કોરોનાના વધતા સંક્રમણના કારણે CBSEની ધોરણ 10ની પરીક્ષાઓ રદ, ધોરણ-12ની મોકૂફ રખાઇ

કોરોના વાઇરસના કહેરની વચ્ચે CBSE(Central Board of Secondary Education)ની પરીક્ષાઓને લઈને મોટો નિર્ણય લેવામાં આવ્યો છે. CBSE બોર્ડની ધોરણ 12ની પરીક્ષાઓ મોકૂફ રાખવામાં આવી છે, જ્યારે ધોરણ-10ની પરીક્ષાઓ રદ કરવામાં આવી છે.

• CBSEની પરીક્ષાઓને લઈને મોટો નિર્ણય લેવામાં આવ્યો
• ધોરણ 10ની પરીક્ષાઓ રદ કરવામાં આવી
• બુધવારે વડાપ્રધાન મોદીના નેતૃત્વ હેઠળ યોજાઇ બેઠક

નવી દિલ્હી: દેશભરમાં કોરોના વાઇરસનો કહેર વધી રહ્યો છે, કોરોના કેસોને ધ્યાનમાં રાખીને કેન્દ્ર સરકારે માધ્યમિક શિક્ષણ બોર્ડ (CBSE) ધોરણ-10ની પરીક્ષા રદ કરી છે જ્યારે ધોરણ-12ની પરીક્ષા મોકૂફ રાખવાનો નિર્ણય કર્યો છે. બુધવારે વડાપ્રધાન નરેન્દ્ર મોદીના નેતૃત્વ હેઠળ અને કેન્દ્રીય શિક્ષણપ્રધાન રમેશ પોખરિયાલ નિશાંક, કેન્દ્રીય શિક્ષણ સચિવ અને અન્ય ઉચ્ચ અધિકારીઓની હાજરીમાં મળેલી બેઠકમાં આ નિર્ણય લેવામાં આવ્યો હતો. બેઠક બાદ પરીક્ષાઓ અંગે લેવામાં આવેલા નિર્ણય વિષેની માહિતી આપવામાં આવી હતી.

આ પણ વાંચોઃ CBSE બોર્ડની પરીક્ષાને લઈને વડાપ્રધાન મોદીએ બેઠક બોલાવી, શિક્ષણ પ્રધાન પણ રહેશે હાજર

બોર્ડ 1 જૂને પરિસ્થિતિની સમીક્ષા કરશે

બોર્ડ દ્વારા તૈયાર કરાયેલા માપદંડના આધારે ધોરણ-10ના પરિણામો જાહેર કરવામાં આવશે. ધોરણ-12ની પરીક્ષાઓ બાદમાં લેવામાં આવશે અને બોર્ડ 1 જૂને પરિસ્થિતિની સમીક્ષા કરશે. વડાપ્રધાન મોદી સાથેની બેઠકના સમાપન બાદ શિક્ષણ પ્રધાન રમેશ પોખરિયાલ નિશાંકે પરીક્ષાઓ અંગે જાહેરાત કરી હતી.

ધોરણ-12ના વિદ્યાર્થીઓ માટે આ નિર્ણય છે

આદેશ મુજબ 4 મેથી 14 જૂન સુધી નિર્ધારિત ધોરણ 12ની પરીક્ષાઓ રદ કરવામાં આવી છે. 1 જૂનના રોજ બીજી બેઠક મળશે, જેમાં તે પરિસ્થિતિને ધ્યાનમાં રાખીને નિર્ણય લેવામાં આવશે. જો પરીક્ષાઓ લેવામાં આવશે તો વિદ્યાર્થીઓને 15 દિવસ અગાઉથી તેની જાણ કરવામાં આવશે.

આ પણ વાંચોઃ અરવિંદ કેજરીવાલે CBSE બોર્ડની પરીક્ષા મુલતવી રાખવા રજૂઆત કરી

ધોરણ-10ના વિદ્યાર્થીઓ માટે આ નિર્ણય

શિક્ષણપ્રધાન રમેશ પોખરિયાલે જણાવ્યું હતું કે, ધોરણ-10ના વિદ્યાર્થીઓને આંતરિક આકારણીના આધારે આગળના વર્ગમાં મોકલવામાં આવશે. જો કોઈ વિદ્યાર્થી મૂલ્યાંકનથી સંતુષ્ટ ન હોય તો તે પરિસ્થિતિ સામાન્ય થયા બાદ પરીક્ષા આપી શકે છે.

કેજરીવાલે માંગ કરી છે

આ પહેલા દિલ્હીના મુખ્યપ્રધાન અરવિંદ કેજરીવાલે મંગળવારે કેન્દ્રને સેન્ટ્રલ બોર્ડ ઓફ સેકન્ડરી એજ્યુકેશન (CBSE)ની પરીક્ષાઓ રદ કરવા વિનંતી કરી હતી. તેમણે જણાવ્યુ હતું કે, લગભગ છ લાખ વિદ્યાર્થીઓ અને એક લાખ શિક્ષકો હશે જે પરીક્ષા કેન્દ્રોમાં આવશે અને આની સાથે આ કેન્દ્રોને નવા કોવિડ-19 હોટસ્પોટમાં પરિવર્તિત કરી શકશે. દિલ્હીમાં રોગચાળાની આ બીજી લહેર ખૂબ ગંભીર છે અને તેની અસર યુવાનો અને બાળકોને પણ થઈ રહી છે. તેઓ કેન્દ્રને CBSEની પરીક્ષા રદ કરવા વિનંતી કરશે તેવુ તેમણે જણાવ્યું હતુ.