ওদালগুৰি, 11 চেপ্তেম্বৰঃ ওদালগুৰিৰ ভালুকমাৰীত বুধবাৰে পুৱা সংঘটিত হয় এক লোমহৰ্ষক হত্যাকাণ্ডৰ ঘটনা। পুত্ৰৰ হাতত প্ৰাণ গ'ল পিতৃৰ ৷ চোকা অস্ত্ৰৰে ঘপিয়াই বৃদ্ধ পিতৃক হত্যা কৰিলে কুলাংগাৰ পুত্ৰই । বুধবাৰে পুৱা ২ নং ভালুকমাৰী গাঁৱৰ নবাৰণ নাৰ্জাৰী নামৰ ব্যক্তিজনক নৱম শ্ৰেণীত অধ্যয়ৰত পুত্ৰই চোকা অস্ত্ৰৰে আক্ৰমণ কৰি হত্যা কৰে । বাইক কিনি নিদিয়াৰ বাবেই পুত্ৰই পিতৃক হত্যা কৰাৰ সন্দেহ স্থানীয়ৰ ৷
তথ্যানুসৰি, হত্যাকাৰী পুত্ৰই বহুদিনৰ পৰা বাইক এখন কিনি দিবলৈ পিতৃক হেঁচা দি আছিল যদিও মাত্ৰ নৱম শ্ৰেণীত পঢ়ি থকা কিশোৰ পুত্ৰজনক বাইক কিনি দিবলৈ অমান্তি হৈছিল পিতৃ ৷ যাৰ বাবে পথাৰত জংঘল চাফা কৰা লোহাৰ সঁজুলিৰে বৃদ্ধ পিতৃক মূৰত আক্ৰমণ কৰে । পৰিয়ালৰ লোকে ততাতৈয়াকৈ ৰৌতা আদৰ্শ চিকিৎসালয়ত ভৰ্তি কৰায় যদিও চিকিৎসকে মৃত বুলি ঘোষণা কৰে ব্যক্তিজনক ।
আনহাতে, ৰৌতা আৰক্ষীয়ে অভিযুক্ত কিশোৰজনক গ্ৰেপ্তাৰ কৰি এটি গোচৰ ৰুজু কৰি তদন্ত অব্যাহত কৰে ৷
