નેશનલ ડેમોક્રેટિક ફ્રન્ટ ઑફ બોડોલેન્ડના ઉદ્દામવાદીઓ હાલમાં જ શરણે આવ્યા છે અને તે સિવાયના ગેરીલાઓએ ગુરુવારે પોતાના શસ્ત્રો સમર્પિત કર્યા હતા. આસામ સરકારને પોતાના શસ્ત્રો સોંપી દઈને તેઓ ભારતીય બંધારણને વફાદાર લેવાના શપથ લેશે. આવા 1,500-2,000 બોડો યુવાનોને ફેબ્રુઆરીના અંત સુધીમાં થાળે પાડવાના છે.
“યુએન ધારાધોરણો તથા રાષ્ટ્રીય નીતિઓ પ્રમાણે ભારત સરકારે બોડો રેજિમેન્ટની રચના કરવા માટે અક્ષમતા દર્શાવી હતી. તેથી અમારા યુવાનોએ પોતાના લક્ષ્ય માટે લડત આપીને ભોગ આપ્યો હતો, તેમને હવે સરકારી નોકરીઓ કે, વ્યવસાય માટે મદદ કરવામાં આવશે. તે માટે ભરતી મેળા કરવામાં આવશે,” એમ NDFBના મહામંત્રી ગોબિન્દ બસુમાતરીએ ઈટીવી ભારતને ફોન પર જણાવ્યું હતું.
સોમવારે કેન્દ્ર તથા આસામ સરકાર અને બોડો જૂથો સાથે સોમવારે કરાર થયા, તેમાં સહી કરનારામાં બસુમાતરી પણ હતા. NDFB, ઑલ બોડો સ્ટુડન્ટ્સ યુનિયન (ABSU) અને યુનાઇટેડ બોડો પિપલ્સ ઓર્ગેનાઇઝેશન (UBPO) સાથે સમજૂતિ કરાર કરાયા છે.
અગાઉ કેટલાક નાગા બળવાખોરોને બીએસએફ, અર્ધલશ્કરી દળો વગેરેમાં ભરતી કરવાનું પૂર્વ ઉદાહરણ ઉપલબ્ધ પણ છે.
દાયકાથી આ યુવાનો સરકાર સામે લડી રહ્યા હતા, તે જ હવે સરકારી તંત્રમાં જોડાય તે રીતે એક સમસ્યાનો ઉકેલ આવશે. 80ના દાયકામાં આસામના પ્રાદેશિક રાજકીય પરિબળો સામે દબાણ માટે ગુપ્તચર એજન્સીઓએ જ બોડો યુવાનોને શસ્ત્રોની તાલીમ આપીને તૈયાર કર્યા હતા તેવા આક્ષેપો થતા રહ્યા છે.
બોડો જૂથો સાથે કરવામાં આવેલા સમજૂતિ કરારમાં ભૂતપૂર્વ ઉદ્દામવાદીઓને થાળે પાડવાની જોગવાઈ પણ છે.
“ફિટ હોય અને લાયક હોય તેમને અર્ધલશ્કરી દળો તથા સેનામાં ખાલી જગ્યા હોય ત્યાં ભરતી કરવામાં આવશે. આ માટેની પ્રક્રિયા ઝડપથી શરૂ થશે એવી અમને આશા છે,” એમ બસુમાતરીએ જણાવ્યું હતું.
મોટી ઉંમરને સલામતી દળોમાં જોડાઈ શકે તેમ ના હોય તેમને વ્યવસાય કરવા માટે સહાય કરવામાં આવશે. તે માટે તાલીમ કેન્દ્રો પણ ખોલવામાં આવશે. ભૂંડ અને મરઘા ઉછેર અને ખેતીકામની તાલીમ આપવામાં આવશે.
બસુમાતરીએ વધુમાં જણાવ્યું હતું કે સમજૂતિ થઈ ગઈ છે તે પછી હવે અલગ રાજ્યની માગણી કરવાનો કોઈ અર્થ રહેતો નથી.
“અમને જે ખાતરી આપવામાં આવે છે તેનાથી અમે સંતુષ્ટ છીએ. નવી વ્યવસ્થા અલગ રાજ્ય મળવા જેવી જ છે. સરકારે અમારા રાજકીય, આર્થિક અને સાંસ્કૃતિક અધિકારોની રક્ષાની ખાતરી આપી છે. અમે આ કરારને નાગરિક તરીકે ફરીથી રાબેતા મુજબનું જીવન જીવી શકીએ તેની તક સમાન ગણીએ છીએ,” એમ NDFBના મહામંત્રીએ વધુમાં જણાવ્યું હતું.
સંજીબ કુમાર બરુઆ, નવી દિલ્હી
