નવી દિલ્હી: રાજધાની દિલ્હીમાં ખાનગી દારૂની દુકાનો પણ ખુલશે. દિલ્હી સરકારના આબકારી ખાતાએ આદેશ આપ્યો છે કે, એલ-7 અને એલ -9 કેટેગરીની 66 ખાનગી દારૂની દુકાનો ખોલવામાં આવશે અને અહીં દારૂ વેચી શકાશે.
સરકાર દ્વારા જાહેર કરાયેલા આદેશમાં તે તમામ 66 દુકાનોની સૂચિ આપવામાં આવી છે અને તેમના માટે કેટલીક મહત્વપૂર્ણ સૂચનાઓ પણ જાહેર કરવામાં આવી છે.
ઓડ ઈવેન લાગુ કરાશે...
આ આદેશમાં જણાવાયું છે કે, 23 મી મે, 2020 સુધી ખાનગી દારૂની દુકાનો ઓડ-ઇવનને આધારે સવારે 9 થી સાંજ 6:30 સુધી ખોલવામાં આવી શકે છે. આ ઉપરાંત, ઓર્ડરમાં કહેવામાં આવ્યું છે કે, આ તમામ દુકાનોને દૈનિક વેચાણ માટે સરકારને 70 ટકા વિશેષ કોરોના ફી પણ ચૂકવવી પડશે. આ તમામ દુકાનદારોએ દુકાનની આગળ સામાજિક અંતરનું કડક પાલન કરવું પડશે.
આ આદેશમાં એમ પણ કહેવામાં આવ્યું છે કે, જો આવનારા દિવસોમાં આમાંથી કોઈ પણ દુકાન કન્ટેનર વિસ્તારમાં મળી આવે તો તે તાત્કાલિક બંધ થઈ જશે. નોંધનીય છે કે, 4 મેના રોજ દિલ્હી સરકારે દિલ્હીમાં દારૂની દુકાનો ખોલવાનો નિર્ણય કર્યો હતો. તે સમયે માત્ર દારૂની સરકારી દુકાનો જ ખોલવામાં આવી હતી.
પહેલા જ દિવસે, દુકાનો પર ભારે ભીડને ધ્યાનમાં રાખીને, તે જ રાત્રે સરકારે દિલ્હીમાં દારૂ પર 70% વિશેષ કોરોના ફી લાદવાનો નિર્ણય લીધો હતો.
