ওদালগুৰি,12 জানুৱাৰীঃ ওদালগুৰিত পুৱতি নিশা আৰক্ষীৰ সফল অভিযান ৷ ৰৌতাৰ ১৫ নং ৰাষ্ট্ৰীয় ঘাইপথত আৰক্ষীয়ে জব্দ কৰিবলৈ সক্ষম হয় এখন অবৈধ সুৰা ভৰ্তি ট্ৰাক ৷ লগতে আটক কৰে উত্তৰ প্ৰদেশৰ দুজন যুৱকক ৷
প্ৰাপ্ত তথ্য মতে, গোপন সূত্ৰৰ তথ্যৰ ভিত্তিত শনিবাৰে নিশা ৰৌতা আৰক্ষী থানাৰ ভাৰপ্ৰাপ্ত আৰক্ষী বিষয়া হেমন্ত বৰুৱাৰ নেতৃত্বত আৰক্ষীৰ দল এটাই ৰাষ্ট্ৰীয় ঘাইপথটিত তালাচী চলায় ।পুৱা 5 মান বজাত UP 21 CN-2181 নম্বৰৰ ট্ৰাক এখনত আৰক্ষীৰ দলটোৱে তালাচী চলাব বিচৰাত চালকজনে ট্ৰাকখনত প্ৰসাধন সামগ্ৰী থকা বুলি উল্লেখ কৰে ৷ লগতে এখন চালানো প্ৰদৰ্শন কৰে চালকজনে । কিন্তু চালকজনৰ কথাত পতিয়ন নগৈ আৰক্ষীয়ে ট্ৰাকখনত তালাচী চলাই জব্দ কৰে প্ৰায় ৪০ লাখৰো অধিক মূল্যৰ প্ৰায় ১,০০০ কাৰ্টুন বিলাতী সুৰা ৷
ঘটনাটোৰ পিছতে ট্ৰাকৰ চালক চৌল আলম আৰু হেণ্ডিমেন মহম্মদ আদনামক গ্ৰেপ্তাৰ কৰে ৰৌতা আৰক্ষীয়ে । জব্দ সুৰাখিনি অৰুণাচলৰ পৰা মহাৰাষ্ট্ৰলৈ নিয়াৰ পৰিকল্পনা কৰিছিল বুলি ধৃত যুৱক দুজনে প্ৰকাশ কৰে ৷ ঘটনাতো সন্দৰ্ভত ৰৌতা আৰক্ষীয়ে নিজাববীয়াকৈ গোচৰ ৰুজু কৰি দেওবাৰে যুৱক দুজনক ওদালগুৰি আদালতত হাজিৰ কৰায় । আদালতে যুৱক দুজনক ৩ দিনৰ বাবে আৰক্ষীৰ জিম্মালৈ প্ৰেৰণ কৰে ।
লগতে চাওকঃবাইহাটাৰ কমলপুৰত পথত জ্বলিল মটৰচাইকেল
