UNGAમાં પાકિસ્તાને કાશ્મીરનો રાગ આલાપ્યો, ભારતે કહ્યું - PoK પણ અમારૂ જ છે

સંયુક્ત રાષ્ટ્ર મહાસભામાં ભારતે પાકિસ્તાનના વડા પ્રધાન ઇમરાન ખાનના કાશ્મીરના રાગને યોગ્ય જવાબ આપ્યો છે. સંયુક્ત રાષ્ટ્રમાં ભારતીય રાજદ્વારી સ્નેહા દુબેએ જણાવ્યું હતું કે સમગ્ર જમ્મુ -કાશ્મીર અને લદ્દાખ હંમેશા ભારતનો અભિન્ન હિસ્સો રહ્યો છે અને રહેશે. તેમાં પાકિસ્તાનના કબજા હેઠળના ભાગોનો સમાવેશ થાય છે.

• ભારતીય રાજદ્વારી સ્નેહા દુબેએ જણાવ્યું કે જમ્મુ -કાશ્મીર અને લદ્દાખ ભારતનો અભિન્ન હિસ્સો છે
• પાકિસ્તાનનો ઇતિહાસ આતંકવાદીઓને પ્રોત્સાહન અને મદદ કરવાનો રહ્યો છે
• ઇમરાન ખાને કહ્યું અમેરિકાએ પાકિસ્તાનમાં 480 ડ્રોન હુમલા કર્યા

જિનીવા: પાકિસ્તાનના વડાપ્રધાન ઈમરાન ખાને શનિવારે વહેલી સવારે સંયુક્ત રાષ્ટ્ર મહાસભાને સંબોધિત કરી હતી. કાશ્મીર અને અફઘાનિસ્તાન પર પોતાના ભાષણને કેન્દ્રમાં રાખીને ઈમરાને આરોપ લગાવ્યો કે, ભારતે એકપક્ષીય પગલાં લઈને કાશ્મીર પર બળજબરીથી કબજો કર્યો છે. તે જ સમયે, ભારતે ઇમરાનના આ નિવેદનનો યોગ્ય જવાબ આપ્યો છે. સંયુક્ત રાષ્ટ્રમાં ભારતીય રાજદ્વારી સ્નેહા દુબેએ કહ્યું છે કે, સમગ્ર જમ્મુ -કાશ્મીર અને લદ્દાખ હંમેશા ભારતનો અભિન્ન ભાગ રહ્યો છે અને રહેશે. તેમાં પાકિસ્તાનના કબજા હેઠળના ભાગોનો સમાવેશ થાય છે. પાકિસ્તાને તેમને તાત્કાલિક મુક્ત કરવા જોઈએ.

આ પણ વાંચો : યુરોપીયન દેશોમાં ભારત-નિર્મિત કોવિશિલ્ડને માન્યતા નહીં, ઘાનાએ કરી આલોચના

પાકિસ્તાનનો ઇતિહાસ આતંકવાદીઓને પ્રોત્સાહન અને મદદ કરવાનો રહ્યો

દુબેએ કહ્યું કે સંયુક્ત રાષ્ટ્રના સભ્ય દેશો જાણે છે કે, પાકિસ્તાનનો ઇતિહાસ આતંકવાદીઓને પ્રોત્સાહન અને મદદ કરવાનો રહ્યો છે, આ પાકિસ્તાનની નીતિમાં સમાવિષ્ટ છે. આ પહેલી વાર નથી જ્યારે પાકિસ્તાને ભારત વિરુદ્ધ જૂઠ્ઠાણું ફેલાવવા અને વિશ્વનું ધ્યાન હટાવવા માટે યુએન પ્લેટફોર્મનો ઉપયોગ કર્યો હોય, જ્યારે આતંકવાદીઓ પાકિસ્તાનમાં મુક્તપણે ફરે છે. ઓસામા બિન લાદેનને પાકિસ્તાનમાં આશ્રય મળ્યો છે. આજે પણ પાકિસ્તાની નેતૃત્વ તેમને 'શહીદ' તરીકે મહિમા આપે છે. આ સિવાય, સમગ્ર વિશ્વમાં એવું માનવામાં આવે છે કે પાકિસ્તાન ખુલ્લેઆમ આતંકવાદીઓને ટેકો આપે છે અને તેમને હથિયારો પૂરા પાડે છે. દુબેએ કહ્યું કે સંયુક્ત રાષ્ટ્ર સુરક્ષા પરિષદ દ્વારા પ્રતિબંધિત મોટાભાગના આતંકવાદીઓને રાખવાનો પાકિસ્તાનનો નબળો રેકોર્ડ છે.

ઇમરાને કહ્યુ : RSS અને ભાજપ મુસ્લિમોને નિશાન બનાવી રહ્યા છે

આ પહેલા ઇમરાન ખાને કહ્યું હતું કે અમેરિકામાં 9/11 હુમલા બાદ વિશ્વની દક્ષિણ પંથીઓએ મુસ્લિમો પર હુમલા શરૂ કર્યા હતા. ભારતમાં તેની સૌથી વધુ અસર છે. ત્યાં RSS અને ભાજપ મુસ્લિમોને નિશાન બનાવી રહ્યા છે. મુસ્લિમો સાથે ભેદભાવ કરવામાં આવી રહ્યો છે. આ સિવાય ભારતે એકપક્ષીય પગલાં લઈને કાશ્મીર પર બળજબરીથી કબજો કર્યો છે. જોકે ઈમરાને કહ્યું કે અમે ભારતમાંથી શાંતિ ઈચ્છીએ છીએ, પરંતુ ભાજપ ત્યાં દબાવી રહ્યું છે. ભારતે કાશ્મીરમાં લીધેલા પગલાં પાછા લેવા પડશે. કાશ્મીરમાં તોડફોડ અને વસ્તી વિષયક પરિવર્તન અટકાવવું પડશે. ભારત લશ્કરી તાકાત વધારી રહ્યું છે. આ ક્ષેત્રનું સૈન્ય સંતુલન બગાડી રહ્યું છે. બંને દેશો પાસે પરમાણુ શસ્ત્રો છે. પાકિસ્તાનના વડાપ્રધાને અફઘાનિસ્તાનની સ્થિતિ પર કહ્યું કે ત્યાંની કથળતી પરિસ્થિતિ માટે પાકિસ્તાનને જવાબદાર ઠેરવવામાં આવી રહ્યું છે, પરંતુ અમે તેની સૌથી મોટી કિંમત ચૂકવી છે. 80 હજાર લોકો મૃત્યુ પામ્યા, 120 અબજ ડોલરનું નુકસાન થયું. અમે અમેરિકા માટે લડ્યા. 1983 માં રાષ્ટ્રપતિ રોનાલ્ડ રીગને મુજાહિદ્દીનને હીરો ગણાવ્યો હતો. જ્યારે સોવિયેત દળો ગયા ત્યારે અમેરિકાએ અફઘાનિસ્તાનને એકલું છોડી દીધું.

આ પણ વાંચો : બ્રિટિશ સાંસદોએ કાશ્મીર પર રજૂ કર્યો પ્રસ્તાવ, ભારતે કરી આકરી ટીકા

અમેરિકા પર ઈમરાન શું બોલ્યો

અમેરિકા પર ઈમરાને કહ્યું કે, અમારા પર પ્રતિબંધો લાદવામાં આવ્યા છે. બાદમાં એ જ મુજાહિદ્દીનો, જેમની અમે તાલીમ લીધી હતી, તેઓ અમારી વિરુદ્ધ થઈ ગયા.અમને કહેવામાં આવે છે કે તમે તાલિબાનને મદદ કરો છો. આજે પણ પાકિસ્તાનમાં 30 લાખ પશ્તુન રહે છે. તેને તાલિબાન પ્રત્યે સહાનુભૂતિ છે. અમેરિકાએ પાકિસ્તાનમાં 480 ડ્રોન હુમલા કર્યા. ઇમરાન ખાને કહ્યું કે અમારી પાસે મજબૂત સેના અને વિશ્વની શ્રેષ્ઠ ગુપ્તચર એજન્સી છે. વિશ્વએ પાકિસ્તાન વિશે પ્રશંસાના બે શબ્દો કહ્યા ન હતા, પરંતુ દરેક બાબત માટે અમને જવાબદાર ઠેરવવામાં આવ્યા હતા. તેમની પાસે અફઘાનિસ્તાનનો લશ્કરી ઉકેલ નથી. જ્યારે મેં બાઇડેન કહ્યું હતું કે, આજે વિચારવાની જરૂર છે કે ત્રણ લાખ અફઘાન સેના કેમ હારી? તાલિબાન કેમ આવ્યા?