সন্ধানহীন পুত্ৰত বিচাৰি গৈ দুৰ্ঘটনাগ্ৰস্থ পিতৃ

শদিয়াত বিগত দুটা মাহে সন্ধানহীন হৈ আছে হিৰকজ্যোতি দহোটীয়া নামৰ এজন ছাত্ৰ ৷ পুত্ৰক বিচাৰিবলৈ গৈ দুৰ্ঘটনাত পতিত হোৱা পিতৃ সংকটজনক অৱস্থা ৷ সন্ধানহীন পুত্ৰক বিচৰাৰ লগতে আঘাতপ্ৰাপ্ত পিতৃক সহায়ৰ প্ৰতিশ্ৰুতি স্থানীয় বিধায়কৰ ৷

শদিয়া, 2 ফেব্ৰুৱাৰীঃ ২০১৯ বৰ্ষৰ ১৮ নৱেম্বৰ পৰা সন্ধানহীন হৈ আছে কাকপথাৰ উচ্চতৰ মাধ্যমিক বিদ্যালয়ৰ অষ্টম শ্ৰেণীৰ ছাত্ৰ হিৰকজ্যোতি দহোটীয়া ৷ কাকপথাৰ ১ নং হাতীগড় গাঁৱৰ নিতুল দহোটীয়া আৰু স্মৃতি দহোটীয়াৰ পুত্ৰ হিৰকজ্যোতিয়ে লগৰীয়াৰ সৈতে অৰুণাচল প্ৰদেশৰ আলুবাৰীত কামৰ সন্ধানত যোৱা বুলি পৰিয়ালৰ লোকে জানিব পাৰে যদিও বৰ্তমানলৈ ঘূৰি অহা নাই ছাত্ৰজন ৷ স্থানীয় টঙনা আৰক্ষী থানাত সন্ধানহীনৰ গোচৰ ৰুজু কৰে যদিও আৰক্ষীয়ে ছাত্ৰজনক বিচাৰি উলিওৱাত বিশেষ প্ৰদক্ষেপ হাতত লোৱা নাই বুলি অভিযোগ উত্থাপন কৰে পৰিয়ালৰ লোকে ৷

আনহাতে, সন্ধানহীন পুত্ৰক অৰুণাচলত বিচাৰি গৈ এক মটৰ চাইকেল দুৰ্ঘটনাত পতিত হোৱাত বৰ্তমান সংকটজনক অৱস্থাত আছে পিতৃ নিতুল দহোটীয়া ৷ দৰিদ্ৰ পৰিয়ালটোৱে পিতৃৰ উন্নত চিকিৎসাৰ বাবে আৰ্থিক দুৰৱস্থাই বাধা ৰূপে দেখা দিছে ৷ বিগত দুটা মাহে পুত্ৰৰ সন্ধান লাভ নকৰাত মানসিকভাবেও ভাগি পৰিছে দুৰ্ভগীয়া পিতৃ নিতুল দহোটীয়া ৷ স্থানীয় সংবাদকৰ্মীয়ে বিধায়ক দুৰ্গা ভূমিজক যোগাযোগ কৰাত সংকটজনক অৱস্থাত থকা পিতৃক সহায় কৰাৰ প্ৰতিশ্ৰুতি দিছে যদিও পুত্ৰক বিচাৰি হাবাথুৰি খাইছে পৰিয়ালটো ৷ কণমানি ভাতৃৰ কাতৰ আহ্বান "দাদা তই যতে আছ' ঘৰলৈ ঘূৰি আহ" ৷ "দেউতা দুৰ্ঘটনা হৈ পৰি আছে" ৷

উল্লেখ্য যে, সদাশয় ব্যক্তিয়ে ছাত্ৰজনৰ সন্ধান পালে 81350-48411 নম্বৰত যোগাযোগ কৰিবলৈ আহ্বান জনাই দুৰ্ভগীয়া পৰিয়ালটোৱে ৷

আৰু পঢ়কঃ বৰপেটাত অনুষ্ঠিত 'আইদেউৰ বুলনি' শীৰ্ষক অনুষ্ঠান