નવી દિલ્હીઃ ભારત અને ઓસ્ટ્રેલિયા વચ્ચે 1થી 5 માર્ચ દરમિયાન રમાનારી ત્રીજી ટેસ્ટ મેચનું સ્થળ બદલવાની ચર્ચા ચાલી રહી છે. આ મેચ હિમાચલ પ્રદેશ ક્રિકેટ એસોસિએશન સ્ટેડિયમ (HPCA) ખાતે રમાનાર છે. સ્ટેડિયમના આઉટફિલ્ડને લઈને અનેક સવાલો ઉઠી રહ્યા છે. 13 ફેબ્રુઆરીએ BCCIના ચીફ પિચ ક્યુરેટર આશિષ ભૌમિક મેદાનની મુલાકાત લેશે, ત્યારબાદ અંતિમ નિર્ણય લેવામાં આવશે.
બીજી વખત ગ્રાઉન્ડ વિઝિટ - આશિષ ભૌમિકે 3 ફેબ્રુઆરીએ પણ ગ્રાઉન્ડની મુલાકાત લીધી હતી. જે બાદ બીસીસીઆઈને રિપોર્ટ મોકલવામાં આવ્યો હતો. ધર્મશાલા સ્ટેડિયમના આઉટફિલ્ડમાં ઘાસ ઓછું ઊગ્યું છે. જેના કારણે મેચ અહીંથી ખસેડવાની ચર્ચા ચાલી રહી છે. પરંતુ HPCAનું માનવું છે કે મેચમાં હજુ સમય છે અને મેચ પહેલા મેદાન સંપૂર્ણપણે તૈયાર થઈ જશે.
વધુ પડતી રેતી અને ઠંડીના કારણે ઘાસ ન ઉગ્યું - હિમાચલ પ્રદેશમાં આ દિવસોમાં ઠંડી પડી રહી છે. જેના કારણે ઘાસ ઉગી શક્યું ન હતું. સ્ટેડિયમનું આઉટફિલ્ડ રેતી અને કોટનનું બનેલું છે. ટેસ્ટ મેચ રમવા માટે જમીન પર ઘટ્ટ ઘાસ હોવું જરૂરી છે. રેતીનું પ્રમાણ વધુ હોવાને કારણે ઘાસ સારી રીતે ઉગ્યું ન હતું, જેના કારણે મેદાનમાં ખેલાડીઓને ઈજા થવાનું જોખમ રહેલું છે. ભારતીય ટીમે છેલ્લે ફેબ્રુઆરી 2022માં HPCA સ્ટેડિયમમાં મેચ રમી હતી.
છ વર્ષ પહેલા થઈ હતી ટેસ્ટ મેચ - અત્યાર સુધી ધર્મશાલા સ્ટેડિયમમાં માત્ર એક જ ટેસ્ટ મેચ રમાઈ છે. આ મેચ ભારત અને ઓસ્ટ્રેલિયા વચ્ચે 25-28 માર્ચ, 2017ના રોજ રમાઈ હતી. આ મેચમાં ભારતે ઓસ્ટ્રેલિયાને આઠ વિકેટે હરાવ્યું હતું. ઓસ્ટ્રેલિયાના સ્ટીવ સ્મિથે આ મેદાન પર બે ઇનિંગ્સમાં 128 રન બનાવ્યા હતા. કેએલ રાહુલે બે ઇનિંગ્સમાં 111 રન બનાવ્યા હતા. આ મેદાન પર ઉમેશ યાદવે 98 રન આપીને 5-5 અને નાથન લિયોને 111 રન આપીને 5-5 વિકેટ લીધી છે.
