বিলাসীপাৰাত ডকাইতৰ সন্ত্ৰাস

বিলাসীপাৰাৰ নতুন লাউপাৰাত সংঘটিত হৈছে এক লোমহৰ্ষক ডকাইতি কাণ্ড ৷ শনিবাৰে নিশা ৭-৮ জনীয়া ডকাইতৰ দল এটাই গাঁৱখনৰ মনজুৰ আলীৰ বাসগৃহত প্ৰৱেশ কৰি সংঘটিত কৰে লুটপাত ৷ উত্থাপিত অভিযোগ অনুসৰি, ডকাইতৰ দলে চোকা অস্ত্ৰৰে হানি-খুঁচি গুৰুতৰভাৱে আহত কৰে মনজুৰ আলী আৰু পত্নী আনজুমা বেগমক ৷ আঘাতপ্ৰাপ্ত মনজুৰ আলী আৰু পত্নীয়ে ঘটনাস্থলীত হাতে-লোটে আটক কৰে দুৰ্ধৰ্ষ ডকাইত হামিদুল আলীক ৷ আনহাতে ঘটনাৰ পিছতে ৰাইজে খেদি খেদি আটক কৰে আন এটা ডকাইত মহিবুল হকক ৷ ৰাইজৰ উত্তম-মাধ্যমত ধৃত ডকাইতদ্বয় গুৰুতৰভাৱে আহত হয় ৷ পৰৱৰ্তী সময়ত আহত মনজুৰ আলী আৰু পত্নী আনজুমাৰ লগতে ধৃত ডকাইতদ্বয়ক ধুবুৰী অসামৰিক চিকিৎসালয় ভৰ্তি কৰোৱা হয় ৷