ধনীয়েই হওঁক বা দুখীয়াই হওঁক, সকলো ব্যক্তিৰ জীৱনতে সমস্যা থাকে ৷ কাৰো জীৱনেই সুচল নহয় ৷ সকলোৱে জীৱনৰ এটা সময়ত অসুবিধাৰ সন্মুখীন হ'বই লাগিব ৷ ইয়াৰ উদাহৰণস্বৰূপে বলীউডৰ অভিনেত্ৰী প্ৰিয়ংকা চোপ্ৰাৰ কথাকেই ক’ব পাৰি ৷ প্ৰিয়ংকাক দেখিলে কোনেও অনুমান কৰিব নোৱাৰে যে তেওঁ হাঁপানিৰ দৰে ৰোগৰ সৈতে যুঁজি আছে ৷ ৫ বছৰ বয়সৰ পৰাই তেওঁক এই ৰোগে আগুৰি আছে ৷
কিন্তু বলীউডৰ ‘দেশী গাৰ্ল’ প্ৰিয়ংকাৰ বিশেষত্ব এয়ে যে তেওঁ কেতিয়াও এই ৰোগক তেওঁৰ ওপৰত আধিপত্য বিস্তাৰ কৰিবলৈ দিয়া নাই ৷ প্ৰিয়ংকাই নিজেই উল্লেখ কৰিছিল যে কেনেকৈ হাঁপানিয়েও তেওঁৰ কেৰিয়াৰৰ উচ্চতাত উপনীত হোৱাত বাধা দিব নোৱাৰিলে ৷ এই ৰোগৰ সৈতে যুঁজিয়েই তেওঁ গোটেই দিনটো কামত ব্যস্ত থাকে ৷প্ৰিয়ংকাৰ মতে কোনো ৰোগ লুকুৱাই ৰখাটো উচিত নহয় ৷ সদায়েই ৰোগৰ সৈতে যুঁজ দি আগবাঢ়ি গ’লে জীৱনত একো ৰোগেই প্ৰভাৱ বিস্তাৰ কৰিব নোৱাৰে ৷
হাঁপানি কি ?
হাঁপানি হৈছে এক শ্বাসতন্ত্ৰৰ ৰোগ, য'ত শ্বাসনলী ফুলি থাকে ৷ হাঁপানি থাকিলে হাঁওফাঁওৰ ওপৰত চাপ পৰে ৷ ই হৈছে এনে ৰোগ যিয়ে সকলো বয়সৰ লোককে প্ৰভাৱিত কৰে, যদিও মহিলাৰ ওপৰত ইয়াৰ প্ৰভাৱ পুৰুষতকৈ পৃথক ৷ বিজ্ঞানীসকলৰ মতে, মহিলাৰ ক্ষেত্ৰত উৎপন্ন যৌন হ’ৰম’নৰ ফলত হাপানীৰ দৰে সমস্যা হয় ৷
মহিলাসকলে কিয় এই ৰোগত ভুগিবলৈ আৰম্ভ কৰিছে ?
ঋতুস্ৰাৱৰ সময়ত মহিলাৰ এষ্ট্ৰোজেনৰ স্তৰ হ্ৰাস হয় ৷ যি ফুলাৰ সমস্যা আৰু হাঁপানিৰ সমস্যা বৃদ্ধি কৰে ৷ হাঁপানি থকা প্ৰায় ২০% ৰ পৰা ২৫% মহিলাই ঋতুস্ৰাৱ আৰম্ভ হোৱাৰ ঠিক আগতে বুকুখন টান হোৱা যেন আৰু শ্বাস-প্ৰশ্বাসত কষ্ট অনুভৱ কৰে ৷ আনহাতে, মহিলাসকলে পাকঘৰত অধিক সময় অতিবাহিত কৰে আৰু পাকঘৰৰ প্ৰদূষণে তেওঁলোকৰ হাঁওফাঁওক প্ৰভাৱিত কৰে ৷ শৈশৱতে এই ৰোগ হোৱা লোকসকলে যদি সময়মতে সঠিক চিকিৎসা আৰু পৰিৱেশ নাপায়, তেওঁলোকৰ বাবে স্বাস্থ্যৱান জীৱন-যাপন কৰাটো অতি কঠিন হৈ পৰে ৷
হাঁপানিৰ লক্ষণ
- চুটি উশাহ
- কাঁহ
- বুকুত কফ জমা হোৱা
- বুকুখন টান হোৱা যেন অনুভৱ হোৱা
- ভাগৰ অনুভৱ কৰা
হাঁপানিৰ ৰোগীসকলে এইসমূহ দিশত মন দিয়া উচিত
- ৰাতিপুৱা মৌ খাব ৷ আহাৰত সেউজীয়া পাচলি, পুদিনা, আদা, নহৰু, ব্ৰকলী অন্তৰ্ভুক্ত কৰিব ৷
- কৰ্মৰত মহিলাসকলে বায়ু প্ৰদূষণ পৰিহাৰ কৰিব লাগে ৷ সদায় নাকটো ভালদৰে ঢাকি ওলাই যাব লাগে ৷
হাঁপানিয়ে কেতিয়া আক্ৰমণ কৰে ?
- যেতিয়া বতৰ সলনি হয়
- যথেষ্ট ব্যায়াম কৰাৰ পিছত
- ঠাণ্ডা বতৰত
- যেতিয়া ধোঁৱা শৰীৰৰ ভিতৰলৈ যায়
- বৰষুণৰ বতৰত
সেয়েহে এই ৰোগৰ লক্ষণবোৰ শৰীৰত দেখা দিয়াৰ লগে লগে বিশেষজ্ঞৰ পৰামৰ্শ লোৱাটো খুবেই জৰুৰী ৷
