અમદાવાદ: વસ્ત્રાપુર વિસ્તારમાં આવલા મોહિની ટાવર્સમાં ઉત્તરાયણના પર્વે એટલે કે, 14મી જાન્યુઆરીની સાંજે 75 વર્ષીય એક NRI વૃદ્ધનું મૃત્યું થયા હોવાની જાણ પોલીસને કરવામાં આવી હતી. બીજી તરફ પરિવારજનો દ્વારા જણાવવામાં આવ્યું હતું કે ઘરમાંથી કેટલીક ચીજ વસ્તુઓની ચોરી પણ થઈ છે. જોકે, આ મામલે પોલીસને પ્રથમ શંકા એ ઊભી થતી હતી કે લૂંટ સાથે મર્ડર થયાની આ ઘટના બની છે, અને આખરે આજે આ શંકા હકીકતમાં ફેરવાઈ છે. પોલીસે NRI વૃદ્ધની હત્યાના આરોપમાં આરોપીઓને પકડી પાડવામાં આવ્યા છે.
પોલીસને શરૂઆતથી લાગી હતી હત્યાની આશંકા
સમગ્ર ઘટનાની વિસ્તારથી વાત કરવામાં આવે તો તારીખ 12 જાન્યુઆરીના રોજ સવારે 11 થી લઈને સાંજે 4:00 વાગ્યાના સમયગાળા વચ્ચે એક વસ્ત્રાપુર વિસ્તારમાં આવેલા મોહિની ટાવર્સમાં 75 વર્ષીય કનૈયાલાલ ભાવસાર નામના એક NRIનો મૃતદેહ તેમના ઘરમાંથી મળી આવ્યો હતો. વસ્ત્રાપુર પોલીસે આ ઘટના અંગે તપાસ શરૂ કરી હતી, પરંતુ જ્યાં સુધી પોસ્ટમોર્ટમ રિપોર્ટ ન આવે ત્યાં સુધી એ કહી શકાતું ન્હોતું કે આ કોઈ મર્ડર છે, કે પછી કોઈ અન્ય રીતે વ્યક્તિનું મૃત્યુ થયું છે.
કલાકોમાં પોલીસે આરોપીઓને ઝડપ્યા
પોલીસને નિવેદન આપતા મૃતક કનૈયાલાલ ભાવસારના પત્ની દ્વારા જણાવવામાં આવ્યું હતું કે, ઘરમાંથી કેટલીક વસ્તુઓની ચોરી પણ થઈ છે, ત્યારે પ્રથમ શંકા તો એ જ ઊભી થતી હતી કે આ કોઈ દ્વારા કરવામાં આવેલ લૂંટ સાથે હત્યા છે. પોસ્ટમોર્ટમ રિપોર્ટ બાદ પોલીસને જે શંકા હતી તે સાચી ઠરી અને ખબર પડી કે કનૈયાલાલ ભાવસારનું ગળું દબાવીને તેમની હત્યા કરવામાં આવી છે. પછી હ્યુમન ઇન્ટેલિજન્સ, અઢળક સીસીટીવી અને આસપાસના લોકોની પૂછપરછ બધું સાથે મળીને પોલીસ તપાસનો ધમધમાટ શરૂ કર્યો અને ગણતરીના જ કલાકોમાં મર્ડર કરનાર આરોપી સુધી પહોંચી ગઈ.
કોણ છે આરોપી ?
75 વર્ષીય કનૈયાલાલ ભાવસારને મોતને ઘાટ ઉતારનાર જે બે આરોપીઓ પોલીસના હાથે લાગ્યા છે તે પતિ-પત્ની છે, પતિ આનંદ પ્રકાશ ઠાકોર અને તેની પત્ની નીલોફર ઉર્ફે હિનાએ આ હિચકારી વારદાતને અંજામ આપ્યો. આરોપી આનંદ ઠાકોર પોતે અમદાવાદમાં રિક્ષા ચલાવે છે અને તે તેની પત્ની હિના છેલ્લા દોઢ-બે વર્ષ પહેલાં અમદાવાદમાં સ્થાયી થઈ હતી અને મૂળ તે મુંબઈ -મહારાષ્ટ્રની છે, હિના અમદાવાદમાં મસાજ કરવા માટે વોલન્ટરી સેવા આપવાનું કામ કરે છે.
કોણ હતા મૃતક ?
મૃતક કનૈયાલાલ ભાવસાર કે જે કેનેડા સ્થાયી થયેલા છે, અને જ્યારે-જ્યારે તેઓ અમદાવાદ આવતા હતા ત્યારે તે હીના ઉર્ફે નીલોફર કે જે મસાજની સેવાઓ આપે છે તેને મસાજ માટે બોલાવતા હતા. આમ જ કનૈયાલાલ ભાવસાર મકરસંક્રાંતિના તહેવાર નિમિત્તે અમદાવાદ આવ્યા હતા અને હિનાને તેમણે મસાજ માટે બોલાવી હતી, ત્યારે હીનાના મનમાં લાલચ જાગી અને પોતાના પતિ આનંદ સાથે મળીને તેણે ગુનાનું કાવતરું ઘડી કાઢ્યું.
હત્યાના આરોપમાં પતિ-પત્નીની ધરપકડ
ઘટના બન્યાના દિવસે પહેલા હીના કનૈયાલાલ ભાવસારના ઘરે ગઈ હતી અને પાછળથી તેણે તેના પતિ આનંદને પણ ત્યાં બોલાવ્યા હતો, બંનેએ મળીને કનૈયાલાલ ભાવસારનું ગળું દબાવીને હત્યા કરી નાખી અને ઘરમાંથી મોંઘી ઘડિયાળો, મોબાઈલ ફોન સહિત ઘરેણાની કુલ મળીને 3,77,000 જેટલી ચોરી કરી. છેવટે પોલીસ તપાસમાં સમગ્ર ઘટનાક્રમનો પર્દાફાશ થયો અને પતિ-પત્નીને પોલીસે ઝડપી પાડ્યા છે.
