નવી દિલ્હી: ભારતીય મીડિયા અને ફિલ્મ ઉદ્યોગના વ્યક્તિત્વ અને રામોજી ફિલ્મ સિટીના સ્થાપક ચેરુકુરી રામોજી રાવનું શનિવારે નિધન થયું. તેમણે 87 વર્ષની વયે હૈદરાબાદમાં અંતિમ શ્વાસ લીધા. તેઓ મીડિયા જૂથોમાં તેમના યોગદાન માટે જાણીતા હતા. તેમનો જન્મ 16 નવેમ્બર 1936ના રોજ આંધ્ર પ્રદેશના પેડાપરૂપુડીમાં એક ખેડૂત પરિવારમાં થયો હતો.
તેમણે 1969માં એક મેગેઝિન દ્વારા મીડિયાના ક્ષેત્રમાં પ્રવેશ કર્યો હતો. તેમનું માનવું હતું કે મીડિયા એ બિઝનેસ નથી. તેઓ રામોજી ગ્રુપના વડા હતા, જેમાં વિશ્વની સૌથી મોટી ફિલ્મ નિર્માણ સુવિધાઓ, તેલુગુ અખબાર Eenadu, ETV નેટવર્ક અને ફિલ્મ નિર્માણ કંપની ઉષા કિરણ મૂવીઝનો સમાવેશ થાય છે.
પદ્મ વિભૂષણથી નવાજવામાં આવ્યા હતા રામોજી રાવ
તેમના અન્ય વ્યવસાયોમાં માર્ગદર્શી ચિટ ફંડ, ડોલ્ફિન ગ્રુપ ઓફ હોટેલ્સ, કલાંજલિ શોપિંગ મોલ, પ્રિયા પિકલ્સ અને મયુરી ફિલ્મ ડિસ્ટ્રીબ્યુટર્સનો સમાવેશ થાય છે. રામોજી રાવને પદ્મ વિભૂષણ (2016) સહિત તેલુગુ સિનેમા અને મીડિયામાં તેમના યોગદાન માટે ઘણા સન્માન અને પુરસ્કારો પ્રાપ્ત થયા છે. આ સિવાય તેમને રામિનેની ફાઉન્ડેશન એવોર્ડ અને ફિલ્મફેર લાઈફટાઈમ અચીવમેન્ટ એવોર્ડ પણ મળી ચુક્યો છે.
1996માં રામોજી ફિલ્મ સિટીનું નિર્માણ
રામોજી રાવની સૌથી મોટી સિદ્ધિ 1996માં બનેલી રામોજી ફિલ્મ સિટી માનવામાં આવે છે, જે 1666 એકરમાં ફેલાયેલી છે. રામોજી ફિલ્મ સિટી માત્ર એક ફિલ્મ સ્ટુડિયો નથી, પરંતુ તે પ્રવાસીઓ માટે આકર્ષણનું કેન્દ્ર પણ છે. તેમાં ફિલ્મ અને ટેલિવિઝનના નિર્માણ માટે વિશાળ ફિલ્મ સેટ, બગીચા, હોટેલ અને વિશ્વ કક્ષાની સુવિધાઓ છે.
રાવ સામાજિક કલ્યાણ પ્રત્યેની તેમની પ્રતિબદ્ધતા માટે પણ જાણીતા છે. તેમણે શિક્ષણ, આરોગ્યસંભાળ અને ગ્રામીણ વિકાસમાં વિવિધ પહેલોને ટેકો આપ્યો, જેણે અસંખ્ય લોકોના જીવન પર સકારાત્મક અસર કરી. રામોજી રાવનો વારસો તેમની સિદ્ધિઓ કરતાં ઘણો આગળ છે. તેમને એક સ્વપ્નદ્રષ્ટા તરીકે યાદ કરવામાં આવે છે જેમણે માત્ર ભારતીય સિનેમાને જ બદલી નાંખી પરંતુ મીડિયા પ્રોફેશનલ્સની પેઢીઓને પણ પ્રેરણા આપી.
