રાંચીઃ ધોનીની પુત્રી વિશે અભદ્ર ટિપ્પણી મામલે પોલીસને મોટી સફળતા મળી છે. પોલીસે IP-Address દ્વારા આરોપીને શોધી કાઢ્યો છે. આરોપીની ધરપકડ માટે રાંચી પોલીસના 2 સભ્યોની ટીમ રાજ્યના કચ્છ જિલ્લામાં સોમવારે સાંજે પહોંચશે અને ત્યાં પહોંચ્યા બાદ આરોપીની તપાસ હાથ ધરવામાં આવશે.
જો કે, આરોપી સગીર છે, જેથી મેડિકલ ટીમ દ્વારા તેનો મેડિકલ ટેસ્ટ કરવામાં આવશે. ત્યારબાદ તેને કોર્ટમાં રજૂ કરવામાં આવશે.
ઉલ્લેખનિય છે કે, તાજેતરમાં ચેન્નાઈ સુપર કિંગ્સ અને કોલકાતા નાઈટ રાઇડર્સ વચ્ચે આઈપીએલની મેચ રમાઈ હતી. આ મેચમાં કોલકાતા નાઈટ રાઇડર્સે ટૉસ જીતીને પ્રથમ બેટિંગ કરતા 20 ઓવરમાં 167 રન બનાવ્યા હતા. જેના જવાબમાં ચેન્નાઈ સુપર કિંગ્સ 157 રન બનાવી શકી હતી અને કોલકાતા નાઈટ રાઇડર્સે 10 રનથી આ મેચ જીત્યો હતો. જેથી નારાજ આ સગીરે સોશિયલ મીડિયા પર કેપ્ટન મહેન્દ્વસિંહ ધોનીને ધમકી આપી હતી અને તેની પુત્રી વિશે અભદ્ર ટિપ્પણી કરી હતી.
આ પણ વાંચોઃ મહેન્દ્રસિંહ ધોનીની પુત્રી પર બીભત્સ કોમેન્ટ કરનારો ઇસમ ઝડપાયો, કચ્છના 17 વર્ષીય સગીરનું કારસ્તાન
મહત્વનું છે, કે ક્રિકેટર મહેન્દ્રસિંહ ધોનીના સોશિયલ મિડિયા અકાઉન્ટમાં ધોનીની પુત્રી પર બીભત્સ કોમેન્ટ કરનારા એક 17 વર્ષીય સગીરની તાજેતરમાં કચ્છ પોલીસે અટકાયત કરી છે. ત્યારે ક્રિકેટ જગતમાં ભારે ચકચાર જગાવનારા આ કિસ્સાની વધુ તપાસ માટે રાંચી પોલીસ સોમવારે કચ્છ આવી રહી છે. જ્યા પોલીસ આરોપીની તપાસ હાથ ધરશે.
