મધ્યપ્રદેશ : લોકસભા ચૂંટણીમાં મધ્યપ્રદેશની ચર્ચીત બેઠકોમાંથી એક ઈન્દોર લોકસભા બેઠક પર ભાજપના ઉમેદવાર શંકર લાલવાણીએ ઈતિહાસ રચ્યો છે. તેમણે 10 લાખથી વધુ મતોથી આ બેઠક જીતીને દેશમાં જીતનો નવો રેકોર્ડ બનાવ્યો છે. ઉપરાંત અહીં NOTA એ પણ એક નવો રેકોર્ડ પોતાના નામે કર્યો છે. NOTA માં 2 લાખથી વધુ મત પડ્યા હતા.
ઈન્દોર બેઠકના બે રેકોર્ડ : લોકસભા ચૂંટણીમાં ઈન્દોર લોકસભા બેઠકે દેશમાં નવો ઈતિહાસ રચ્યો છે. અહીંથી આઉટગોઇંગ સાંસદ શંકર લાલવાણીને 12,26,751 વોટ મળ્યા છે. જ્યારે NOTAને 2,18,674 વોટ મળ્યા હતા. એટલે કે ભાજપના ઉમેદવાર શંકર લાલવાણી 10 લાખથી વધુ મતોથી ચૂંટણી જીત્યા છે. આ મોટી જીત સાથે NOTA એ દેશમાં એક નવો રેકોર્ડ પણ બનાવ્યો છે.
ઈન્દોરમાં સૌથી ઓછું મતદાન : મધ્યપ્રદેશમાં લોકસભા ચૂંટણીના ચોથા તબક્કામાં 8 બેઠકો પર મતદાન થયું હતું. આ 8 બેઠકોમાંથી સૌથી ઓછું 60.53 ટકા મતદાન ઈન્દોરમાં થયું હતું. કોંગ્રેસે અક્ષય કાંતિ બામને પોતાના ઉમેદવાર બનાવ્યા, પરંતુ ઉમેદવારી પાછી ખેંચવાના છેલ્લા દિવસે તેમણે ઉમેદવારી પાછી ખેંચી લીધી અને ભાજપમાં જોડાયા હતા. આ સ્થિતિમાં કોંગ્રેસે NOTA ને સમર્થન આપ્યું હતું. તેમના સિવાય 14 ઉમેદવારોમાંથી બહુજન સમાજ પાર્ટી, જનસંઘ અને કમ્યુનિસ્ટ પાર્ટી સિવાય 9 અન્ય અપક્ષ ઉમેદવારો ચૂંટણી લડી રહ્યા હતા.
2019 નો રેકોર્ડ તોડ્યો : શંકર લાલવાણી 2019 લોકસભા ચૂંટણીમાં 5.47 લાખ મતોથી જીત્યા હતા. 2019 લોકસભા ચૂંટણીમાં આ સીટ પર ભાજપને 65 ટકા વોટ શેર મળ્યા હતા. કોંગ્રેસ છેલ્લે 1984માં આ સીટ પર ચૂંટણી જીતી હતી. ઈન્દોર લોકસભા સીટ પર ભાજપને આશા હતી કે જીતના માર્જિનના તમામ રેકોર્ડ તૂટી જશે અને એવું જ થયું.
કોંગ્રેસના ઉમેદવારે ખેલ બગાડ્યો : ઈન્દોર લોકસભા બેઠક છેલ્લા 40 વર્ષથી ભાજપ પાસે છે. આવી સ્થિતિમાં કોંગ્રેસના ઉમેદવાર ન હોવાથી અહીં ચૂંટણી ઔપચારિક અને એકતરફી રહી હતી. જોકે, ઉમેદવાર ખોયા બાદ કોંગ્રેસે અહીં NOTA માટે જોરદાર પ્રચાર કર્યો હતો. એવું માનવામાં આવી રહ્યું હતું કે આ વખતે ઈન્દોર લોકસભા સીટ પર કોંગ્રેસ તરફી વોટ NOTA માં પડશે અને લોકોએ NOTA ને વોટ આપ્યો છે.
શંકર લાલવાણીની રાજકીય કારકિર્દી : શંકર લાલવાણી 1994 થી 1999 સુધી ઇન્દોર મ્યુનિસિપલ કોર્પોરેશનમાં કાઉન્સિલર હતા. કાઉન્સિલર બનતા પહેલા તેઓ ભારતીય જનતા પાર્ટીના વોર્ડ પ્રમુખ અને વિભાગીય અધ્યક્ષ પણ હતા. આ પછી તેમણે 1999 થી 2009 સુધી 10 વર્ષ ઇન્દોર મ્યુનિસિપલ કોર્પોરેશનમાં અધ્યક્ષ પદ સંભાળ્યું. આ પછી તેઓ બે વખત ઇન્દોર નગર ભારતીય જનતા પાર્ટીના અધ્યક્ષ પદે રહ્યા. 2013માં તેમને ઈન્દોર ડેવલપમેન્ટ ઓથોરિટીના ચેરમેન બનાવવામાં આવ્યા હતા. 2019 માં જ્યારે ભારતીય જનતા પાર્ટીએ તેમને લોકસભાની ટિકિટ આપી ત્યારે તેઓ લગભગ સાડા પાંચ લાખ ઐતિહાસિક મતોથી જીત્યા હતા.
બમ્પર જીત બાદ ઉજવણી : ઈન્દોરમાં ભાજપના કાર્યકર્તાઓએ ભાજપ ઉમેદવારની ઐતિહાસિક જીતની ઉજવણી કરી અને એકબીજાને મીઠાઈ ખવડાવીને અભિનંદન પાઠવ્યા હતા. આ દરમિયાન મોટી સંખ્યામાં ભાજપના કાર્યકરો કાર્યાલયમાં એકઠા થયા અને જોરશોરથી ઉજવણી કરી હતી.
