નવી દિલ્હીઃ કેન્દ્ર સરકાર દ્વારા લાવવામાં આવેલા 3 કૃષિ બિલનો વિપક્ષ દેશભરમાં વિરોધ કરી રહ્યું છે. વડાપ્રધાન નરેન્દ્ર મોદીએ વિપક્ષના આ વિરોધને લઈને પોતાની પ્રતિક્રિયા આપી હતી. વડાપ્રધાને મંગળવારે વિપક્ષને આડેહાથે લેતા કહ્યું કે, જે લોકો કૃષિ બિલનો વિરોધ કરી રહ્યા છે તે તમામ ખેડૂતોનું અપમાન કરી રહ્યા છે. વડાપ્રધાને વધુમાં કહ્યું કે, દેશના ખેડૂતો, શ્રમિકો અને દેશના સ્વાસ્થ્ય સાથે જોડાયેલા સુધારા કરવામાં આવે છે. આ સુધારાથી દેશનો ખેડૂત, શ્રમિક, યુવાન, મહિલાઓ વધુ સક્ષમ થશે. જોકે આજે દેશ જોઈ રહ્યો છે કે, કેટલાક લોકો કેવો વિરોધ કરી રહ્યા છે.
જોકે કૃષિ બિલનો વિરોધ કરી રહેલા તમામ લોકો ખરેખર તો ખેડૂતોનું અપમાન કરી રહ્યા છે. નમામિ ગંગે મિશન અંતર્ગત મોટી પરિયોજનાના ઉદ્ઘાટન સમયે વડાપ્રધાન મોદીએ વિપક્ષ પર આકરા પ્રહારો કર્યા હતા. જ્યારે કેન્દ્ર સરકાર ખેડૂતોને પોતાના અધિકાર આપી રહી છે ત્યારે વિપક્ષ તેનો વિરોધ કરી રહ્યું છે. વિપક્ષ ઈચ્છે છે કે, ખેડૂત ઓપન માર્કેટમાં પોતાના અનાજનું વેચાણ ન કરે. જે સામાન, સાધનોની ખેડૂતો પૂજા કરે છે તેને આ લોકો આગ ચાંપી રહ્યા છે. આથી ખેડૂતોનું અપમાન થઈ રહ્યું છે.
