બંગાળમાં હિંસા ચરમસીમાએ, ભાજપના 300થી વધુ કાર્યકરોની હત્યા થઇ: અમિત શાહ

બીરભૂમમાં રોડ શો બાદ પ્રેસ કોન્ફરન્સ યોજી કેન્દ્રીય ગૃહપ્રધાન અમિત શાહે પશ્ચિમ બંગાળની મમતા બેનર્જી સરકાર પર ભ્રષ્ટાચારનો આરોપ લગાવ્યો હતો. તેમણે કહ્યું હતું કે મમતા સરકારમાં ભ્રષ્ટાચાર થયો છે, આથી જ તેઓ સીએજી ઓડિટથી ભાગી રહ્યા છે.

• ભાજપ અધ્યક્ષ પર હુમલાની જવાબદારી TMC સરકારની: અમિત શાહ
• આગામી ચૂંટણીઓમાં અમે આ સરકારને હરાવીને બતાવીશું: અમિત શાહ

પશ્ચિમ બંગાળ: કેન્દ્રીય ગૃહપ્રધાન અમિત શાહે પ્રેસ કોન્ફરન્સમાં મમતા બેનર્જી સરકાર પર આકરા પ્રહારો કર્યા હતા. તેમણે જણાવ્યું હતું કે બંગાળમાં થયેલા ભ્રષ્ટાચારની બધાને જાણ છે પરંતુ સરકાર પોતાના નેતાઓને બચાવી રહી છે.

અમિત શાહે કહ્યું કે, ભારતના સૌથી મોટા પક્ષ ભાજપના રાષ્ટ્રીય અધ્યક્ષ પર હુમલો એ બંગાળની અંદરની લોકશાહી વ્યવસ્થા પર હુમલો છે. તેની સંપૂર્ણ જવાબદારી તૃણમૂલ કોંગ્રેસ સરકાર અને તૃણમૂલ કોંગ્રેસના કાર્યકરોની છે.

તેમણે વધુમાં જણાવ્યું હતું કે, "હું આજે આ પ્રેસ કોન્ફરન્સના માધ્યમથી તૃણમૂલ કોંગ્રેસના તમામ નેતાઓને કહેવા માંગુ છું કે તમારે આ ગેરસમજણ હેઠળ ન રહેવું જોઈએ કે આવા હુમલાથી ભાજપની ગતિ અટકશે, ભાજપ કાર્યકરો અથવા ભાજપ પીછેહઠ કરશે. આ પ્રકારની હિંસાનું વાતાવરણ જેટલું ઉભું કરીએ તેટલું ભાજપ બંગાળમાં પોતાની જાતને મજબૂત કરવા સખત મહેનત કરશે."

બંગાળમાં રાજકીય હિંસા ચરમસીમાએ

કેન્દ્રીય ગૃહપ્રધાને કહ્યું હતું કે ભાજપના કાર્યકરોએ નિર્ણય લીધો છે કે અમે હિંસાને લોકશાહીની રીતોથી જવાબ આપીશું. બંગાળની આગામી ચૂંટણીઓમાં અમે આ સરકારને હરાવીને બતાવીશું.

અમિત શાહે કહ્યું કે બંગાળમાં રાજકીય હિંસા ચરમસીમાએ છે. ભાજપના 300 થી વધુ કાર્યકરોની હત્યા કરવામાં આવી છે. ભાજપના કાર્યકરોની હત્યાની તપાસમાં એક ઇંચ પણ પ્રગતિ દેખાતી નથી.