નવી દિલ્હી: વડાપ્રધાન મોદીએ કહ્યું, 'મને વિશ્વાસ છે કે વૈશ્વિક પુનરુત્થાનની કથામાં ભારતની અગ્રણી ભૂમિકા રહેશે.' પીએમ મોદીએ કહ્યું કે ભારત લોકોના સ્વાસ્થ્ય અને અર્થવ્યવસ્થા પર વધુ ધ્યાન કેન્દ્રિત કરીને વૈશ્વિક રોગચાળા સાથે મજબૂત યુદ્ધ લડી રહ્યું છે. જ્યારે ભારત પુનરુત્થાનની વાત કરે છે, ત્યારે તેની દેખભાળ સાથે પુનરુત્થાન, કરુણા સાથે પુનરુત્થાન, પર્યાવરણ અને અર્થતંત્ર બંને માટે કાયમી પુનરુત્થાનની વાત કરે છે.
તેમણે કહ્યું, 'છેલ્લાં 6 વર્ષમાં ભારતે કુલ આર્થિક સમાવેશ, રેકોર્ડ હાઉસિંગ અને માળખાકીય વિકાસ, ધંધામાં સરળતા, જીએસટી સહિતના સાહસિક ટેક્સ સુધારણા, વિશ્વની સૌથી મોટી હેલ્થકેર પહેલ - આયુષ્માન ભારત જેવા ક્ષેત્રોમાં મોટો ફાયદો કર્યો છે.
વડાપ્રધાન કાર્યાલય દ્વારા જાહેર કરાયેલા એક નિવેદનમાં કહેવામાં આવ્યું છે કે ત્રણ દિવસીય કાર્યક્રમની થીમ 'બી ધ રિવાઇવલ: ઈન્ડિયા એન્ડ બેટર ન્યૂ વર્લ્ડ' છે. જેમાં 30 દેશોના 5000 વૈશ્વિક સહભાગીઓને, 75 સત્રોમાં 250 ગ્લોબલ સ્પીકર્સ સંબોધન કરશે.
નિવેદનમાં કહેવામાં આવ્યું છે કે આ કાર્યક્રમમાં ભાગ લેનારા અન્ય વક્તાઓમાં વિદેશ પ્રધાન ડૉ જયશંકર, રેલ્વે, વાણિજ્ય અને ઉદ્યોગ પ્રધાન પિયુષ ગોયલ, જમ્મુ-કાશ્મીરના લેફ્ટનન્ટ ગવર્નર જી.સી. મુર્મુ, ઇશા ફાઉન્ડેશનના સ્થાપક સદગુરુ અને આધ્યાત્મિક નેતા શ્રી શ્રી રવિશંકર શામેલ છે.
