তিনিচুকীয়া, 15 জুনঃ বাঘজানৰ জুই নিয়ন্ত্ৰণৰ বাবে আগবাঢ়ি আহিল ভাৰতীয় সেনা । সোমবাৰে বাঘজান তৈল খাদৰ শেহতীয়া পৰিস্থিতি পৰ্যবেক্ষণ কৰে দিনজান সেনা শিবিৰৰ সেনাৰ দলটোৱে ৷ ঘটনাস্থলীত প্ৰৱেশৰ বাবে খাদটোৰ ওচৰতেই থকা এটা বৃহৎ পুখুৰীৰ ওপৰত সেনাই এখন দলং নিৰ্মাণ কৰিব বুলি জানিব পৰা গৈছে ৷ বাঘজানৰ পৰাই সেনাৰ দলটোৱে আৰম্ভ কৰিব দলং নিৰ্মাণৰ কাম ।
উল্লেখযোগ্য যে, অইল ইণ্ডিয়া, ONGC ৰ লগতে বিদেশৰ পৰা অহা বিশেষজ্ঞৰ এটা দলে বাঘজান "BGR-5" খাদৰ জুই নিয়ন্ত্ৰণৰ চেষ্টা অব্যাহত ৰখাৰ মাজতেই জুই নিয়ন্ত্ৰণৰ অভিযানত যোগ দিছে ভাৰতীয় সেনাই ৷ সোমবাৰে খাদটোৰ পাশ্বৱৰ্তি সমগ্ৰ অঞ্চল পৰ্যবেশন কৰে সেনাৰ এই দলটোৱে ৷ মঙলবাৰৰ পৰা দলটোৱে দলং নিৰ্মাণৰ কাম আৰম্ভ কৰিব বুলি জানিব পৰা গৈছে ।
কিছুদিন পূৰ্বে ছিংগাপুৰৰ পৰা অহা তিনিজনীয়া বিশেষজ্ঞৰ এটা দলে খাদটো পৰিদৰ্শনৰ বাবে উপস্থিত হয় এলেকাটোত ৷ দলটোৱে বিজিআৰৰ 5 নম্বৰ খাদটো পৰিদৰ্শন কৰে ৷
বাঘজানৰ ভয়াৱহ জুয়ে সৰ্বশ্ৰান্ত কৰা পৰিয়ালক চৰকাৰে আশ্ৰয় শিবিৰত ৰাখিছে সঁচা, কিন্তু কৰ'ণা মহামাৰীৰ কথা ভাবি এই আশ্ৰয় শিৱিৰবোৰলৈ এবাৰ চালে আপোনাৰো দুখ আৰু ভয় লাগিব । পকী মজিয়াত চাৰি মহীয়া কেঁচুৱা শুই পৰিছে, একেটা কোঠাতে ইজনে সিজনৰ গাত লাগি বহি শুই দিন পাৰ কৰিছে এইসকল খিলঞ্জীয়াই । চৰকাৰী সজাগতাৰ বাৰ্তাই ঢুকি নোপোৱা এইসকল খাতি-খোৱা সহজ-সৰল লোকৰ মাজত কেনেবাকৈ যদি ভয়াৱহ কৰ'ণাৰ বীজাণু বিয়পি পৰে তেন্তে পৰিস্থিতি কিমান ভয়াৱহ হ'ব পাৰে তাক কোনেও কম্পনা কৰিবও নোৱাৰিব ৷
লগতে পঢ়কঃ জয়ন্ত বৰাৰ মৃত্যুৰ তদন্ত ঘোষণা অতিৰিক্ত আৰক্ষী সঞ্চালক প্ৰধানৰ
বাঘজানৰ অগ্নিকাণ্ড সংঘটিত হোৱা বিজিআৰৰ 5 নং খাদটো দেওবাৰে পৰিদৰ্শন কৰে কেন্দ্ৰীয় পেট্ৰ’লিয়াম মন্ত্ৰী ধৰ্মেন্দ্ৰ প্ৰধানৰ লগতে ৰাজ্যৰ মুখ্যমন্ত্ৰী সৰ্বানন্দ সোণোৱালে ৷ মন্ত্ৰী দুগৰাকীক এই কাৰ্যসূচীত সহযোগ কৰে মন্ত্ৰী অতুল বৰা,চন্দ্ৰমোহন পাটোৱাৰী,ৰামেশ্বৰ তেলীৰ লগতে অসমৰ কেইবাজনো বিধায়কে ৷ খাদটো পৰিদৰ্শনৰ অন্তত বাঘজানৰ দীঘলতৰং আশ্ৰয় শিবিৰত অস্থায়ীভাৱে থকা লোকসকলৰ ওচৰত উপস্থিত হয় মন্ত্ৰীদ্বয় ৷
উল্লেখ্য যে,মন্ত্ৰী দুগৰাকীয়ে বিভিন্ন প্ৰতিশ্ৰুতি প্ৰদান কৰে শিবিৰবাসীক ৷ সেই অনুসৰি, বাঘজানত এখন উচ্চতৰ মাধ্যমিক বিদ্যালয়ৰ লগতে আদৰ্শ চিকিৎসালয় স্থাপনৰ ঘোষণা কৰে মুখ্যমন্ত্ৰী সোণোৱালে । ইফালে মাগুৰী-মতাপুং বিল অইলৰ দ্বাৰা পৰিস্কাৰ কৰিবলৈ নিৰ্দেশ প্ৰদান কৰে মুখ্যমন্ত্ৰীয়ে ৷ লগতে এই বিলখনক আন্তঃৰাষ্ট্ৰীয় পৰ্যায়লৈ উন্নীত কৰাৰো দিয়ে প্ৰতিশ্ৰুতি । তদুপৰি অঞ্চলটোত এখন পশু চিকিৎসালয় স্থাপনৰ ঘোষণা কৰে মন্ত্ৰীগৰাকীয়ে ৷ বাঘজান অগ্নিকাণ্ডৰ প্ৰতিটো ক্ষতিগ্ৰস্ত পৰিয়ালক উচিত ক্ষতিপূৰণ দিয়াৰ লগতে বাঘজানৰ পৰা তিনিচুকীয়ালৈ পকীপথ নিৰ্মাণৰ ব্যৱস্থা কৰিব বুলি ঘোষণা কৰে মন্ত্ৰী দুগৰাকীয়ে ৷ সমান্তৰালকৈ 27 কোটি টকা ব্যয় সাপেক্ষে স্থানীয় বান-গৰাখহনীয়া সমস্যা সমাধানৰ বাবে মথাউৰি নিৰ্মাণৰো প্ৰতিশ্ৰুতি প্ৰদান কৰে বাঘজানবাসীক ৷ ইয়াৰোপৰি নিবনুৱা সকলক সংস্থাপনৰ বাবে স্থাপন কৰা হ’ব দক্ষতা অভিযান কেন্দ্ৰ ৷
বাঘজানৰ অগ্নিকাণ্ডই প্ৰভাৱ পেলাইছে ডিব্ৰু-ছৈখোৱা ৰাষ্ট্ৰীয় উদ্যানত,এই কথা স্বীকাৰ কৰিলে অসমৰ বন আৰু পৰিৱেশ মন্ত্ৰী পৰিমল শুক্লবৈদ্যই ৷ ইতিমধ্যেই বন বিভাগৰ এটা মুৰব্বী বিষয়াৰ দলে ঘটনাস্থলীত উপস্থিত হৈ পৰিস্থিতিৰ ফলত উদ্ভৱ হ'ব পৰা বিষয় সমূহৰ পৰ্যালোচনা কৰিছে বুলি জনাই মন্ত্ৰীজনে ৷ উল্লেখ্য যে, এই অভাৱনীয় ঘটনাৰ ফলত কাষৰীয়া বনাঞ্চল সমূহত বাস কৰা জীৱ-জন্তুৰ সমুহৰ জীৱনলৈ আহিব পৰা ভাবুকি আৰু ইয়াৰ প্ৰতিকাৰৰ সন্দৰ্ভত কেন্দ্ৰীয় চৰকাৰৰ লগত আলোচনা কৰিছে বুলি জনাইছে মন্ত্ৰীজনে ৷
আনহাতে, বাঘজান কাণ্ডত প্ৰাণ হেৰুওৱা দুয়োজন দুৰ্ভগীয়া কৰ্মচাৰীৰ মৃতদেহ 10 জুনত উদ্ধাৰ হৈছিল অগ্নিকাণ্ড সংঘটিত হোৱা স্থানৰ সমীপৰ এটা জলাশয়ৰ পৰা ৷ সম্প্ৰতি পৰিয়ালটোৰ মাথো এটাই প্ৰশ্ন কেতিয়া ন্যায় পাব তীখেশ্বৰ গোঁহাই আৰু দুৰ্লভ গগৈয়ে ৷
লগতে পঢ়কঃ জয়ন্ত বৰাৰ মৃত্যুৰ তদন্ত ঘোষণা অতিৰিক্ত আৰক্ষী সঞ্চালক প্ৰধানৰ
