતિ દ્વારા તૈયાર કરવામાં આવેલ ભારત જોડો ન્યાય યાત્રાના રૂટમાં યાત્રા ઉત્તર પ્રદેશના ચંદૌલીથી શરૂ થશે. આ પછી તે સીધી બાબા વિશ્વનાથના શહેરમાં પ્રવેશ કરશે. કોંગ્રેસ પાર્ટી બનારસમાં એક મોટો રોડ શો અને રેલી પણ કરી શકે છે, જેથી વડાપ્રધાનની સંસદીય બેઠક પરથી ઉત્તર પ્રદેશને સીધો સંદેશો આપી શકાય.
અમેઠી બેઠક પર નજર : ત્યારબાદ આ યાત્રા પ્રયાગરાજ પહોંચશે, જ્યાં ભારતના પ્રથમ વડાપ્રધાન જવાહરલાલ નેહરુની સંસદીય બેઠક થઈને યાત્રા રાહુલ ગાંધીની સંસદીય બેઠક અમેઠીમાં પ્રવેશ કરશે. 2019 માં રાહુલ ગાંધી આ બેઠક કેન્દ્રીય મંત્રી સ્મૃતિ ઈરાની સામે લગભગ 50 હજાર મતથી હારી ગયા હતા. કોંગ્રેસ 2024 માં ફરી આ સીટ જીતવા માંગે છે.
કોમી એકતા બતાવવાનો પ્રયાસ : આવી સ્થિતિમાં જ્યારે યાત્રા અમેઠી પહોંચશે ત્યારે અહીંયા કોંગ્રેસ શક્તિ પ્રદર્શન કરી 2024 માં આ સીટ ફરીથી જીતવા માંગશે. ત્યારબાદ આ યાત્રા રાયબરેલી, લખનઉ, સીતાપુર અને શાહજહાંપુર થઈને બરેલી પહોંચશે. બરેલીમાં કોંગ્રેસ પાર્ટી મુસ્લિમ સમુદાયને આકર્ષવા માટે દેવબંદના માધ્યમથી સમગ્ર પશ્ચિમ ઉત્તર પ્રદેશમાં મુસ્લિમ અને દલિત જનતાને કોંગ્રેસની તરફેણમાં કરવાનો પ્રયાસ કરશે.
