પટિયાલા હાઉસ કોર્ટમાં 13 પોપટને કરાયા રજુ, જાણો વિગતે

નવી દિલ્હી: રાજધાનીની પટિયાલા હાઉસ કોર્ટમાં બુધવારે એક અનોખો કેસ સુનાવણી માટે આવ્યો હતો. આ કેસની સુનાવણી દરમિયાન 13 પોપટને રજુ કરવામાં આવ્યા હતા. જેને કસ્ટમ વિભાગે ઈન્દિરા ગાંધી આંતરરાષ્ટ્રીય હવાઈ મથકથી એક ઉજ્બેકિસ્તાનના નાગરિક પાસેથી પકડ્યા હતા.

ઉજ્બેક નાગરિક આ પોપટને ભારતથી ઉજ્બેકિસ્તાન લઈ જઈ રહ્યો હતો. આ શખ્સ પોપટને બુટના ખોખામાં રાખી એરપોર્ટ ઓથોરિટીને છેતરવા માંગતો હતો, પરંતુ કસ્ટમ વિભાગને શંકા જતા તેમણે ઉજ્બેક નાગરિકની ધરપકડ કરી હતી.

આ મામલાની સુનાવણી દરમિયાન ઉજ્બેક નાગરિક સાથે 13 પોપટને પણ કોર્ટમાં રજુ કરાયા હતાં. આ કેસની સુનાવણી કરતા કોર્ટે ઉજ્બેક નાગરિકને 14 દિવસની ન્યાયિક કસ્ટડીમાં મોકલવાનો આદેશ કર્યો હતો. જ્યારે કોર્ટે તમામ 13 પોપટને ઓખલા બર્ડ સેન્ચુરીમાં છોડવાનો આદેશ કર્યો હતો.

CISFએ કોર્ટને જણાવ્યું હતું કે, ઉજ્બેક નાગરિકે જુની દિલ્હીના એક વ્યક્તિ પાસેથી આ પોપટ ખરીદ્યા હતાં. કારણ કે ઉજ્બેકિસ્તાનમાં આ પોપટની કિંમત ખુબ વધારે હોવાથી તેણે આ પોપટ ખરીદ્યા હતા.