બનાસકાંઠા: તાજેતરમાં હોસ્પિટલના મુદ્દે એક વિડીયો વાયરલ થયો છે. આ વાયરલ થયેલા વિડીયોએ ઘણી ચર્ચાને જન્મ આપ્યો છે. મહત્વની બાબત એ છે કે, આ વિડિયોમાં જણાવવામાં આવ્યું છે કે, એક ખાનગી હોસ્પિટલમાં ગર્ભ પરીક્ષણ કરવામાં આવે છે. ભારત દેશમાં ગર્ભ પરીક્ષણ કરી માહિતી મેળવવી કે છોકરો થશે કે છોકરી એ ગેરકાયદેસર છે. પરિણામે આ બાબતની જાણ તંત્રને કોઈ અરજી દ્વારા મળી હતી.
સોનોગ્રાફી મશીન સીલ કરવામાં આવ્યું: ધાનેરામાં આવેલ એક ખાનગી હોસ્પિટલમાં ગર્ભ પરીક્ષણ કરાતું હોવાની અરજી ધાનેરા તાલુકા હેલ્થ ઓફિસરને મળી હતી. જે બાદ ધાનેરા તાલુકા હેલ્થ ઓફિસરની ટીમ દ્વારા આ ખાનગી હોસ્પિટલમાં તપાસ કરવામાં આવી હતી. સાથે જ હોસ્પિટલમાં રાખેલું સોનોગ્રાફી મશીન પણ તાત્કાલિક સીલ કરી દેવામાં આવ્યું છે.
ડૉક્ટર પોતે કબૂલાત કરી રહ્યા છે: મહત્વની વાત એ છે કે, આ ખાનગી હોસ્પિટલમાં ગર્ભ પરીક્ષણ કરાતું હોવાનો વિડિયો વાયરલ થયો છે. જેમાં ડૉક્ટર અને ગર્ભ પરીક્ષણ અર્થે આવેલ મહિલાઓ વચ્ચેની વાતચીત પણ સ્પષ્ટ સંભળાઈ રહી છે. આ વાયરલ વીડિયોમાં પોતે ખાનગી હોસ્પિટલના ડૉક્ટર ગર્ભ પરીક્ષણ થાય છે તેવું કબૂલાત કરી રહ્યા છે. એટલું જ નહીં આ પહેલીવાર નથી પરંતુ છેલ્લા કેટલાક વર્ષોથી ગર્ભ પરીક્ષણ કરતા હોવાની પણ કબુલાત કરી રહ્યા છે.
આખરે વિડીયો બનાવ્યો કોણે? જોકે આ વિડીયો કોને બનાવ્યો છે અને ક્યારે બનાવ્યો છે તે અંગેની કોઈ જ સ્પષ્ટતા આ વીડિયોમાં થઈ રહી નથી. વિડીયોમાં દેખાતા ડૉક્ટર પણ આ જ હોસ્પિટલના છે કે નહીં તેની પણ સ્પષ્ટતા નથી થઈ રહી. આ હોસ્પિટલ વિશે અરજી મળતા જ તપાસ કરી હોસ્પિટલનું સોનોગ્રાફી મશીન હાલ સીલ કરી દેવામાં આવ્યું છે.
જિલ્લા આરોગ્ય અધિકારી ડૉ. ભરત સોલંકીએ કહ્યું કે, 'ધાનેરા તાલુકા હેલ્થ ઓફિસરને અરજી મળી હતી, જે અરજી બાદ ખાનગી હોસ્પિટલમાં તપાસ કરીને કાર્યવાહી કરવામાં આવી છે. જેમાં ટીમ દ્વારા સોનોગ્રાફી મશીન સીલ કરવામાં આવ્યું છે અને આ સમગ્ર મામલે હવે આગળની નિયમો અનુસાર કાર્યવાહી કરાશે.'
આ પણ વાંચો:
