কনজাংকটিভাইটিছ হ'ল চকুৰ একপ্ৰকাৰৰ সংক্ৰমণ । চকুৰ মণিৰ বগা অংশখিনিৰ ওপৰত এখন পাতল পনীয়া আৱৰণ থাকে । এই আৱৰণ খনকে কনজাংকটিভা বোলে । যেতিয়া কনজাংকটিভাৰ ইনফেক্সন বা সংক্ৰমণ হয় তেতিয়া কনজাংকটিভাইটিছ হয়। কনজাংকটিভাইটিছক জয়বাংলা বুলিও কোৱা হয় । এই ৰোগ সাধাৰণতে বেক্টেৰিয়াৰ বা ভাইৰাচৰ বাবে হ'ব পাৰে ।
কনজাংকটিভাইটিছ যি বেক্টেৰিয়াৰ দ্বাৰা হয় সেইটো অতি বেছি সোচৰা বা বিয়পা বেক্টেৰিয়া । এজনৰ পৰা আন এজনলৈ এই ৰোগ অতি সহজে বিয়পে। সেয়েহে পৰিয়ালৰ এজনৰ এই ৰোগ হ’লে আন সদস্য সকলে যদি বিশেষ সাৱধানতা অৱলম্বন নকৰে তেন্তে আন সদস্যসকলৰো এই ৰোগ হ'ব পাৰে । ঠিক তেনেদৰে অফিচ বা বিদ্যালয়বোৰতো ইজনৰ পৰা সিজনৰ চকুত এইৰোগ অতি সোনকালে সংক্ৰমণ হয় ।
কনজাংকটিভাইটিছকৰ লক্ষণ কি ?
১) কনজাংকটিভাইটিছ হ’লে চকু ৰঙা পৰে । অৱশ্যে সকলো সময়তেই চকু ৰঙা পৰিলেই কনজাংকটিভাইটিছ নহ’বও পাৰে ।
২) কনজাংকটিভাইটিছ হ’লে চকু খজুৱায়, চকু খচ খচায় । কিবা বস্তু চকুৰ মণিৰ ভিতৰত সোমাই থকা যেন লাগে ।
৩) চকু ৰঙা পৰাৰ লগতেই চকুৰ পৰা পানী ওলোৱাটোও কনজাংকটিভাইটিছৰে আন এটা লক্ষণ ।
৪) চকুৰ পৰা মলি বা কেটাৰ ওলায় । যাৰ ফলত ৰাতি শুই থাকিলে সেইবোৰ লাগি চকু বান্ধি থয়, আৰু ৰাতিপুৱা উঠি চকু মেলিবলৈ অসুবিধা হয় ।
কনজাংকটিভাইটিছ হ’লে কি কি সাৱধানতা অৱলম্বন কৰিব লাগে ?
১) কনজাংকটিভাইটিত আক্রান্ত হ’লে অভিজ্ঞ চিকিৎসকৰ পৰামৰ্শ নলোৱালৈ নিজেই কোনো ফাৰ্মাচিত গৈ দৰৱ লগাব নালাগে ।
২) চিকিৎসকৰ পৰামৰ্শ লৈহে দৰৱ লগাব লাগে ।
৩) সদায় পৰিষ্কাৰ হাতেৰে হে চকু স্পৰ্শ কৰিব লাগে । চকু স্পৰ্শ কৰাৰ পূৰ্বে আৰু স্পৰ্শ কৰাৰ পিছত ভালদৰে হাত চাবোনেৰে ধুব লাগে ।
৪) সদায় পৰিষ্কাৰ হৈ থকাৰ লগতেই পৰিষ্কাৰ কাপোৰ-কানি পৰিধান কৰিব লাগে ।
৫) চকু সদায় পৰিষ্কাৰ পানীৰে ধুব লাগে ।
৬) চকুত জোৰেৰে পানী মাৰিব নালাগে ।
লগতে পঢ়ক: Benefits of Arjuna Tree: অৰ্জুন গছৰ ১০টা স্বাস্থ্য উপকাৰিতা জানি লওক
