Riots In Vadodara: ઈન્સ્ટા લાઈવમાં યુવકે ધાર્મિક લાગણી દુભાય તેવી કોમેન્ટ કરતા કોમી છમકલું, પથ્થરમારો થયો

વડોદરાના નવાપુરા પોલીસ સ્ટેશન વિસ્તારમાં એક યુવક ઈન્સ્ટાગ્રામ ઉપર લાઈવ સ્ટ્રીમિંગ કરી રહ્યો હતો. આ દરમિયાન અન્ય એક યુવકે ધાર્મિક લાગણી દુભાય તેવી કોમેન્ટ કરતા કોમી છમકલું થયું હતું. જેમાં પથ્થરમારાની ઘટના પણ બની હતી. પોલીસે કોમ્બિંગ કરવું પડ્યું હતું. જો કે પોલીસ આ તણાવગ્રસ્ત પરિસ્થિતિને કાબૂમાં લેવા સફળ રહી હતી. વાંચો સમગ્ર ઘટનાક્રમઃ Vadodara Instagram Live Streaming

વડોદરાઃ શહેરના નવાપુરા પોલીસ સ્ટેશન વિસ્તારમાં ગત રાત્રે એક કોમી છમકલુ થયું હતું. સમગ્ર મામલામાં એક યુવકના ઈન્સ્ટાગ્રામમાં લાઈવ સ્ટ્રીમિંગ દરમિયાન અન્ય યુવકે ધાર્મિક લાગણી દુભાય તેવી કોમેન્ટ કરી હતી. આ કોમેન્ટને લીધે કોમી છમકલું થયું હતું. નવાપુરા પોલીસ સ્ટેશનની બહાર લોકો ઉમટી પડ્યા હતા. ટાળાએ આરોપીની ઘરપકડ કરવાની માંગ સાથે વિરોધ પ્રદર્શન કર્યુ હતું. આ સમયે ખાટકીવાડ ગલીમાંથી અચાનક જ બીજા એક ટોળાએ આવીને પથ્થરમારો કરતા પરિસ્થિતિ વણસી હતી.

નવાપુરા પોલીસે કોમ્બિંગ કર્યુ

સમગ્ર ઘટનાક્રમઃ રાજમહેલ રોડ ઉપર ઉટખાનની ગલીના નાકે અર્જુન પટેલ મોબાઈલ એસેસરીઝની દુકાન ચલાવે છે. તેમણે પોતાની દુકાનની ઓફર વિશે ગ્રાહકોને જણાવવા માટે તેમના ઈન્સ્ટાગ્રામ ઉપર લાઈવ સ્ટ્રીમિંગ કરતા હોય છે. તા.21/02/2024ના રોજ સાંજના 7.23ના સુમારે અર્જુન પટેલા તેમના ઈનસ્ટાગ્રામ પર લાઈવ થયા હતા. આ દરમિયાન તેમના ગ્રાહકોને જય શ્રી રામ કહીને શુભેચ્છા પાઠવી હતી. આ લાઈવમાં sahid-patel-7070 નામની આઈડી પરથી ધાર્મિક લાગણી દુભાય તેવી બિભત્સ ગાળ લખવામાં આવી હતી. જેથી આ કોમેન્ટની તપાસ કરતાં સહીદ પટેલ (રહે. ગુજરાત હાઉસિંગબોર્ડ, મહાલક્ષ્મી સોસાયટીની સામે, પાદરા,જિ.વડોદરા) હોવાનું જાણવા મળ્યું હતું. અર્જુન પટેલે તેને ફોન કરતા ફોન રીસિવ કરવામાં આવ્યો નહતો. ઈન્સ્ટાગ્રામ આઈ.ડી. ઉપરથી કોમેન્ટ વાળો ફોટો પણ ડીલીટ કરી નાખ્યો હતો.

ધાકધમકી અપાઈઃ હિન્દુ સંગઠનના કાર્યકર્તાઓ એ તેના ઘરે જઈ તપાસ કરતા તે મળી આવ્યો ન હોતો. ત્યારબાદ સહીદ સાથે ફોન ઉપર વાત કરતા તે મારી સાથે દાદાગીરી કરીને ગાળો બોલવા લાગ્યો હતો. તેણે કહ્યું હતું કે, હું પાદરામાં બેઠો છું. તારામાં તાકાત હોયતો આવીજા પાદરા. તેમ કહી અર્જુન પટેલને ઘાકધમકી આપી હતી. તેની પોસ્ટથી ધાર્મિક લાગણી દુભાઈ હોવાથી અર્જુન પટેલે આરોપી વિરુદ્ધ નવાપુરા પોલીસસ્ટેશનમાં ફરિયાદ નોંધાવી છે.

પોલીસે કોમ્બિંગ કર્યુઃ નવાપુરા પોલીસ સ્ટેશન વિસ્તારમાં લોકોએ કરેલા પથ્થરમારાને પોલીસે મહામહેનતે કાબૂમાં લીધો હતો. ઘટનાની જાણ થતાં જ ડીસીપી લીના પાટીલ તાત્કાલિક દોડી આવ્યા હતા. પોલીસે સમગ્ર વિસ્તારમાં કોમ્બિંગ કર્યુ હતું. પથ્થરમારો કરનારા આરોપીઓની શોધખોળ શરૂ કરી દીધી હતી. જો કે પથ્થરમારો કરનારા ઈસમો આ વિસ્તાર માંથી હાલ ફરાર થઈ ગયા હતા.

વડોદરા નવાપુરા પોલીસની ટીમ તુરંત જ એક્શનમાં આવી હતી અને ટોળાને વિખેર્યુ હતું. જો કે આ ઘટનામાં વિરોધ કરી રહેલા કેટલાક યુવાનો ઈજાગ્રસ્ત થયા હતા. પોલીસે ટોળાને કાબૂમાં લઈને એકત્રિત થયેલ લોકોના ટોળા સામે ફરિયાદ નોંધી 6ની ધરપકડ કરી હતી. સમગ્ર વિસ્તારમાં કોમ્બિંગ શરૂ કર્યુ હતું. પોલીસે વધુ 4 આરોપીઓની શોધખોળ શરૂ કરી છે...અભય સોની(ડીસીપી ઝોન-2, વડોદરા)