কাকপথাৰ, 16 চেপ্তেম্বৰঃ ছ'চিয়েল মিডিয়াৰ শুদ্ধ আৰু উপযুক্ত ব্যৱহাৰ কৰি ফেচবুকৰ শক্তিৰ অপৰিসীম নিদৰ্শন দাঙি ধৰিলে মানৱদৰদী বন্ধুৱে ৷ যিটো সময়ত ছ'চিয়েল মিডিয়াক লৈ বহুটো বিতৰ্কৰ সৃষ্টি হৈছে তেনে সময়তে ছ'চিয়েল মিডিয়াৰ অপৰিসীম শক্তি তথা সদব্যৱহাৰৰ অপূৰ্ব নিদৰ্শন দাঙি ধৰিলে একাংশ যুৱকে ৷ মানসিকভাৱে বিকাৰগ্ৰস্থ হৈ পৰা উচ্চশিক্ষিত তথা শিক্ষক বন্ধুৰ বাসগৃহত উপস্থিত হৈ চিকিৎসাৰ লগতে বাসগৃহ বনোৱাৰ দায়িত্ব বহন কৰিলে কলেজীয়া বন্ধুৱে ৷
এক মহান উদ্দেশ্য লগত লৈ কাকপথাৰ থানাৰ অন্তৰ্গত বৰআলি গাঁৱত সোমবাৰে উপস্থিত হয় একাংশ যুৱক ৷ ছ'চিয়েল মিডিয়াত প্ৰচাৰিত হোৱা এটা খবৰৰ উৎসৰ আঁত ধৰি নিজৰ কলেজীয়া বন্ধু অৰূপৰ বাসগৃহত উপস্থিত হয় একেলগে শিক্ষা গ্ৰহণ কৰা কৃঞ্চকান্ত, বুধেশ্বৰ, ভদ্ৰকৃঞ্চ, ভবেন আদিকে ধৰি প্ৰায় বিশ-ত্ৰিশজন যুৱক ৷ ডুমডুমা মহাবিদ্যালয়ত অধ্যয়ন কৰা অৰূপ নামৰ উচ্চশিক্ষিত তথা শিক্ষক বন্ধুৰ বাসগৃহত উপস্থিত হয় বৰ্তমানে বন বিভাগত কৰ্মৰত কৃঞ্চকান্ত গগৈৰ নেতৃত্বত যোৱা বন্ধুসকলে ৷
উল্লেখ্য যে, এটা সময়ত অৰূপে স্থানীয় বিদ্যালয়ত পাঠদান কৰাৰ লগতে ব্যক্তিগতভাবেও বহু ছাত্ৰ-ছাত্ৰীক শিক্ষা প্ৰদান কৰিছিল ৷ শেহতীয়াভাৱে ব্যৱসায়ৰ সৈতে জড়িত হৈ পৰিছিল অৰূপ, কিন্তু ব্যৱসায়ত জড়িত হোৱাৰ পিচৰে পৰাই মানসিকভাৱে অসুস্থ হৈ পৰে অৰূপ ৷ অৰূপৰ অৱস্থাৰ বিষয়ে ফেচবুকত জানিব পাৰি আজি এইদৰে তেওঁৰ বাসগৃহত উপস্থিত হয় এটা সময়ত কলেজত সোনালী অতীত পাৰ কৰি অহা মহান বন্ধুকেইজন ৷ অৰূপৰ বাসগৃহত উপস্থিত হৈ উৱলি যোৱা বাসগৃহটোৰ নিৰ্মাণৰ প্ৰাৰম্ভিক কাম আৰম্ভ কৰি চিকিৎসাৰ লগতে এটা নতুন বাসগৃহ সজাই দিয়াৰ দায়িত্ব গ্ৰহণ কৰে বন্ধুসকলে ৷
বন্ধুৰ বাসগৃহত উপস্থিত হৈ ভগা-চিগা গৃহতে আটায়ে একেলগে এসাঁজ গ্ৰহণ কৰাৰ লগতে বন্ধুক মানসিকভাৱে উৎসাহ প্ৰদান কৰে ৷ ছ'চিয়েল মিডিয়াৰ যোগেদি এনেদৰে আৰ্থিক সাহাৰ্যৰ লগতে চিকিৎসাৰ ক্ষেত্ৰত সহায় কৰিব ওলোৱা কাৰ্যক সকলোৱে একেমুখে শলাগিছে ৷ বৰ্তমানৰ যান্ত্ৰিকতাৰ যুগত মানৱীয় প্ৰমূল্যবোধক অগ্ৰাধিকাৰ দিয়া বন্ধুসকলৰ এই প্ৰচেষ্টাই যুৱকজনক সকলো প্ৰকাৰে সকাহ দিব বুলি আশা কৰিছে গাঁৱবাসীয়ে ৷
