কোনো কাৰণ নোহোৱাকৈ হঠাতে অত্যধিক ঘাম ওলাবলৈ লয় নেকি ? তেন্তে আওকাণ নকৰিব । অত্যধিক ঘাম ওলোৱাটো গুৰুতৰ ৰোগৰ লক্ষণ হ’ব পাৰে । হাইপাৰহাইড্ৰ’ছিছ (Hyperhidrosis) ৰোগৰ বাবে শৰীৰত স্বাভাৱিক মাত্ৰাতকৈ অধিক ঘাম ওলায় । সাধাৰণতে হাত, ভৰি, বাহুৰ তলত আৰু মুখৰ পৰা বেছি ঘাম ওলায় । হাইপাৰহাইড্ৰ’ছিছ ৰোগত আপোনাৰ শৰীৰৰ ঘামগ্ৰন্থিবোৰ অতিমাত্ৰাত সক্ৰিয় হৈ পৰে । সেয়েহে, কোনো কাৰণ নোহোৱাকৈ অত্যধিক ঘাম ওলাবলৈ আৰম্ভ কৰে । এই বিষয়ে বিতংভাৱে জানো আহক...
কিয় হয় হাইপাৰহাইড্ৰ’ছিছ ?
- স্নায়ুতন্ত্ৰ সম্পৰ্কীয় কাৰণ - এক গৱেষণাৰ পৰা জানিব পৰা মতে হাইপাৰহাইড্ৰ’ছিছত ঘামগ্ৰন্থি আৰু স্নায়ুতন্ত্ৰৰ মাজত যোগাযোগত সমস্যা হয়, যাৰ ফলত অত্যধিক ঘাম ওলায় ।
- হৰম’নৰ কাৰণ – থাইৰয়ড, পিটুইটাৰী গ্ৰন্থি আদিৰ লগত জড়িত কিছুমান হৰম’নেও হাইপাৰহাইড্ৰ’ছিছৰ সৃষ্টি কৰে ।
- বংশগত কাৰণ - যদি পিতৃ-মাতৃ কোনো এগৰাকী এই ৰোগত আক্ৰান্ত, তেন্তে শিশুটিৰ এই ৰোগ হোৱাৰ সম্ভাৱনা থাকে ।
- আন কাৰণ – মানসিক চাপ, এলাৰ্জী, কিছুমান ঔষধ ইত্যাদিয়েও হাইপাৰহাইড্ৰ’ছিছৰ সৃষ্টি কৰিব পাৰে ।
হাইপাৰহাইড্ৰ’ছিছৰ লক্ষণ কি ?
- হাত, ভৰি, কপাল আৰু মুখ আদি অংশৰ পৰা অত্যধিক ঘাম ওলোৱা
- এই ঠাইবোৰত অনবৰতে ঘাম ওলোৱা আৰু আঠাযুক্ত হৈ থাকে
- মৃদুৰ পৰা মধ্যমীয়া শাৰীৰিক পৰিশ্ৰম কৰিলেও অত্যধিক ঘাম ওলোৱা
- নিশা শুই থকাৰ সময়তো ঘাম ওলোৱা
- কাপোৰত ঘামৰ দাগ
- শাৰীৰিক আৰু মানসিক চাপত অত্যধিক ঘাম ওলোৱা
ইয়াৰ চিকিৎসা জানি লওক
শৰীৰৰ কিছুমান বিশেষ অংশত অতিৰিক্ত ঘাম উৎপন্ন হোৱা এটা অৱস্থা হ’ল হাইপাৰহাইড্ৰ’ছিছ । এই ৰোগৰ কোনো নিৰাময় নাই যদিও জীৱনশৈলীৰ কিছু পৰিৱৰ্তন আৰু ঔষধে লক্ষণ কমোৱাত সহায় কৰিব পাৰে ।
- ওজন নিয়ন্ত্ৰণ কৰা আৰু ব্যায়াম কৰাটো গুৰুত্বপূৰ্ণ
- মদ্যপান পৰিহাৰ কৰিব লাগে
- এন্টিপাৰ্স্পিৰেণ্ট লোচন আৰু এলুমিনিয়াম ক্লৰাইড ঔষধে লক্ষণ কম কৰিব পাৰে
- বটক্স বেজীও ফলপ্ৰসূ হ’ব পাৰে ।
- মানসিক চাপ আৰু উদ্বেগ পৰিহাৰ কৰিব লাগে ।
- পুষ্টিকৰ খাদ্য খাওক, যিবোৰত ভিটামিন প্ৰচুৰ পৰিমাণে থাকে ।
- সৰ্বোত্তম উপায় হ’ল প্ৰচুৰ পৰিমাণে পানী খোৱা । এনে কৰিলে ঘামৰ বেয়া গোন্ধৰ পৰা হাত সাৰিব পাৰি ৷
- কপাহেৰে বনোৱা কাপোৰ পিন্ধক যাতে বেছি গৰম অনুভৱ নহয় ।
- নেমুৰ পানী খাব, যদি নেমুৰ পানীৰ সমস্যা হয় তেন্তে যিমান পাৰি সিমান গ্ৰীণ টি খাব ।
Disclaimer: এই প্ৰতিবেদনত উল্লেখ কৰা পদ্ধতি আৰু পৰামৰ্শ কাৰ্যকৰী কৰাৰ আগতে চিকিৎসক বা আনুষংগিক বিশেষজ্ঞৰ পৰামৰ্শ ল’বলৈ নাপাহৰিব ।
লগতে পঢ়ক: শীতকালত আদা ব্যৱহাৰৰ উপকাৰিতা সমূহ জানে নে ?
