મૃતદેહને નવડાવતી વખતે કમર પર દેખાયો ગોળીનો ઘાવ, એક્સરેમાં ખુલ્યો ભેદ

ગઢ ગામનો રહેવાશી વસીમ નામનો યુવક બહાદરાબાદમાં પેથોલોજી લેબમાં કામ કરતો હતો, શુક્રવારે સાંજે તે રસ્તાના કિનારે બેભાન અવસ્થામાં મળી આવ્યો હતો.

હરિદ્વારઃ તાજેતરમાં હરિદ્વારમાં એક વ્યક્તિ રોડ કિનારે બેભાન અવસ્થામાં મળી આવ્યો હતો. ત્યારે તેના નાકમાંથી લોહી વહી રહ્યું હતું. ત્યાર બાદ કેટલાક ગ્રામજનોએ તેને ભૂમાનંદ હોસ્પિટલમાં મોકલી આપ્યો હતો. જ્યાં તબીબોએ તેને મૃત જાહેર કર્યો હતો. લોકો તેને માર્ગ અકસ્માત ગણી રહ્યા હતા. હવે આ મામલે નવો વળાંક આવ્યો છે. યુવકનું મોત માર્ગ અકસ્માતમાં નહીં પરંતુ ગોળી વાગવાથી થયું હતું. પોસ્ટમોર્ટમ પહેલા કરવામાં આવેલા એક્સ-રેમાં ખબર પડી કે તેના શરીરમાં એક ગોળી ફસાઈ ગઈ હતી. મામલો રાનીપુર પોલીસ સ્ટેશન વિસ્તારના ગઢ ગામનો છે.

મૃતદેહને નવડાવતી વખતે, તેના કમર પરના ઘાની વચ્ચે એક નાનું કાણું દેખાયું. મૃતદેહને દફનાવવામાં આવે તે પહેલા કોઈક રીતે આ સમાચાર પોલીસના કાને પહોંચી ગયા. છેલ્લી ઘડીએ પહોંચેલી પોલીસે લાશને પોસ્ટમોર્ટમ માટે મોકલી આપી હતી. એક્સ-રેમાં યુવકને કમરમાં ગોળી વાગી હોવાનું બહાર આવતા પોલીસે હવે યુવકના પિતા વતી હત્યાનો ગુનો નોંધ્યો છે. SSP પ્રમેન્દ્ર ડોબલે આ મામલે દરેક પાસાઓની તપાસ કરવાના નિર્દેશ આપ્યા છે.

રાનીપુર પોલીસ સ્ટેશન વિસ્તારના ગ્રામ ગઢનો રહેવાસી વસીમ બહાદરાબાદમાં પેથોલોજી લેબમાં કામ કરતો હતો. શુક્રવારે વસીમ રાબેતા મુજબ લેબમાં ગયો હતો. સાંજના સમયે ગામના ગ્રામ પ્રધાને વસીમના પિતા મુસ્તકીમને ફોન પર જણાવ્યું હતું કે તેમનો પુત્ર ગામની સરકારી હોસ્પિટલ પાસે રસ્તાના કિનારે બેભાન હાલતમાં પડ્યો છે અને તેના નાકમાંથી લોહી નીકળી રહ્યું છે. કેટલાક ગ્રામજનોએ વસીમને ભૂમાનંદ હોસ્પિટલમાં ખસેડ્યો જ્યાં ફરજ પરના તબીબોએ તેને મૃત જાહેર કર્યો હતો.

પરિવારના સભ્યો તેને ગામમાં દફનાવવાની તૈયારી કરી રહ્યા હતા. દરમિયાન, શંકાસ્પદ સંજોગોમાં મૃત્યુ થયું હોવાની માહિતી મળતા, રાનીપુર પોલીસ સ્ટેશનના પ્રભારી કમલ મોહન ભંડારી તાત્કાલિક ગામમાં પહોંચ્યા હતા અને મૃતદેહનો કબજો લઈ પોસ્ટમોર્ટમ માટે મોકલી આપવામાં આવ્યો હતો. પોલીસે લાશનો એક્સ-રે કરાવ્યો હતો. જેમાં યુવકને કમરમાં ગોળી વાગી હોવાનું જાણવા મળ્યું હતું.

આ વાતની જાણ થતાં પરિવારના પગ નીચેથી જમીન સરકી ગઈ હતી. પોસ્ટમોર્ટમ બાદ મૃતદેહના અંતિમ સંસ્કાર કરવામાં આવ્યા હતા. ત્યાર બાદ વસીમના પિતા મુસ્તકીમે અજાણ્યા લોકો સામે હત્યાની ફરિયાદ નોંધાવી હતી. પોલીસ સ્ટેશન ઈન્ચાર્જ કમલ મોહન ભંડારીએ જણાવ્યું હતું કે, વસીમને કમરમાં ગોળી વાગી હતી. અજાણ્યા શખ્સો સામે હત્યાનો ગુનો નોંધવામાં આવ્યો છે. ટૂંક સમયમાં આરોપીઓની ધરપકડ કરવામાં આવશે.