ભાવનગર: જિલ્લાના સોમનાથ નેશનલ હાઈવે ઉપર ગોઝારો અકસ્માત સર્જાયો છે. ઉભેલા ટ્રકની પાછળ ખાનગી લક્ઝરી બસ વહેલી સવારે ઘૂસી જતા મોતનો તાંડવ રચાયો છે. અહીં અનેક લોકો ઇજાગ્રસ્ત થયા છે. બનાવને પગલે અલંગ પોલીસનો કાફલો ઘટના સ્થળે દોડી ગયો હતો અને ઇજાગ્રસ્તોને હોસ્પિટલ ખસેડવામાં આવ્યા હતા.
સોમનાથ નેશનલ હાઈવે ઉપર ત્રાપજ ગામથી આગળ બંધ પડેલા રેતી ભરેલા ટોરસ ટ્રકની પાછળ ખાનગી લક્ઝરી બસ ઘૂસી ગઈ હતી. જેને પગલે મૃત્યુ થવાના અને ઇજાગ્રસ્ત થવાના બનાવો બનવા બન્યા હતા. જોકે બનાવને લઈને 108 એમ્બ્યુલન્સ અને પોલીસ કાફલો ઘટના સ્થળે દોડી ગયો હતો. ઇજાગ્રસ્તને હોસ્પિટલ ખસેડાયા હતા.
ક્યાં બન્યો બનાવ, ત્રાપજ નજીક, કેવી રીતે ?: સોમનાથ નેશનલ હાઈવે ઉપર બંધ ટોરસ ટ્રકની પાછળ સ્લીપિંગ કોચ લક્ઝરી બસ ઘૂસી ગઈ હતી. આ મુદ્દે અલંગ PSO એ ટેલીફોનિક વાતચીતમાં જણાવ્યું હતું કે, "વહેલી સવારે 5.30 થી 6:00 કલાકની વચ્ચે ત્રાપજ ગામ પાસે બાયપાસ રોડ નજીક બંધ ટોરસ રેતી ભરેલા ટ્રકની પાછળ સુરતથી ઉના તરફ જતી સ્લીપિંગ કોચ લક્ઝરી બસ ઘૂસી ગઈ છે. સ્થળ ઉપરથી મળતી માહિતી મુજબ જણાવ મળ્યું કે, કેટલાક લોકોના મૃત્યુ થયા છે. ઉપરાંત ઇજાગ્રસ્તોને તળાજા હોસ્પિટલ ખસેડવામાં આવ્યા છે. હાલ વધુ કામગીરી શરૂ કરવામાં આવી છે."
મોતનો આંકડો અને ઇજાગ્રસ્ત: ટોરસ ટ્રકના પાછળના ભાગે ખાનગી બસ ભટકાઈ જતા ડ્રાઇવરની સાઈડનો બસનો ભાગ ચિરાઈ જવાથી મૃત્યુ અને ઈજાના બનાવો બન્યા છે. તળાજા CHC ના સુપરિટેન્ડન્ટ એમ.બી. સાકીયાએ ટેલીફોનિક વાતચીતમાં જણાવ્યું હતું કે, "તળાજા પાસે અકસ્માતમાં અહીંયા 6 જેટલા મૃતદેહ લાવવામાં આવ્યા છે. 7 થી 8 જેટલા દર્દીઓ સારવારમાં છે. અમને પ્રાથમિક 108 મારફત 9 જેટલા મૃત્યુ થયા હોવાનું જાણવા મળી રહ્યું છે. કેટલાકને ભાવનગર તો કેટલાકને ખાનગી હોસ્પિટલમાં લઈ ગયા હોવાનું પણ જાણકારી મળી રહી છે."
બનાવ બાદ અરેરાટી અને પોલીસ કાર્યવાહી: તમને જણાવી દઈએ કે, ભાવનગરથી સોમનાથ નેશનલ હાઈવે ફોર ટ્રેક બનાવવામાં આવ્યો છે. દરેક ગામ નજીક બાયપાસ રસ્તાઓ પણ છે. ત્યારે ત્રાપજથી તળાજા તરફ જતા ત્રાપજ ગામ પૂર્ણ થતાં જ આવતા બાયપાસ નજીક રેતીથી ભરેલા ટ્રકમાં ખાનગી બસ ઘૂસવાના કારણે અલંગ પોલીસ ઘટના સ્થળે દોડી ગઈ હતી. ઘટના સ્થળે 108 મારફત પણ કામગીરી શરૂ કરવામાં આવી હતી. જોકે બનેલા બનાવના વિડીયો પણ સોશિયલ મીડિયામાં વાયરલ થઈ રહ્યા છે, જેમાં મુસાફર રસ્તા ઉપર પોતાનો માલ-સામાન લઈને બેઠા છે અને ઇજાગ્રસ્તોને 108 મારફત લઈ જતા દ્રશ્યમાન સામે આવી રહ્યા છે.
આ પણ વાંચો:
