નવી દિલ્હી: દિલ્હીના સીએમ અરવિંદ કેજરીવાલની પત્ની સુનીતા કેજરીવાલે એક પ્રેસ કોન્ફરન્સ કરી કહ્યું કે " બે દિવસ પહેલા અરવિંદ કેજરીવાલે દિલ્હીમાં પાણી અને ગટરની સમસ્યા અંગે જળ મંત્રી આતિશીને પત્ર મોકલ્યો હતો, કેન્દ્ર સરકારે તેમના વિરુદ્ધ ફરિયાદ દાખલ કરી છે." તેમણે કહ્યુ કેન્દ્ર સરકાર દિલ્હીને બરબાદ કરવા માંગે છે? શું?
શું કહ્યુ સુનિતા કેજરીવાલે: 'ગઈ કાલે હું અરવિંદ કેજરીવાલજીને જેલમાં મળી હતી, તેમને ડાયાબિટીસ છે, તેમનું શુગર લેવલ ઠીક નથી પણ તેમનો નિશ્ચય મજબૂત છે. બે દિવસ પહેલા તેમણે દિલ્હીના જળ મંત્રી આતિષીને સંદેશો મોકલ્યો હતો કે લોકોની પાણી અને ગટરની સમસ્યાનો ઉકેલ લાવવો જોઈએ. મને કહો, તમણે શું ખોટું કર્યું? લોકોની સમસ્યા હલ થવી જ જોઈએ. આ મુદ્દે પણ કેન્દ્ર સરકારે તમારા સીએમ પર કેસ કર્યો છે. શું આ લોકો દિલ્હીને બરબાદ કરવા માગે છે? શું આ લોકો એવુ ઈચ્છે છે કે દિલ્હીના લોકો સતત સમસ્યાઓ સામે સંઘર્ષ કરતા રહે? આનાથી અરવિંદ કેજરીવાલજી ખૂબ જ દુઃખી છે.
તેમણે આ પણ કહ્યુ: 'અરવિંદજીએ એક વધુ વાત કહી કે આ કહેવાતા દારૂના કૌભાંડની તપાસમાં EDએ છેલ્લા બે વર્ષમાં 250થી વધુ દરોડા પાડ્યા છે. તેઓ આ કૌભાંડના પૈસા શોધી રહ્યા છે. હજુ સુધી એક પણ દરોડામાં એક પણ પૈસો મળ્યો નથી. મનીષજીના સ્થાને દરોડા પાડવામાં આવ્યા, સંજય સિંહજીના સ્થાને દરોડા પાડવામાં આવ્યા, સત્યેન્દ્ર જૈનજીના સ્થાને દરોડા પાડવામાં આવ્યા, પણ દારૂના કૌભાંડનો એક પણ પૈસો મળ્યો નહીં, અમારા ત્યાં દરોડા પાડ્યા એમા તેમને માત્ર 73 હજાર રૂપિયા જ મળી આવ્યા, તો આ કહેવાતા દારૂના કૌભાંડના પૈસા ક્યાં છે? અરવિંદજીએ કહ્યું છે કે તેઓ 28 માર્ચે કોર્ટ સમક્ષ આ વાતનો ખુલાસો કરશે. આ કહેવાતા દારૂના કૌભાંડના પૈસા ક્યાં છે તે અમે આખા દેશને સત્ય જણાવીશું. તેની સાબિતી પણ આપીશુ. વધુમાં તેમણે કહ્યું છે કે મારું શરીર જેલમાં છે પણ મારો આત્મા તમારી વચ્ચે છે, તમારી આંખો બંધ કરો અને તમે મને તમારી આસપાસ અનુભવશો.
કેજરીવાલનો સંદેશ: આ પહેલા જ્યારે સુનીતા કેજરીવાલે પ્રેસ કોન્ફરન્સ કરી હતી ત્યારે તેમણે દિલ્હીના મુખ્યમંત્રીનો સંદેશ વાંચી સંભળાવ્યો હતો જેમાં અરવિંદ કેજરીવાલે કહ્યું હતું કે 'દિલ્હીના લોકોએ બિલકુલ ગભરાવું જોઈએ નહીં, અમે આ લડાઈ લડીશું, તમને આપેલા બધા વચનો અરવિંદ કેજરીવાલ પૂરા કરશે. ગઈકાલે સુનિતા કેજરીવાલ ED કસ્ટડીમાં તેમના પતિ અરવિંદ કેજરીવાલને મળ્યા હતા. અગાઉ પણ સુનીતા કેજરીવાલ ધરપકડ બાદ તેમના પતિનો સંદેશ વાંચવા માટે આગળ આવ્યા હતા.
પત્ની, પીએસ અને વકીલને મળવાની પરવાનગી: આમ આદમી પાર્ટીના રાષ્ટ્રીય સંયોજક અને દિલ્હીના મુખ્યમંત્રી અરવિંદ કેજરીવાલની 21 માર્ચની રાત્રે ED દ્વારા દિલ્હી લિકર પોલિસી કૌભાંડના આરોપમાં ધરપકડ કરવામાં આવી હતી. હાલમાં અરવિંદ કેજરીવાલ EDની કસ્ટડીમાં છે. કોર્ટે પત્ની, પીએસ અને વકીલને મળવાની પરવાનગી આપી છે. મંગળવારે સુનીતા કેજરીવાલ ED કસ્ટડીમાં તેમના પતિ અરવિંદ કેજરીવાલને મળ્યા હતા.
