નવી દિલ્હીઃ કોંગ્રેસના પૂર્વ અધ્યક્ષ રાહુલ ગાંધીની અચાનક તબિયત લથડી છે. આ કારણે તેમનો સતના (મધ્યપ્રદેશ) અને રાંચી (ઝારખંડ)નો પ્રવાસ રદ કરવામાં આવ્યો ગતો. રાહુલ ગાંધી આજે સતના અને રાંચીમાં ઈન્ડિયા એલાયન્સની રેલીમાં ભાગ લેવાના હતા. કોંગ્રેસના મહાસચિવ અને મીડિયા પ્રભારી જયરામ રમેશે સોશિયલ મીડિયા પર તેમની ખરાબ તબિયતની જાણકારી આપી હતી.
તેમણે પોસ્ટમાં લખ્યું, રાહુલ ગાંધી આજે સતના અને રાંચીમાં ઈન્ડિયા એલાયન્સની રેલીમાં ભાગ લેવા માટે સંપૂર્ણ રીતે તૈયાર હતા. રાહુલ ગાંધી અચાનક બીમાર થઈ ગયા છે. હાલ તેઓ નવી દિલ્હીની બહાર જઈ શકતા નથી. કોંગ્રેસ અધ્યક્ષ મલ્લિકાર્જુન ખડગે સતનામાં જાહેર સભાને સંબોધિત કર્યા પછી રાંચીની રેલીમાં ચોક્કસપણે હાજરી આપશે.
મધ્ય પ્રદેશ કોંગ્રેસ અધ્યક્ષ જીતુ પટવારીએ પણ રાહુલ ગાંધીના સતના રદ થવાની માહિતી આપી હતી. તેમણે એક્સ પરની એક પોસ્ટમાં કહ્યું કે રાહુલ ગાંધી ખરાબ તબિયતના કારણે આજે સતના આવી શકતા નથી. આવી સ્થિતિમાં તેમણે કોંગ્રેસ અધ્યક્ષ ખડગેને સતના જવા વિનંતી કરી. મધ્યપ્રદેશના લોકો માટે ઊંડો આદર ધરાવતા ખડગેએ કોંગ્રેસના લોકસભા ઉમેદવાર સિદ્ધાર્થ કુશવાહાના સમર્થનમાં સતનામાં યોજાનારી રેલીમાં તરત જ તેમની હાજરી સુનિશ્ચિત કરી. રાહુલ ગાંધી ટૂંક સમયમાં નવા કાર્યક્રમો દ્વારા રાજ્યની જનતાને મળશે.
બપોરે મલ્લિકાર્જુન ખડગેએ કોંગ્રેસના ઉમેદવાર સિદ્ધાર્થ કુશવાહાના સમર્થનમાં સતનામાં એક જાહેર સભાને સંબોધિત કરી અને લોકોને તેમને મત આપીને સંસદમાં મોકલવાની અપીલ કરી. તેમણે કહ્યું કે કોંગ્રેસ સત્તામાં આવશે તો લોકોને રોજગારી આપીશું. કોંગ્રેસની પાંચ બાંયધરી દેશભરમાં લાગુ કરવામાં આવશે.
