છત્તીસગઢઃ CRPFના જવાનોએ ફરી એકવાર ફરજનું ઉદાહરણ પૂરું પાડ્યું છે. ઈંજારમ નજીક રસ્તા પર પૂરનું પાણી આવ્યા બાદ મૃતદેહ સાથે પરત ફરી રહેલા પરિવારના સભ્યો ઘણા કલાકો સુધી અટવાયેલા હતા. એક તરફ પોતાના સ્વજનને ગુમાવવાનું દુઃખ તો બીજી બાજુ સતત વધી રહેલા પાણીના સ્તરને કારણે પરિવારના સભ્યોની હાલત ખરાબ હતી. પરંતુ સીઆરપીએફ જવાનો ભગવાન બનીને ઘટના સ્થળે પહોંચ્યા હતા. સૈનિકોએ મૃતદેહને ખભા પર રાખ્યો હતો અને મૃતકના પરિવારને નદી પાર કરાવવામાં મદદ કરી હતી. પરિવારે સીઆરપીએફ જવાનોનો દિલથી આભાર માન્યો હતો.
મળતી માહિતી મુજબ, શનિવારે સોહનસિંહ નામના ડીઆરજી જવાનને તબિયત ખરાબ હોવાને કારણે જિલ્લા હોસ્પિટલમાં દાખલ કરવામાં આવ્યા હતા. સારવાર દરમિયાન જવાનનું મોત નીપજ્યું હતું. આ જવાન જિલ્લાના ભીજજી ગામનો રહેવાસી હતા. જે કોન્ટા બેઝ કેમ્પમાં કામ કરતા હતા. સંબંધીઓના જણાવ્યા મુજબ, જવાન સ્વતંત્રતા દિવસની ફરજ બજાવ્યા બાદ સાંજે ઘરે પહોંચ્યા હતા. આ સમય દરમિયાન તેમની તબિયત અચાનક લથડી ગઈ હતી. તેમને તાત્કાલિક જિલ્લા હોસ્પિટલમાં ખસેડવામાં આવ્યા હતા.
