મુંબઈ: લોકસભા ચૂંટણી 2024ના પરિણામો બાદ મહારાષ્ટ્રના રાજકારણમાં ગરમાવાનો ગણગણાટ તેજ થઈ ગયો છે. એવો દાવો કરવામાં આવી રહ્યો છે કે, મુખ્ય પ્રધાન એકનાથ શિંદેની આગેવાની હેઠળની મહાયુતિ સરકાર પર સંકટના વાદળો છવાયેલા છે. મીડિયા અહેવાલો અનુસાર, શિવસેના (શિંદે જૂથ) અને NCP (અજિત પવાર જૂથ)ના ઘણા ધારાસભ્યો પક્ષપલટો કરી શકે છે. આ અટકળો વચ્ચે મહારાષ્ટ્ર વિધાનસભામાં કોંગ્રેસ પાર્ટીના નેતા વિજય વડેટ્ટીવરે મોટો દાવો કર્યો છે. કોંગ્રેસના નેતાના જણાવ્યા અનુસાર, શિંદે જૂથ અને અજિત પવાર જૂથના લગભગ 40 ધારાસભ્યો તેમના સંપર્કમાં છે અને મહા વિકાસ અઘાડી (MVA) ગઠબંધનમાં પાછા ફરવા માંગે છે.
વિજય વડેટ્ટીવરે કહ્યું કે, લોકસભા ચૂંટણીના પરિણામોથી સ્પષ્ટ થઈ ગયું છે કે મહારાષ્ટ્રમાં પવન કોઈ દિશામાં ફૂંકાઈ રહ્યો છે. આ જ કારણ છે કે મહાગઠબંધન સરકારમાં સામેલ એનસીપી અને શિવસેનાના ધારાસભ્યો પણ પવનની દિશા સમજીને પક્ષ બદલવાની તૈયારી કરી રહ્યા છે. તેમણે કહ્યું કે લોકસભા ચૂંટણીના પરિણામો રાજ્યમાં વર્ષના અંતમાં યોજાનારી વિધાનસભા ચૂંટણીને પણ અસર કરશે. અમે આશા રાખીએ છીએ કે MVA, કોંગ્રેસ, NCP (શરદચંદ્ર પવાર) અને શિવસેના (UBT) નું ગઠબંધન રાજ્યમાં સત્તા પર પાછા ફરશે.
વડેટ્ટીવરે કહ્યું કે, જો આપણે લોકસભા ચૂંટણીના પરિણામોના વલણ પર નજર કરીએ તો, MVA રાજ્યની 150 વિધાનસભા બેઠકો પર લીડ મેળવી છે. જ્યારે ભાજપના નેતૃત્વમાં મહાયુતિ ગઠબંધન માત્ર 130 સીટો પર આગળ હતું. મહારાષ્ટ્રમાં કુલ 288 વિધાનસભા સીટો છે. એમવીએ જે રીતે લોકસભા ચૂંટણીમાં તેના શાનદાર પ્રદર્શન સાથે 48 લોકસભા બેઠકોમાંથી 30 બેઠકો કબજે કરી છે, વિપક્ષી શિબિર આગામી વિધાનસભા ચૂંટણીમાં જીતની અપેક્ષા રાખી રહી છે.
