પુણે: મહારાષ્ટ્ર કેડરની 2023 બેચની પ્રોબેશનરી IAS પૂજા ખેડકર મુશ્કેલીમાં ફસાઈ રહી છે. સિવિલ સર્વિસ પરીક્ષા પાસ કરવા માટે વિકલાંગતા અને OBCના નકલી પ્રમાણપત્રો આપવા બદલ પૂજા ખેડકરની સોમવારે મોડી રાત્રે વાશિમ પોલીસે પૂછપરછ કરી હતી. પોલીસ ટીમમાં સબ ડિવિઝનલ પોલીસ ઓફિસર નીલિમા અરાજ અને અન્ય બે અધિકારીઓનો સમાવેશ થાય છે. પૂછપરછ માટે આવેલા અધિકારીઓએ મીડિયાને માહિતી આપવાનો ઇનકાર કર્યો, તેથી, પૂજા ખેડકરની કયા સંદર્ભમાં પૂછપરછ કરવામાં આવી તે જાણી શકાયું નથી. આ તમામ ઘટનાને પગલે IAS પૂજાની પુણેથી વાશિમ બદલી કરવામાં આવી હતી.
UPSCને ઘણા મેડિકલ સર્ટિફિકેટ સબમિટ કર્યા: તે જ સમયે, પુણે પોલીસે પ્રોબેશનરી IAS ઓફિસર પૂજા ખેડકર દ્વારા આપવામાં આવેલા મેડિકલ સર્ટિફિકેટની સત્યતાની તપાસ શરૂ કરી છે. 34 વર્ષીય અધિકારી પૂજાએ UPSCને ઘણા મેડિકલ સર્ટિફિકેટ સબમિટ કર્યા હતા, જેમાંથી એક બેન્ચમાર્ક ડિસેબિલિટીઝ (PwBD)ની જોગવાઈ હેઠળ દ્રષ્ટિની ક્ષતિ દર્શાવે છે. પૂજા પર સિવિલ સર્વિસ પરીક્ષા પાસ કરવા માટે નકલી પ્રમાણપત્રો બનાવવાનો આરોપ છે. વધુ માહિતી બહાર આવી છે કે, IAS અધિકારીએ 2007માં ખાનગી મેડિકલ કોલેજમાં પ્રવેશ માટે ફિટનેસ સર્ટિફિકેટ જમા કરાવ્યું હતું.
પ્રમાણપત્રો વિશે હકીકતો તપાસીશું: પીટીઆઈના જણાવ્યા અનુસાર, વિકલાંગતા કમિશનરની કચેરીએ ખેડકર દ્વારા સબમિટ કરેલા પ્રમાણપત્રોની ચકાસણી કરવા માટે પુણે પોલીસ અને જિલ્લા કલેક્ટર કચેરીને પત્ર લખ્યો છે. એક વરિષ્ઠ પોલીસ અધિકારીએ કહ્યું છે કે, અમને કમિશનર ફોર ડિસેબલની ઓફિસ તરફથી એક પત્ર મળ્યો છે. તેઓએ અમને પૂજા ખેડકરે રજૂ કરેલા પ્રમાણપત્રોની અધિકૃતતા તપાસવા કહ્યું છે. અમે આ પ્રમાણપત્રો વિશે હકીકતો તપાસીશું. તેઓ ક્યાંથી મેળવ્યા હતા અને કયા ડોક્ટર કે હોસ્પિટલે તેમને પ્રમાણિત કર્યા હતા તેની પણ તપાસ કરવામાં આવશે.
વિકલાંગ સંગઠનો તરફથી પૂજાને બરતરફ કરવાની માંગ: નકલી વિકલાંગતા પ્રમાણપત્રના કિસ્સામાં, વિકલાંગ સંગઠનોએ માંગ કરી છે કે, પૂજા ખેડકર વિરુદ્ધ કાર્યવાહી કરવામાં આવે અને તેને બરતરફ કરવામાં આવે. આ અંગે વિકલાંગ મંડળ વતી વિકલાંગ કલ્યાણ કમિશ્નરને ફરિયાદ આવેદન પણ આપવામાં આવ્યું હતું.
ચકાસણી માટે સભ્યની સમિતિની રચના: ઉલ્લેખનીય છે કે ગયા અઠવાડિયે કેન્દ્ર સરકારે IAS તરીકે પૂજા ખેડકરની ઉમેદવારી ચકાસવા માટે એક સભ્યની સમિતિની રચના કરી હતી. આ કમિટી પોતાનો તપાસ રિપોર્ટ બે અઠવાડિયામાં જમા કરશે. વધારાના સચિવ સ્તરના અધિકારીઓ IAS અધિકારીની ઉમેદવારીના દાવા અને અન્ય વિગતોની ચકાસણી કરવા માટે તપાસ કરશે.
મારા વિશે ખોટી માહિતી ફેલાવવામાં આવી રહી છે: IAS પૂજા ખેડકરે સોમવારે મીડિયા સાથે વાત કરતાં પોતાના પર ઉઠાવવામાં આવી રહેલા સવાલો અંગે કહ્યું હતું કે, તેણે કંઈ ખોટું કર્યું નથી. તે નિર્દોષ છે. તેના વિશે ખોટી માહિતી ફેલાવવામાં આવી રહી છે. સરકાર દ્વારા તપાસ સમિતિ બનાવવા પર તેમણે કહ્યું કે સત્ય બધાની સામે આવશે. સમિતિ તેનું કામ કરશે. કમિટીના રિપોર્ટ બાદ હું પોતે મીડિયાને રિપોર્ટ કરીશ.
