મુંબઈઃ મહારાષ્ટ્રમાં કોરોના વાઇરસના કેસમાં સતત વધારો થઇ રહ્યો છે. મંગળવારે રાજ્યમાં કોરોના વાઇરસના 5,134 નવા કેસ નોંધાયા હતા. ત્યારે 3,296 લોકો સ્વસ્થ્ય પણ થયા છે. જેથી તેમને હોસ્પિટલમાંથી રજા આપવામાં આવી હતી. જ્યારે 224 લોકો આ રોગથી મૃત્યુ પામ્યા હતા. નવા દર્દીઓના નોંધણી બાદ રાજ્યમાં અત્યાર સુધીમાં આવેલા દર્દીઓની કુલ સંખ્યા વધીને 2,17,121 થઈ ગઈ છે.
મહારાષ્ટ્રમાં 1,18,558 લોકો સાજા થયા છે. 89,294 હજુ પણ સક્રિય કેસ છે, જ્યારે સમગ્ર રાજ્યમાં 9,250 લોકોના મોત નીપજ્યાં છે. જો કે, મગંળવારે મુંબઈના ધારાવી તરફથી એક સારા સમાચાર આવ્યા છે. ધારાવીમાં મંગળવારે કોરોના વાઇરસનો માત્ર એક કેસ મળ્યો હતો. અહીં સંક્રમિત લોકોની સંખ્યા 2,335 પર પહોંચી ગઈ છે.
મહારાષ્ટ્રના મુખ્યપ્રધાન ઉદ્ધવ ઠાકરેએ મંગળવારે મુલુંડ, દહિસર, મહાલક્ષ્મી રેસકોર્સ અને બીકેસીની પ્રાદેશિક હોસ્પિટલો લોકોની સેવા માટે સમર્પિત કરી હતી. આ નવી હોસ્પિટલોમાં કોવિડ-19 ના દર્દીઓ માટે 3250 બેડની સુવિધા કરવામાં આવી છે. મુખ્યપ્રધાને ટ્વિટ કર્યું હતું કે, પ્રધાન અસલમ શેખ અને આદિત્ય ઠાકરે પણ ઓનલાઇન કાર્યક્રમમાં હાજર રહ્યા હતા.
મહાલક્ષ્મી રેસકોર્સમાં 700 બેડનું આરોગ્ય કેન્દ્ર ખોલવામાં આવ્યું છે. જ્યારે બાંદ્રા કુર્લા સંકુલમાં 112 આઇસીયુ બેડ આપવામાં આવ્યા છે. આ તમામ બેડ મુંબઈ મેટ્રોપોલિટન રિજન ડેવલપમેન્ટ ઓથોરિટી દ્વારા તૈયાર કરવામાં આવી છે.
