કચ્છ : કચ્છના માંડવી બીચ પર ફરવા આવેલા ઝારખંડના યુવાનના મોત બાદ સપરાધ માનવવધનો ગુન્હો સંચાલક સહિત ચાર સામે નોંધાયો હતો ત્યારે માંડવી પોલીસે આ મામલે તપાસ કરી પેરાગ્લાઇડીંગનુ સંચાલન કરતા તથા અન્ય જવાબદારો સામે કાર્યવાહી કરતાં ધરપકડ કરી છે.
વોટર્સ સ્પોર્ટના સંચાલકોની ધરપકડ : સમગ્ર મામલામાં સેફટી બેલ્ટ,હેલ્મેટ સહિતની કોઈ સુરક્ષા વ્યવસ્થા કરાઈ ન હતી. ધરપકડ બાદ આરોપીઓના 2 દિવસના રિમાન્ડ મેળવાયા છે. શિવ વોટર્સ સ્પોર્ટના મુખ્ય સંચાલક પંકજ ભાનુશાળી તથા બીચ પરના સંચાલક અબ્બાસ સુલેમાન પારાની ધરપકડ કરી વધુ તપાસ હાથ ધરવામાં આવી છે.
તંત્રએ તમામ રાઇડો બંધ કરાવી : સમગ્ર મામલામાં ઝારખંડના ફરિયાદી સુખવિંદર બલદેવસિંગ કોરે માંડવી પોલીસ મથકે શિવ વોટર્સ સ્પોર્ટના સંચાલક પંકજ ભાનુશાળી,જીજે 12 કે 8872 ગાડીના ચાલક પેરાગ્લાઈડીંગ ઉંચો કરનાર બે અજાણ્યા શખ્સો સામે ફરિયાદ નોંધાવી હતી. ફરિયાદીના ભાઈ ભુજ એરફોર્સમાં હોવાથી વેકેશન કરવા બલદેવસિંગ કોર અને બે બાળકો સાથે આવ્યા હતા.ત્યારે શુક્રવારે આ ધટના બની હતી જેમાં ઝારખંડના બલદેવસિંગનું મોત થયું હતું જેમાં બેદરકારી દાખવનાર સામે હવે કાર્યવાહી થઇ છે. તો પ્રાન્ત અધિકારીએ હાલ માંડવી બીચ પર તમામ રાઇડ બંધ કરાવી છે.
ધારાસભ્યની અપીલ : સમગ્ર ઘટનાને વખોડતા માંડવી મુન્દ્રા વિધાનસભા વિસ્તારના ધારાસભ્ય અનિરુદ્ધ દવેએ પણ જણાવ્યું હતું કે જે માંડવી બીજ પર કરુણાતિકા ઘટી છે તેના માટે ખૂબ જ દુઃખ છે તેમજ પરિવારને પૂરી સાંત્વના છે. તો આ ઉપરાંત જે દિવસે આ ઘટના ઘટી તેના આગલા દિવસે મામલતદાર પીઆઇ દ્વારા માંડવી બીચ પર વોટર સ્પોર્ટ્સ સાથે સંકળાયેલા સંચાલકોને સુરક્ષાની દ્રષ્ટિએ કોઈ વ્યવસ્થા ન હોતા વોટર સ્પોર્ટ્સની પ્રવૃત્તિઓ સંપૂર્ણપણે બંધ કરવા માટે જણાવ્યું હતું. છતાં પણ માથાભારે શખ્સો દ્વારા કોઈ પણ પ્રકારની સુરક્ષા વગર પ્રવાસીઓને વોટર સ્પોર્ટ્સ ની પ્રવૃત્તિઓ કરાવતા દુર્ઘટના ઘટી હતી. તેમાં તંત્રને પણ સંચાલકો વિરુદ્ધ કડક કાયદાકીય પગલાં ભરવા માટે અપીલ કરવામાં આવી છે.
