হাৰ্ট এটেক এটা ভয়াৱহ শব্দ ৷ যিকোনো মানুহে এই শব্দটো শুনাৰ লগে লগেই উচপ খাই উঠে ৷ কাৰণ হাৰ্ট এটেক হ'লে মানুহৰ মৃত্যু হোৱাৰ আশংকা থাকে ৷ আমাৰ হৃদযন্ত্ৰটো হৈছে এটা পাম্প ৷ হৃদযন্ত্ৰই শৰীৰটোৰ সকলো অংশলৈ তেজ বিয়পায় ৷ হৃদযন্ত্ৰই কাৰ্য সম্পাদন কৰি থাকিবলৈ তেজৰ প্ৰয়োজন ৷
সেয়েহে আমাৰ হৃদযন্ত্ৰটোক তেল কঢ়িওৱা ট্ৰেংকাৰৰ লগতো তুলনা কৰিব পাৰো ৷ এই যন্ত্ৰটোৱে তেজ পাম্প কৰি থাকে আৰু আন অংগলৈও তেজ সৰবৰাহ কৰি থাকে ৷ উচ্চ ক'লেষ্টৰল যুক্ত খাদ্য বেছি খালে তেতিয়া তেজৰ ধমনীৰ ভিতৰত গেড পৰে ৷ অৰ্থাৎ প্লাগ বান্ধে ৷ ফলত তেজৰ ধমনীসমূহ সৰু হৈ যায় ৷ ফলত কেতিয়াবা প্লাগ হোৱা ক'লেষ্টেৰলখিনি ফাটি যায় আৰু তেজ গোট মাৰে ৷ সেই অৱস্থাটোৱে হৈছে হাৰ্ট এটেক ৷
হাৰ্ট এটেকৰ লক্ষণ সমূহ কি কি ?
- আক্রান্ত লোকজনৰ বুকুৰ বিষ হয় ৷ সাধাৰণতে এই বিষ বুকুৰ বাওঁফালে হয় ৷ কেতিয়াবা কান্ধ, ডিঙিলৈও যাব পাৰে ৷ কেতিয়াবা আকৌ পিঠিৰ ফালে অথবা বাউসী, সোঁ হাতলৈকে এই বিষ যাব পাৰে ৷
- এই বিষ আকস্মিকভাৱে হোৱা দেখা যায় ৷ কেতিয়াবা গধুৰ বস্তু দাঙিলে বা কাম কৰিলেও এনে বিষ অনুভৱ হয় ৷ কিন্তু বহি থাকিলে কেতিয়াবা বুকুৰ বিষ অনুভৱ নহ'বও পাৰে ৷
- কেতিয়াবা হঠাতে বেছিকৈ ঘাম ওলাব পাৰে ৷
- মানসিক চাপৰ বাবেও এনে বিষ হ'ব পাৰে বা কেতিয়াবা যদি সপোনত দৌৰি থকা দেখা পোৱা যায় তেতিয়াও বুকুৰ বিষ হ'ব পাৰে ৷
- যদি কোনো ব্যক্তিৰ পেটৰ ওপৰৰ ফালে অৰ্থাৎ বুকুৰ তলৰ অংশ বিষ হোৱা যেন অনুভৱ হয় ৷
- ৪০ বছৰৰ উৰ্দ্ধৰ যিকোনো লোকৰ বুকুৰ ওপৰ ফালে বিষ অনুভৱ হলে সাৱধান হ'ব লাগে ৷
- বমি, শৰীৰ অৱশ হোৱা, ডায়েৰীয়া হোৱাও কেতিয়াবা হাৰ্ট এটেকৰ লক্ষণ হ'ব পাৰে ৷
হৃদৰোগ নিয়ন্ত্ৰণৰ উপায়
- হৃদৰোগ নিয়ন্ত্ৰণ কৰিবলৈ হ'লে প্ৰথমতে জীৱনশৈলীৰ পৰিবৰ্তন কৰিব লাগিব ৷ সদায় মাছ-মাংস, কণী খোৱাতোৱেই সুষম আহাৰ গ্ৰহণ কৰাটো নুবুজাই ৷ দৈনন্দিন খাদ্য তালিকা প্ৰস্তুত কৰাৰ সময়ত সুষম আহাৰ অন্তৰ্ভুক্ত কৰা উচিত ৷
- খোৱা-বোৱাৰ পৰা আৰম্ভ কৰি দৈনন্দিন জীৱন-যাপনৰ সকলোখিনি কাম সুচাৰুভাৱে পালন কৰিলে হৃদৰোগ নিয়ন্ত্ৰণ কৰাটো সম্ভৱ ৷
- ধুমপান পৰিহাৰ কৰিব লাগে ৷
- উচ্চৰক্তচাপ নিয়ন্ত্ৰণ কৰিব লাগে ৷
- ডায়েবেটিছ নিয়ন্ত্ৰণ কৰিব লাগিব ৷ অৰ্থাৎ তেজত শৰ্কৰাৰ পৰিমাণ নিয়ন্ত্ৰণ কৰি ৰাখিলেও হৃদৰোগৰ পৰা বাচিব পাৰি ৷
লগতে পঢ়ক: Different Types of Facials: কোনটো ফেচিয়েল আপোনাৰ ছালৰ বাবে উপযুক্ত, কেনেকৈ বাছনি কৰিব ?
