তিনিচুকীয়া, 7 জুলাই : সমগ্ৰ অসমতে এতিয়া ক'ৰণাৰ বিভীষিকা । অসম আৰক্ষী সঞ্চালক তথা ৰাজ্য চৰকাৰেও ক’ভিডৰ ভয়াবহতা নিয়ন্ত্ৰণ কৰিবলৈ আৰক্ষীক কঠোৰ হ’বলৈ নিৰ্দেশ জাৰি কৰিছে । কিন্তু তেনে সময়তে মঙলবাৰে দিনৰ ভাগত তিনিচুকীয়াত সংঘটিত হৈছে এক অঘটন ৷
এইবাৰ আৰক্ষীয়ে উদ্ভণ্ডালি কৰাৰ অভিযোগ উত্থাপন হৈছে ৷ এই অভিযোগ উত্থাপন কৰিছে তিনিচুকীয়াৰ দুজন ব্যক্তিয়ে ৷ অভিযোগ অনুসৰি, আৰক্ষীয়ে তিনিচুকীয়াৰ দুজন ব্যক্তিক প্ৰহাৰো কৰে ৷
ঘটনাৰ বিৱৰণি অনুসৰি, তিনিচুকীয়াৰ দুজন ব্যক্তিয়ে একেখন বাইকত উঠি লালবাংলাৰ নিজ বাসগৃহৰ পৰা পাঁচ আলি অভিমুখে আহি আছিল ৷ তেনে সময়তে বাইক আৰোহী দুজন মুখামুখি হ’ল কৰ্তব্যৰত অৱস্থাত থকা যান-বাহন আৰক্ষী সৈতে ৷
বাইক আৰোহী দুজনে ৰাজ্য প্ৰশাসনে জাৰি কৰা নিৰ্দেশনাক অবমাননা কৰাৰ বাবে আৰক্ষীৰ ওচৰত ক্ষমা বিচাৰে ৷ আনকি ভুলবশতঃ প্ৰশাসনে জাৰি কৰা নিৰ্দেশনাক অবমাননা কৰাৰ হেতুকে বাইক আৰোহী দুগৰাকীয়ে জৰিমনা দিবলৈয়ো প্ৰস্তুত হয় ৷ কিন্তু বাইক আৰোহী দুগৰাকীৰ কোনো কথাই শুনিবলৈ প্ৰস্তুত নহয় কৰ্তব্যৰত যান-বাহন আৰক্ষী ৷
তাৰ বিপৰীতে কৰ্তব্যৰত যান-বাহন আৰক্ষীয়ে ৰুদ্ৰ মূৰ্তি ধাৰণ কৰি বাইক আৰোহী এজন যুৱকক মাৰপিট কৰে । আৰক্ষীৰ লাঠীৰ কোবত যুৱক জনৰ পিঠিত যথেষ্ট আঘাত পাই আৰু প্ৰাণৰ মমতাত সেই স্থানৰ পৰা বাইক আৰোহীজনে পলায়ন কৰে । এই ঘটনাক কেন্দ্ৰ কৰি তিনিচুকীয়াত এক উত্তপ্ত পৰিস্থিতিৰ সৃষ্টি হয় ৷ বাইক আৰোহী দুগৰাকীয়ে নিজৰ ভুল স্বীকাৰ কৰাৰ পাচতো যান-বাহন আৰক্ষীয়ে জধে-মধে প্ৰহাৰ কৰাক লৈ সৰ্বত্ৰে এতিয়া চৰ্চিত হৈছে যান-বাহন আৰক্ষীৰ এই কাৰ্য ৷
লগতে পঢ়ক: সোণালী আখৰেৰে লিখা গুৰু গ্ৰন্থ চাহিব
