નવી દિલ્હીઃ દિલ્હી યુનિવર્સિટીના ત્રણ વર્ષના બીએ કોર્સમાંથી ગાંધીજીનો પાઠ હટાવી દેવામાં આવ્યો છે. હવે તેમની જગ્યાએ વીર સાવરકરનો પાઠ ભણાવવામાં આવશે. હવે ડીયુમાં ભણતા વિદ્યાર્થીઓને વીર સાવરકરનું લખાણ ભણાવવામાં આવશે. ડીયુના પોલિટિકલ સાયન્સના અધ્યક્ષ અને પ્રોફેસર સંગીત કુમાર રાગીએ આ વાતની પુષ્ટિ કરતા કહ્યું કે, એકેડેમિક કાઉન્સિલની બેઠકમાં આ પ્રસ્તાવ પસાર કરવામાં આવ્યો છે.
ગાંધીજીની જગ્યાએ વીર સાવરકર: DUTAના જોઈન્ટ સેક્રેટરી અને એકેડેમિક કાઉન્સિલના સભ્ય આલોક પાંડેએ જણાવ્યું કે જ્યારે પોલિટિકલ સાયન્સ ઓનર્સમાં BA કરી રહેલા વિદ્યાર્થીઓ પાંચમા સેમેસ્ટરમાં જશે ત્યારે તેમને વીર સાવરકર વિશે વાંચવા મળશે. ડીયુના અન્ય શિક્ષકોનું કહેવું છે કે પહેલા ગાંધીજીને પાંચમા સેમેસ્ટરમાં ભણાવવામાં આવતા હતા, પરંતુ હવે તેમની જગ્યાએ વીર સાવરકરનો પાઠ ભણાવવામાં આવશે. જ્યારે ગાંધીજી સાતમા સેમેસ્ટરમાં ભણાવવામાં આવશે.
ડીયુમાં અંડરગ્રેજ્યુએટ કોર્સઃ દિલ્હી યુનિવર્સિટી વિદ્યાર્થીઓને ગ્રેજ્યુએશન માટે 3 વર્ષ અને 4 વર્ષનો કોર્સ પસંદ કરવાની તક આપી રહી છે. જો વિદ્યાર્થીઓ 3 વર્ષનો અંડરગ્રેજ્યુએટ કોર્સ પસંદ કરે તો તેઓ ગાંધી વિશે વાંચી શકશે નહીં. તેઓને વીર સાવરકર વિશે વાંચવા મળશે. બીજી તરફ, જો વિદ્યાર્થીઓ ચાર વર્ષનો અંડરગ્રેજ્યુએટ કોર્સ પસંદ કરશે, તો તેમને ગાંધી વાંચવા મળશે.
વીર સાવરકરના પાઠને લઈને વિરોધ: આલોક પાંડેએ કહ્યું કે એકેડેમિક કાઉન્સિલની બેઠકમાં વીર સાવરકરના પાઠને લઈને વિરોધ વ્યક્ત કરવામાં આવ્યો હતો. શિક્ષકોના એક વર્ગનું કહેવું છે કે વીર સાવરકરની ગાંધી સાથે સરખામણી કરવી યોગ્ય નથી. DU દ્વારા જારી કરાયેલા નિવેદનમાં ભીમ રાવ આંબેડકરને બને તેટલું ભણાવવા પર ભાર મૂકવામાં આવ્યો છે. કાર્યકારી પરિષદની બેઠકમાં વીર સાવરકરના પાઠ ભણાવવા અંગે અંતિમ મહોર મારવામાં આવશે. આ બેઠક જૂનના પ્રથમ સપ્તાહમાં યોજાશે.
કોણ છે વીર સાવરકરઃ વીર સાવરકરનો જન્મ 28 મે 1883ના રોજ થયો હતો. તેઓ સ્વતંત્રતા સેનાની રાષ્ટ્રવાદી નેતા તરીકે જાણીતા છે. હિંદુત્વનો વિકાસ કરવાનો શ્રેય તેમને જાય છે. વકીલ હોવાની સાથે તેઓ એક સારા કવિ, નાટ્યકાર અને જાણકાર લેખક પણ રહ્યા છે.
