ওদালগুৰিত চাহ মজদুৰ সংঘৰ ধৰ্ণাঃ মুখ্যমন্ত্ৰীলৈ স্মাৰকপত্ৰ প্ৰেৰণ

বৃহস্পতিবাৰে অসমৰ চাহ শ্ৰমিকসকলৰ জলন্ত সমস্যা সমাধানৰ দাবীত হৰিশিঙা ৰাজহ চক্ৰ বিষয়াৰ কাৰ্যালয়ত চাহ মজদুৰ সংঘৰ ধৰ্ণা ৷ ৰাজহ চক্ৰ বিষয়াৰ জড়িয়তে অসমৰ মুখ্যমন্ত্ৰী আৰু শ্ৰম মন্ত্ৰীলৈ স্মাৰকপত্ৰ প্ৰেৰণ ৷

ওদালগুৰি, 27জুনঃ অসমৰ চাহ শ্ৰমিকসকলৰ জলন্ত সমস্যাসমূহৰ প্ৰতি চৰকাৰে মাহী আইৰ দৃষ্টি দি অহাৰ প্ৰতিবাদত আৰু সমস্যাসমূহ অতিশীঘ্ৰে সমাধানৰ দাবীত বৃহস্পতিবাৰে অসম চাহ মজদুৰ সংঘৰ মঙলদৈ শাখাই টংলাস্থিত হৰিশিঙা ৰাজহ চক্ৰ বিষয়াৰ কাৰ্যালয়ত এঘন্টীয়া ধৰ্ণা কাৰ্যসূচী ৰূপায়ণ কৰে ৷ সংঘৰ সভাপতি পৱন নায়ক আৰু সম্পাদক তথা ৰাজ্যসভাৰ প্ৰাক্তন সাংসদ শান্তিয়াজ কুজুৰৰ নেতৃত্বত শাখাটোৰ অন্তৰ্গত কেইবাখনো চাহ বাগিছাৰ কেইবা শতাধিক পুৰুষ-মহিলা চাহ মজদুৰে হাতে হাতে নিজৰ দাবী সম্বলিত বেনাৰ,প্লে’কাৰ্ড লৈ বিভিন্ন শ্ল’গানেৰে টংলা নগৰত সমদল ওলিয়াই হৰিশিঙা ৰাজহ চক্ৰ বিষয়াৰ কাৰ্যালয়ত ধৰ্ণা কাৰ্যসূচী ৰূপায়ণ কৰে ৷

পাচত ৰাজহ চক্ৰ বিষয়া ঋতুত্তম বৰাৰ জৰিয়তে অসমৰ মুখ্যমন্ত্ৰী আৰু শ্ৰমমন্ত্ৰীলৈ স্মাৰকপত্ৰ প্ৰেৰণৰ জৰিয়তে অতিশীঘ্ৰে অসমৰ চাহ শ্ৰমিকৰ জলত্ব সমস্যাসমূহ সমাধানৰ দাবী জনাই ৷ লগতে দাবীসমূহ পূৰণ নহ'লে পৰৱৰ্তী সময়ত ৰাজ্যজুৰি তীব্ৰ গণতান্ত্ৰিক আন্দোলনৰ পন্থা হাতত লোৱাৰ হুংকাৰ দিয়ে ৷